ᐅᕙᓃᑦᑐᑎᑦ : ᐊᖏᕐᕋᖅ » ᒪᒃᓕᐊᓚᓐ (McLellan)
ᒪᒃᓕᐊᓚᓐ (McLellan)
ᒪᒃᓕᐊᓚᓐ ᒥᐊᓕᒐᐃᑦ ᐊᕐᕕᓂᐊᖅᑎᖏᑕ ᐅᒥᐊᕐᔪᐊᒥᓂᖓᑦ ᐃᓂᖃᖅᓱᓂ ᓂᐅ ᓚᓐᑕᓐᒥ, ᑲᓂᐊᒃᑎᑲᒥ (New London, Connecticut). ᐱᖓᓲᔪᖅᑐᐃᕋᖅᓱᓂ ᐅᑭᐅᖅᑕᖅᑐᓕᐊᖅᑐᒥᓂᖅ ᐊᑯᓐᓂᖏᓐᓂ 1846 ᐊᒻᒪᓗ 1852. ᖁᓕᓪᓗ ᒪᕐᕉᓪᓗ ᐅᒥᐊᕐᒥᐅᑕᐃᑦ ᓯᕗᓪᓕᖅᐹᒥᓃᑦ ᖃᓪᓗᓈᖑᓪᓗᑎᒃ ᐱᔮᕆᓪᓗᑎᒃ ᐅᑮᔪᒥᓃᑦ ᐸᓐᓂᖅᑑᑉ ᑲᖏᖅᓱᐊᓗᐊᓂ.
1851–ᖑᑎᓪᓗᒍ, ᐃᖅᑲᓇᐃᔭᖅᑎᖁᑎᖏᑦ ᒪᒃᓕᐊᓚᐅᑉ ᐊᕐᕙᓂᖏᑦᑐᑦ ᐸᓐᓂᖅᑑᑉ ᑲᖏᖅᓱᐊᓗᐊᓂ. ᐃᓄᒻᒧᑦ ᐅᖃᐅᔾᔭᒥᓃᑦ ᑎᑭᓐᓇᓵᓗᐊᕐᓂᕆᐊᖏᑦ, ᐊᕐᕖᑦ ᐊᒥᒐᕐᓂᖏᑦᑐᑦ ᓯᑯ ᓱᓕ ᐃᔾᔪᓗᐊᖅᑎᓪᓗᒍ ᖃᓪᓗᓈᑦ ᐅᒥᐊᒥᓐᓂᒃ ᐳᓚᑎᑦᓯᒐᓱᐊᕋᔭᕐᓂᕈᑎᒃ. ᒪᒃᓕᐊᓚᓐ ᑳᐱᑕᐃᖓ, ᐅᐃᓕᐊᒻ ᖁᐊᐃᓪ (William Quayle), ᐅᑮᒍᓐᓇᖅᑐᖃᕐᒪᖔᖅ ᐊᐱᕆᔪᒥᓂᖅ ᖃᖏᖅᓱᐊᓗᐊᓂ ᐸᓐᓂᖅᑑᑉ. ᐊᕐᕙᒐᓱᐊᕐᕈᒫᕐᒪᑕ ᐅᐱᕐᖓᓵᖑᓕᖅᐸᑦ, ᐅᑎᕋᔭᕐᓂᕋᖅᓱᓂ ᒪᒃᓕᐊᓚᒃᑯᑦ ᐊᐃᓗᓂᒋᑦ ᐊᖑᑏᑦ ᐊᐅᔭᖅᐸᑦ. ᖁᓕᓪᓗ ᒪᕐᕈᓪᓗ ᐃᖅᑲᓇᐃᔭᖅᑎᐅᖃᑕᐅᔪᑦ ᐅᒥᐊᕐᔪᐊᒥ – ᐃᓚᒋᔭᐅᓪᓗᓂ ᐳᐊᑎᑭ ᐊᕐᕙᓂᐊᖅᑎ ᐊᒻᒪᓗ ᐅᒥᐊᕐᔪᐊᑉ ᓂᖅᓯᐅᖅᑎᖓ ᕿᕐᓈᖓᓪᓗᓂ ᒥᐊᓕᒐᒥᐅᖅ – ᕿᒪᑦᑕᐅᒍᒪᔪᒥᓂᒃ ᕿᒻᒥᖅᓲᒥ, ᕿᑭᖅᑕᖅ ᐸᓐᓂᖅᑑᑉ ᑲᖏᖅᓱᐊᓗᐊᑕ ᐅᐊᓐᓇᖓᑕ ᓯᔾᔭᖓᓂ.
ᑖᒃᑯᐊ ᐊᖑᑏᑦ ᐃᓪᓗᓕᐅᖅᑐᒥᓃᑦ ᕿᒻᒥᖅᓲᒥ, ᐅᔭᕋᕐᓂᒃ ᐊᑐᕐᓂᓴᐅᑦᓱᑎᒃ. ᐊᒻᒪᓂᖏᑦ ᐊᑭᓇᖏᑕ ᓯᒥᑦᑐᖅᑕᒥᓂᖏᑦ ᓄᓇᔭᓂᒃ ᐃᔾᔪᒥᓪᓗ, ᖁᓕᓕᐅᖅᓱᒍ ᕿᓯᓐᓂᒃ, ᐃᒐᓛᖃᓈᖅᓱᒍ ᐃᓇᓗᐊᒥᓂᕐᓂᒃ. ᑖᓐᓇ ᖁᓛ ᒥᖅᓱᖅᑕᐅᔪᑦᓴᐅᓂᖅᑯᖅ ᐊᕐᓇᓄᑦ ᐃᓄᓐᓄᑦ, ᕿᓰᑦ ᐃᓄᓐᓄᑦ ᐊᖑᑕᒥᓃᑦ ᕿᑦᓯᕆᔭᐅᒃᓱᑎᓪᓗ. ᐊᖑᑏᑦ ᐅᒥᐊᓕᑦᑕᐃᑦ ᒪᒃᓕᐊᓚᓐᒧᑦ ᐅᑮᑦᓯᐊᕙᑦᑐᒥᓃᑦ. ᑯᑦᑕᖓᔪᒥᓃᑦ ᓇᑦᓯᕋᓱᐊᕆᐊᖅ, ᑭᓯᐊᓂ ᑕᐅᖅᓰᖃᑎᖃᖃᑦᑕᖅᑐᒥᓃᑦ ᐃᓄᓐᓂᒃ ᓂᕐᔪᑎᑦ ᓂᕿᖏᓐᓂᒃ. ᓄᖑᕈᑎᒐᒥᒃ ᑕᐅᖅᓯᐅᑎᑦᓴᒥᓐᓂᒃ, ᐃᓄᓐᓄᑦ ᓂᕆᒃᑳᖑᐃᓐᓇᐸᑦᑐᒥᓃᑦ. ᑭᐊᖃᕐᓂᐊᕐᒪᑦ ᐃᓪᓗᖓᑦ, ᐃᑯᐊᓚᑦᓯᕙᑦᑐᒥᓃᑦ ᐊᕐᕕᐅᑉ ᓴᐅᓂᒥᓂᖏᓐᓂᒃ, ᐃᓄᓐᓄᑦ ᐃᑲᔪᖅᑕᐅᓪᓗᑎᒃ ᐃᓪᓗᒧᑦ ᓇᔪᖅᑕᖓᓅᕈᔾᔭᐅᕙᑦᑐᒥᓃᑦ ᕿᒧᑦᓯᒃᑯᑦ. ᐅᐱᕐᖓᓵᕈᕐᒪᓐ, ᐊᕐᕙᑦᑐᒥᓃᑦ ᖁᓕᓪᓗ ᓯᑕᒪᐅᔪᙱᒐᖅᑐᓂᒃ, ᑕᐸᐃᕐᓇᖅᑐᖅ ᐊᒥᓲᓂᖏᑦ ᐊᕐᕙᑦᑕᒥᓂᖏᑕ ᐃᓱᒪᒋᓪᓗᒋᑦ ᐊᐅᔭᒃᑯᑦ ᐊᕐᕙᓐᓂᐊᕆᐊᖅᑐᑦ ᐅᑎᕈᔾᔨᑦᑕᓚᐅᕈᑎᒃ ᒪᕐᕉᓐᓂᒃ ᐱᖓᓱᓂᓪᓘᓐᓃᑦ ᐊᑭᑐᑦᓴᐸᑦᑐᒥᓂᐅᑎᓪᓗᒋᑦ. ᐃᓗᐃᑦᑑᑕᐅᓈᖅᓯᒪᔪᑦ ᑖᒃᑯᓇᖓᑦ ᐊᕐᕕᒥᓂᕐᓂ ᐊᑭᖃᕋᔭᖅᑐᑦ, ᐊᑭᓕᐅᖅᑕᐅᓯᒪᓂᖓ ᒪᓕᓪᓗᒍ, $72,000–ᓂᒃ ᐊᑭᖃᕋᔭᖅᑐᑦ 1852–ᒥ ᒥᐊᓕᒐᐃᑦ ᑮᓇᐅᔭᖓᑦ ᑕᐃᒪᓐᓇ ᐊᑭᖃᖅᑎᓪᓗᒋᑦ, ᑕᐃᒃᓱᒨᓇ $250–ᑖᓚ ᓈᒻᒪᐸᑦᑐᒥᓂᖅ ᐅᑭᐅᓕᒫᖅ ᐃᓅᓇᓱᐊᕈᑎᒋᒋᐊᖓ ᑮᓇᐅᔾᔭᒃᓴᐅᑕᐅᓗᓂ ᐊᖑᒻᒧᑦ ᐃᓄᑐᐊᒧᑦ ᓂᐅ ᔪᐊᒃ ᓯᑎᒥ (New York City).
ᐅᒥᐊᕐᔪᐊᖅ ᒪᒃᓕᐊᓚᓐ ᐅᑎᕐᕕᖃᕐᓂᖏᑦᑐᖅ ᑕᐃᒃᑯᓇᖓᑦ ᐊᖑᑎᓂᒃ ᕿᒻᒥᖅᓲᒥ. ᓱᕋᑦᑐᒥᓂᖅ ᓯᖁᐃᑦ ᐃᒻᒧᐊᓐᓂ ᕿᑭᖅᑖᓘᑉ ᐊᑯᑭᑦᑐᐃᓪᓗ ᓄᓇᖓᑕ ᐃᑭᕋᓴᖓᓂ. ᓯᑦᑕᕝᕙ 4–ᒥ 1852–ᖑᑎᓪᓗᒍ, ᐊᐅᔭᐅᒍᓐᓃᓕᖅᑎᓪᓗᒍ, ᐊᖑᑏᑦ ᖁᓕᓪᓗ ᒪᕐᕈᓪᓗ ᐊᕐᕕᑦᑕᒥᓂᕐᒥᓐᓂᒃ ᐃᑭᐅᕋᐃᖃᓯᐅᑎᑦᓱᑎᒃ ᐊᐅᓪᓚᐸᓪᓕᐊᔪᒧᑦ ᐃᑭᔪᒥᓃᑦ ᓯᒃᑳᓯᒃᑯᑦ ᐅᒥᐊᕐᔪᐊᖓᓄᑦ, ᑐᓚᑦᑕᕐᕕᒋᕙᑦᑕᖓᓐᓅᕈᔾᔭᐅᓪᓗᑎᒃ. ᑖᒃᑯᐊ ᐊᖑᑏᑦ ᓱᖅᑯᐃᖅᓯᑎᑦᓯᔪᒥᓃᑦ ᖃᓪᓗᓈᓂᒃ ᖁᕕᐊᓱᓪᓗᑎᒃ ᐃᓅᓯᖃᕈᓐᓇᕆᐊᖏᑦ ᐊᑲᐅᔪᒦᓪᓗᑎᓪᓗ ᑕᒫᓂ ᐃᓚᖓᓂ ᐅᑭᐅᖅᑕᖅᑑᑉ. ᑕᐃᒃᑯᐊᓖᓛᒃ ᐱᖓᓱᑦ ᕿᒪᑦᑕᐅᒍᒪᔪᒥᓃᑦ – ᔪᐊᔾ ᑕᐃᓴᓐ, ᓯᓐᓂ ᐸᑎᖕᑕᓐ, ᐊᒻᒪᓗ ᐅᐃᓕᐊᒻ ᓯᑎᐅᕆ – ᐅᑮᓕᖅᑭᑦᑖᖃᓐᓂᕈᒪᔪᒥᓃᑦ ᐸᓐᓂᖅᑑᑉ ᑲᖏᖅᓱᐊᓗᐊᓂ. 1860–ᐅᑎᓪᓗᒍ, ᓯᑎᐅᕆ ᐅᖃᖅᑐᒥᓂᖅ "ᖁᕕᐊᒋᓚᐅᖅᓯᒪᖏᑦᑐᖓ ᓇᒻᒥᓂᖅ ᐊᓯᐊᒍᑦ ᑕᐃᒫᒃ" ᐃᓅᓇᓱᐊᕐᓂᕐᒥᒃ ᐃᓄᐃᑦ ᐊᖁᕐᖓᕐᓂ, ᐅᖃᖅᑐᒥᓂᐅᑦᓱᓂᓗ "ᒫᓐᓇᑕᒡᒐ ᒥᑭᒐᖅᑐᕈᒪᔪᖓ ᓇᑦᓯᒥᓂᕐᒥᒃ." ᑕᒪᓐᓇ ᑐᓴᖅᑕᐅᓇᓵᕐᓂᖏᑦᑐᖅ ᐊᕐᕙᓂᐊᖅᑎᓄᑦ ᐅᑮᒍᑎᒃ ᐸᓐᓂᖅᑑᑉ ᑲᖏᖅᓱᐊᓗᐊᓂ, ᑕᑎᖃᕈᓐᓇᕆᐊᖅ ᐃᑲᔪᖅᑕᐅᒍᓐᓇᕆᐊᕐᓗ ᐃᓄᓐᓄᑦ ᓄᓇᓕᓐᓄᑦ ᑮᓇᐅᔾᔭᓴᑦᓯᐊᕐᓗᑎᓪᓗ. ᒪᓕᑦᓱᒍ ᑲᔪᓯᑦᓯᐊᕐᓂᒥᓂᖓ ᒪᒃᓕᐊᓚᓐ ᐅᒥᐊᓕᑦᑕᖏᑕ, ᐊᓯᖏᑦ ᒥᐊᓕᒐᒥᐅᑦ ᓯᒃᑳᑦᓯᒥᐅᓪᓗ ᑳᐱᑕᐃᖏᑦ ᐱᔮᕆᓪᓗᑎᒃ ᓯᒃᑯᔾᔭᐅᑎᑦᓯᖃᑦᑕᓕᖅᑐᒥᓃᑦ ᐅᒥᐊᕐᔪᐊᒥᓐᓂᒃ, ᐊᖏᓪᓕᕙᓪᓕᐊᑎᑐᐃᓐᓇᓕᖅᓱᒍ ᐅᖃᖃᑎᖃᖃᑦᑕᕐᓂᒃ ᐃᓅᖃᑎᖃᕐᓂᖅ ᑕᑎᑦᓴᕐᓂᕐᓗ ᐃᓄᓐᓂᒃ.
ᑕᑯᒍᒃ : ᓯᓐᓂ ᐸᑎᖕᑕᓐ ᑰᓪᐱᒦᑦᓱᓂ, ᐅᓂᒃᑳᓕᐊᒥᓂᖅ ᑕᐃᔭᖅ, For Oil and Buggy Whips, 96.
ᑕᑯᒍᒃ : ᐅᐃᓕᐊᒻ ᓯᑎᐅᕆ ᕼᐋᓪᒦᑦᑐᖅ ᐊᑕᒫᑦ ᑎᑎᕋᖅᑕᐅᖃᑦᑕᖅᑐᒥᓃᑦ ᕕᐅᕝᕗᐊᕆᒥ 1860 ᑎᑭᑦᓱᒍ ᒫᑦᓯ 1860. ᓄᐊᑕᐅᓯᒪᔪᓂ, Smithsonian National Museum of American History Archives.