ᐅᕙᓃᑦᑐᑎᑦ : ᐊᖏᕐᕋᖅ » ᐅᐃᓕᐊᒻ ᐱᐊᓂ
ᐅᐃᓕᐊᒻ ᐱᐊᓂ
ᐅᐃᓕᐊᒻ ᐱᐊᓂ ᐃᓅᓂᑯ 1808–ᒥ 1809–ᒥᓗᑭᐊᖅ ᐲᑐᕼᐃᐊᑦᒥ, ᓯᑳᓪᓚᓐᒥ. ᐊᓈᓇᓕᒥᓂᖅ ᕼᐃᐊᓚᓐ ᕌᐳᑦᓴᓐᒥᒃ (Helen Robertson). ᖁᓕᓪᓗ ᒪᕐᕈᓪᓗᓂᒃ ᐅᑭᐅᖃᓕᑕᐃᓐᓇᖅᓱᓂ, ᐃᓚᔪᒥᓂᖅ ᐊᑖᑕᒥᓄᑦ – ᐊᒻᒪᓗᑦᑕᐅᖅ ᑳᐱᑕᐃ ᐅᐃᓕᐊᒻ ᐱᐊᓂ – ᐊᕐᕙᒐᓱᐊᕆᐊᖅᑐᖃᑕᐅᓪᓗᓂ ᕿᑭᖅᑖᓘᑉ ᐊᑯᑭᑦᑐᐃᓪᓗ ᓄᓇᖓᑕ ᐃᑭᕋᓴᖓᓄᑦ. ᐃᓅᓱᑦᑐᖅ ᐱᐊᓂ ᐅᒥᐊᖅᑐᖃᑦᑕᐃᓐᓇᓂᐊᓕᖅᓱᓂ ᑕᕆᐅᒃᑯᑦ ᐃᓅᓯᓕᒫᒥᓂ.
ᐱᐊᓂ ᓇᓂᓯᔪᒥᓂᖅ ᐃᖅᑲᓇᐃᔭᕐᕕᒋᓂᐊᓕᖅᑕᒥᓂᒃ ᐅᑭᐅᖅᑕᖅᑐᒥ ᐊᕐᕙᓂᐊᖅᑎᓄᑦ ᐅᒥᐊᕐᔪᐊᓂ ᑳᐱᑕᐃᕈᖅᑐᒥᓂᐅᓪᓗᓂᓗ 1835–ᒥ. ᑕᕝᕙᓂ ᐊᕐᕌᒍᒥ ᐊᒃᓱᕈᕐᓇᓗᐊᖅᑐᒥᓂᖅ ᐴᑎᓯᒃᑯᑦ ᐊᕐᕙᕐᓂᐊᕐᓂᒃᑯᑦ ᐱᓕᕆᕕᖓᓄᑦ ᕿᑭᖅᑖᓘᑉ ᐊᑯᑭᑦᑐᐃᓪᓗ ᓄᓇᖓᑕ ᐃᑭᕋᓴᖓᓂ. ᐊᕐᕕᓂᓖᑦ ᐅᒥᐊᕐᔪᐊᑦ ᓯᖁᑦᑎᓂᖅᓱᑎᒃ, ᖁᓕᓪᓗ ᐊᑕᐅᓯᕐᓗ ᐊᖑᑏᑦ ᐊᔪᖅᓯᐅᖃᖅᓱᑎᒃ ᓯᑯᒥ, 135 ᐊᖑᑏᑦ ᑐᖁᕋᖅᑐᒥᓂᐅᓪᓗᑎᒃ ᐃᒃᑭᓗᓐᓂᕐᒧᑦ ᖁᐊᖅᑎᑎᕐᓂᒧᓪᓗ ᐅᑭᐊᖓᓂ. ᐱᐊᓂ ᐅᒦᖅᓯᓚᐅᖅᓯᒪᓐᓂᖏᑦᑐᖅ, ᑭᓯᐊᓂ ᓇᓗᒍᓐᓃᖅᑐᒥᓂᖅ ᓇᐸᐃᓐᓇᓂᐊᖅᑐᓂᒃ, ᐅᓗᕆᐊᓇᙱᑦᑐᓂᒃ ᐊᕐᕕᓕᕆᕕᐅᒐᔭᕐᓗᑎᒃ ᓇᑉᐸᐃᒋᐊᖃᕆᐊᖅ.
ᓇᓗᓇᖅᑐᑐᐊᒥᓂᖅ ᑕᕝᕙ ᓇᒥ ᓴᓇᓂᐊᕆᐊᖅ. ᓇᔪᖅᑕᐅᓚᐅᖅᓯᒪᙱᑦᑐᖅ ᑲᖏᖅᓱᖅ ᓯᑯᒍᓐᓇᖏᑦᑐᖅ ᐅᑭᐅᓪᓚᕆᓚᐅᖅᑎᓐᓇᒍ, ᐸᓐᓂᖅᑑᑉ ᑲᖏᖅᓱᐊᓗᐊ ᓴᓇᕕᒃᓴᐅᒋᐊᖓ ᐃᓱᒪᓇᖅᑐᒥᓂᖅ. ᐊᕐᕕᓂᐊᖅᑏᑦ ᑐᓴᖅᓯᒪᔭᕕᓂᖓᑦ ᑭᓯᐊᓂ ᖃᐅᔨᒪᓐᓂᖏᑦᑐᑦ ᓇᒦᓪᓚᕆᒃᑲᓗᐊᕐᒪᖔᖅ. 1840–ᖑᑎᓪᓗᒍ, ᐃᓅᓱᑦᑐᖅ ᐃᓄᒃ ᐃᓄᓪᓗᐊᐱᒃ ᖃᐅᔨᒪᓕᑕᐅᓚᐅᖅᑐᒥᓂᖅ ᐱᐊᓂᒧᑦ ᑲᖏᖅᓱᐊᓗᓕᐊᕈᑎᓪᓗᓂᐅᒃ ᐸᓐᓂᖅᑑᑉ ᓴᓂᐊᓄᑦ. ᖃᐅᔨᒃᑲᐃᒐᓱᐊᖅᓱᑎᒃ ᑮᓇᐅᔭᓕᐅᕈᑕᐅᒍᓐᓇᕆᐊᖓ ᐊᒥᓱᓂᒃ ᐊᕐᕙᓂᐊᕐᕕᐅᓗᓂ ᖃᓪᓗᓈᓄᑦ, ᑭᓯᐊᓂ ᐱᐊᓂ ᑎᑭᓐᓇᓵᓗᐊᕐᓂᕋᒥ ᐊᕐᕙᓂᙱᑦᑐᖅ, ᐅᑎᓯᔪᒥᓂᐅᓪᓗᓂᓗ ᓄᓇᒥᓄᑦ ᓱᓇᑦᑐᒥᓂᐅᒐᓂ.
ᐴᑎᓯᒃᑯᑦ ᐊᕐᕕᓕᕆᕕᖓᑦ ᐱᔭᖅᑯᖅᑐᓴᖅᑐᒥᓂᖅ, ᐊᒻᒪᓗ ᐱᐊᓂ ᐅᑕᖅᑭᔭᕆᐊᖃᕐᓂᖅᓱᓂ ᐊᕐᕌᒍᓂᒃ ᐱᖓᓱᒃᑲᓂᕐᓂᒃ ᐅᒥᐊᓕᑦᑕᐅᑲᓐᓂᓚᐅᕋᓂ ᐊᓯᐊᓄᑦ ᐅᒥᐊᕐᔪᐊᒧᑦ ᑳᐱᑕᐃᒋᔭᐅᓗᓂ. ᑕᒪᓐᓇᐅᑎᓪᓗᒍ ᐱᕕᖃᕐᕕᖃᕈᓐᓇᖅᑐᒥᓂᖅ ᑲᑎᒪᒃᓯᒋᐊᖅ ᓄᓕᐊᖅᑖᕆᕋᑖᒥᓂᕐᒥᓂᒃ, ᒫᒡᒍᕋᑦ ᐆᕕᓐᒥᒃ (Margaret Irvine). ᐃᕐᓂᑖᕆᐊᙵᒥᓂᖓᑦ ᑐᖁᔪᒥᓂᖅ ᐱᐊᕋᓛᖑᓪᓗᓂ, ᑭᓯᐊᓂ ᐸᓐᓂᒃᑖᖅᑐᒥᓃᑦ ᑭᖑᓂᑦᓯᐊᖓᒍᑦ, ᐊᑎᓕᒻᒥᒃ ᕼᐃᐊᓚᓐ( Helen), ᑭᖑᓂᖓᒍᑦ ᕿᑐᕐᖓᖅᑖᑲᓐᓂᖅᑐᒥᓂᐅᓪᓗᑎᒃ ᐱᖓᓱᓂᒃ. 1844–ᒥ, ᐱᐊᓂ ᐃᖏᕐᕋᓯᒃᑲᓐᓂᓕᕐᓂᕐᒥᔪᖅ ᐸᓐᓂᖅᑑᑉ ᑲᖏᖅᓱᐊᓗᐊᓄᑦ.
ᐱᐊᓂ ᐊᐅᓚᒃᓯᔪᒥᓂᖅ ᓯᕗᓪᓕᖅᐹᓂ ᕿᓂᕐᓂᒥᓂᕐᓂᒃ ᖃᐅᔨᔭᐅᒻᒪᐃᑦᑐᒥᒃ ᐴᑎᓯᒦᙶᖅᑐᒥᓂᕐᒥᒃ ᓲ ᔮᓐ ᕗᓛᑭᓕᓐᒥᒃ (Sir John Franklin) ᐃᖅᑲᓇᐃᔭᖅᑐᒥᓂᕐᒥᒃ ᐊᕐᕙᓂᐊᖅᑎᐅᓪᓗᓂ. ᐱᖃᑎᑖᖅᑐᒥᓂᖅ ᕗᕌᓐᑭᓕᓐ ᓄᓕᐊᖓᓂᒃ ᓚᐃᑎ ᔭᐃᓐᒥᒃ (Lady Jane), ᐊᐅᓚᒃᓯᔨᐅᑎᑕᒥᓂᐅᓪᓗᓂᓗ ᐃᓚᖓᓐᓂ ᕿᓂᖅᑕᐅᔪᖃᕐᓂᐊᑎᓪᓗᒍ ᐅᐸᑦᑕᒥᓄᑦ ᑎᑭᐅᑎᒻᒪᐃᑦᑐᓂᒃ ᕿᓂᖅᑐᖃᕐᓂᐊᑎᓪᓗᒍ 1850–ᒥ 1851–ᒧᑦ. ᕗᕌᓐᑭᓕᓐ ᐱᐅᓕᐊᖑᓐᓂᖏᑦᑐᖅ, ᑭᓯᐊᓂ ᐱᐊᓂ ᖃᐅᔨᔪᒥᓂᖅ ᐊᑑᑎᖃᓪᓚᕆᓐᓂᖓᓂᒃ ᕿᒧᑦᓰᑦ ᐊᒻᒪᓗ ᐅᑮᒍᓐᓇᕐᓂᖅ ᐅᒥᐊᕐᔪᐊᒦᓪᓗᓂ.
ᐱᐊᓂ ᐅᑎᕐᓂᕐᒥᔪᖅ ᐸᓐᓂᖅᑑᑉ ᑲᖏᖅᓱᐊᓗᐊᓄᑦ 1853–ᒥ ᐊᒻᒪᓗ 1854–ᒥ, ᐱᔮᕆᓪᓗᓂ ᓯᒃᑯᔾᔭᐅᑎᑦᓯᔪᒥᓂᒃ ᒪᕐᕉᓐᓂᒃ ᐅᒥᐊᕐᔪᐊᒥᓂᒃ, ᐊᐃᑉᐸᖓ ᓚᐃᑎ ᕗᕌᓐᑭᓕᓐ (Lady Franklin) ᐊᒻᒪᓗ ᓲᕕᐊ (Sophia) ᓄᕗᔭᒥ. ᐅᐱᕐᖓᑦᓵᕈᕐᒥᒻᒪᓐ, ᓯᕗᓪᓕᖅᐹᖑᓪᓗᓂ ᖃᓪᓗᓈᖑᓪᓗᓂ ᑳᐱᑕᐃ ᐊᕐᕙᒐᓱᐊᖅᑐᒥᓂᖅ ᓯᓈᓂ. ᑕᒪᐅᙵᖅᓯᒪᓂᖓᑦ ᑲᔪᓯᓂᖃᑦᓯᐊᖅᑐᒥᓂᐅᒻᒪᑦ ᐱᐊᓂ ᐅᑮᓕᖅᑭᑦᑖᓕᖅᑐᒥᓂᖅ ᐱᖓᓱᐊᖅᑎᖅᓱᓂ ᐸᓐᓂᖅᑑᑉ ᑲᖏᖅᓱᐊᓗᐊᓂ ᓇᑉᐸᐃᒍᒪᓪᓗᓂᓗ ᓇᐸᐃᓐᓇᕐᓂᐊᓕᖅᑐᓂᒃ ᐊᕐᕕᓕᕆᕕᐅᖃᑦᑕᓂᐊᖅᑐᓂᒃ ᕿᑭᖅᑕᓂ ᓄᕗᔭᒥᓗ. 1857–ᖑᑎᓪᓗᒍ, ᓇᑦᓴᖅᑕᒥᓂᖓ ᒪᑕᐃᐊᓯ ᕚᕐᒧ (Matthäus Warmow), ᒧᕋᐃᕕᐊᒥᐅᖅ ᓯᕗᓪᓕᖅᐹᒥᓂᐅᓪᓗᓂᓗ ᐊᔪᕿᖅᑐᐃᔨᐅᓪᓗᓂ ᑲᖏᖅᓱᐊᓗᓕᐊᖅᑐᒥᓂᖅ. ᓄᓕᐊᖓ, ᒫᒡᒍᕋᑦ, ᐃᓚᐅᖃᑕᐅᓐᓂᕐᒥᔪᖅ ᒪᕐᕈᐊᑎᖅᓱᓂ ᐅᐃᖓ ᐅᒥᐊᖅᑐᑎᓪᓗᒍ ᐅᖓᓯᑦᑐᒧᑦ. ᓯᕗᓪᓕᖅᐹᖑᒍᒪᐃᓐᓇᐸᑦᓱᓂ ᓄᑖᓂᒃ ᐱᕙᓪᓕᐊᔪᖃᓕᖅᑎᓪᓗᒍ, ᐱᐊᓂᐅᓪᓗ ᑐᖏᓕᐊᓂ ᐃᖏᕐᕋᓂᖓ ᑳᐱᑕᐃᒋᔭᐅᓪᓗᓂ ᓄᑖᒧᑦ ᐊᕐᕙᓂᐊᖅᑎᓄᑦ ᐅᒥᐊᒧᑦ, ᐊᑎᓕᒃ ᐹᓕᐊᓇᒥᒃ (Polynia), ᑎᖅᑎᑦᑐᒧᑦ ᐊᐅᓚᐅᑎᖏᑦ ᐊᐅᓚᓲᑦ.
1864–ᖑᑎᓪᓗᒍ, ᐱᐊᓂ ᐊᔪᐃᓐᓈᖑᓪᓗᓂ ᓄᖅᑲᖁᔭᐅᓕᖅᑐᒥᓂᖅ. ᐃᖅᑲᓇᐃᔭᖅᑎᑖᖑᒍᓐᓇᐃᓕᑦᓱᓂ. ᓯᒃᑳᓯᒃᑯᑦ ᐊᕐᕕᓕᕆᕕᖓ ᖃᑕᑦᓯᒪᓕᖅᓱᓂ, ᐊᒻᒪᓗ ᐱᐊᓂ ᑕᑎᑐᔪᒥᓂᐅᑦᓱᓂᑦᑕᐅᖅ, ᐃᑲᔪᖅᑐᐃᓴᕋᐃᑦᓱᓂ ᐃᓱᒪᒋᓕᖅᑕᑐᐃᓐᓇᒥᓂᒃ, ᐊᒥᓱᓂᓪᓗ ᐸᕐᓇᒐᔭᕈᒪᔭᒥᓂᒃ ᐃᓱᒪᒃᓴᖅᓯᐅᕈᑎᒃᓴᓂᒃ ᐃᓱᒪᒋᔭᖃᖅᐸᓂᖅᓱᓂ. ᑕᐃᒪᐃᓐᓂᖓᓄᑦ ᐃᓚᐅᒍᓐᓇᖅᓯᖃᑦᑕᖅᑐᒥᓂᖅ ᖃᐅᔨᓴᕆᐊᕐᓗᓂ ᐊᕐᕙᓂᐊᕐᕕᐅᓲᓂᒃ ᐊᐅᓚᑦᓯᒍᓯᖏᓪᓗ ᐅᓗᕆᐊᓇᖅᑐᒦᑎᑦᓯᖃᓯᐅᑎᕙᑦᓱᑎᒃ ᐱᓕᕆᕕᓐᓂᒃ ᑲᑉᐸᓂᓂᒃ. 1867–ᖑᑎᓪᓗᒍ, ᐸᓂᖓ ᔮᓂᑦ (Janet) ᑎᑎᕋᖅᑐᒥᓂᖅ ᐃᒫ, "ᐊᑖᑕᕈᓗᒐ ᐅᒥᐊᖅᑐᖃᑕᐅᒍᒪᒐᓗᐊᒧᑦ ᖃᓄᑐᐃᓐᓇᖅ ᐆᑦᑐᖅᓯᒪᓕᖅᑐᖅ ᑭᓯᐊᓂ ᐃᓘᓐᓇᑎᒃ ᐊᔪᕐᓇᖅᐳᑦ" ᓱᓕ, ᐱᐊᓂ ᐱᔪᓐᓇᐸᑦᑐᒥᓂᖅ ᐊᑐᕆᐊᖅᑕᒥᓂᒃ, ᐃᓄᑐᖃᕈᖅᑐᒥᓂᐅᑦᓱᓂᓗ. ᑐᖁᔪᒥᓂᖅ ᖃᕆᑕᖓᓃᑦᑐᒥᒃ ᓯᒻᒥᐅᔾᔨᔪᖃᕐᓂᕐᒪᑦ ᕕᐅᕝᕗᐊᓕᐅᑎᓪᓗᒍ 1892–ᒥ ᐊᐴᑏᓐᒥ (Aberdeen), ᑕᖅᑮᑦ ᐊᕐᕕᓂᓖᑦ ᑭᖑᓂᖓᒍᑦ ᓄᓕᐊᖓ ᒫᒡᒍᕋᑦ ᑐᖁᔪᒥᓂᐅᑎᓪᓗᒍ.
ᑕᑯᒍᒃ : ᔮᓂᑦ ᐱᐊᓂ ᕌᔅᒥᑦᑐᖅ ᐅᖃᓕᒫᒐᖅ, ed., This Distant and Unsurveyed Country, 219.