ᐅᕙᓃᑦᑐᑎᑦ : ᐊᖏᕐᕋᖅ » ᑕᐃᔅᓱᒪᓂ: ᐅᓪᓗᖅ ᐊᑕᐅᓯᖅ ᐅᑭᐅᖅᑕᖅᑑᑉ ᓯᕗᓂᕆᓯᒪᔭᖓᓂ
ᑕᐃᔅᓱᒪᓂ: ᐅᓪᓗᖅ ᐊᑕᐅᓯᖅ ᐅᑭᐅᖅᑕᖅᑑᑉ ᓯᕗᓂᕆᓯᒪᔭᖓᓂ
ᒪᐃ 26, 1968 - ᐋᓪᕗᑦ ᑭᕕᔪᖅ ᐊᑯᑭᑦᑐᑦ ᐊᒪᖓᓂ
ᑭᐊᓐ ᕼᐊᐳ
ᐊᐱᕆᔪᖃᕐᓂᖅᑲᓐ ᐃᓄᐃᑦ ᐃᓐᓇᑐᖃᖁᑎᖏᓐᓂᒃ ᓇᓕᐊᖑᓐᓂᕐᒪᖔᑕ ᐅᒥᐊᕐᔪᐊᑦ ᖃᐅᔨᒪᔭᐅᓂᖅᐹᖑᔪᑦ ᑲᓇᑕᐅᑉ ᑲᓇᓐᓇᖅᐸᓯᖓᓂ ᐅᑭᐅᖅᑕᖅᑐᒥ, ᑭᐅᒐᔭᖅᑐᔅᓴᐅᔪᑦ ᓇᔅᑰᐱ ᐊᒻᒪᓗ ᓰᑏᕼᐊᐅ. ᑭᓯᐊᓂᓕ ᐅᐊᑦᑎᐊᕈᒃᑲᓂᐊᕐᔪᑐᐃᓐᓇᖅ ᓯᕗᓪᓕᑲᓐᓂᒥᓃᑦ ᐊᔾᔨᒋᓐᖏᒻᒪᕆᑦᑕᖓᓂᒃ ᑭᐅᒐᔭᖅᑐᒥᓃᑦ, ᑕᐃᓐᓇ ᑕᐃᔭᐅᒐᔭᖅᑐᒥᓂᐅᔪᔅᓴᐅᔪᖅ ᐅᒥᐊᕐᔪᐊᕋᓛᕈᓗᒃ ᓯᒃᑳᑦᑎᒃᑯᑦ ᓄᓇᒐᓃᓐᖔᖅᑐᒥᓂᖅ, ᐊᑎᓕᒃ ᐋᓪᕗᑦ.
ᓴᓇᔭᒥᓂᖅ 1889ᒥ ᐃᓐᖓᓚᒥ ᐋᓐᓂᐊᕕᐅᓗᓂ ᐅᒥᐊᕐᔪᐊᖑᓂᐊᕐᖓᓐ ᑯᐃᓐ ᓄᓇᖓᓂ ᑲᒪᔨᐅᓂᐊᕐᓗᓂ ᐃᑭᕐᒥ ᐃᖃᓗᒐᓱᑦᑎᓂᒃ, ᐊᑭᓕᖅᑕᒥᓂᐅᓪᓗᓂ ᑭᓇᐅᒻᒪᖔᕐᒥᒃ ᖃᐅᔨᔭᐅᒍᒪᓐᖏᑦᑐᒧᓐ - ᐃᓱᒪᒋᔭᐅᓲᖅ ᑯᐃᓐ ᕕᒃᑐᐊᕆᐊᐅᑉ ᐊᑭᓕᖅᑕᒥᓂᕆᒋᐊᖓ - ᑕᐃᓐᓇ ᐋᓪᕗᑦ ᑎᖏᕐᕋᐅᑕᓕᐅᓪᓗᓂ ᑎᓴᑦᑕᒥ ᕿᔪᒻᒥ ᓴᓇᓯᒪᔪᒥᓂᖅ. ᓯᕗᖓᓂ ᑎᑎᖅᑲᓕᒥᓂᖅ “ᐋᓐᓂᐊᔪᓂᒃ ᒪᒥᓴᐃᓗᓂ” ᐊᒻᒪᓗ “ᒍᑎᐅᑉ ᐅᖃᐅᓯᖓ ᐅᖃᐅᓯᐅᓕ” ᐊᒻᒪᓗ ᐊᑰᑎᖓᓂ ᑎᑎᖅᑲᖅᑕᖃᕐᓂᕐᒥᔪᖅ ᐸᐃᑉᐹᖁᑎᓃᓐᖔᖅᑐᓂᒃ, “ᐅᖃᖅᐳᕐᓗ, ᒪᓕᓐᖓ ᐃᖃᓗᒐᓱᑦᑎᕈᕐᓂᐊᕋᔅᓯ ᐃᓄᓐᓂᒃ.” ᑕᐃᒪᓕ ᐊᕐᕌᒍᐃᑦ ᐊᓂᒍᖅᐸᓪᓕᐊᑎᓪᓗᒋᑦ, ᑖᓐᓇ ᐅᒥᐊᕐᔪᐊᖅ ᐱᖃᑕᐅᓐᓂᖅᐳᖅ ᐊᒥᓱᓄᑦ ᐱᒻᒪᕆᐅᔪᓄᑦ ᐊᑎᕐᓄᑦ ᓱᔪᒥᓂᐅᔪᓄᓪᓗ ᖃᐅᔨᒪᔭᐅᔪᓂ ᑲᓇᑕᐅᑉ ᑲᓇᓐᓇᖓᑕ ᐅᑭᐅᖅᑕᖅᑐᖓᓂ.
1892ᒥ ᑲᓇᑕᐅᑉ ᑯᐃᓐᓗ ᓄᓇᖓᑕ ᐊᑯᓐᓂᖓᓃᑦᑐᒥᒃ ᐃᒪᕐᔪᐊᕐᒥᒃ ᐃᑳᕆᐅᓚᐅᖅᓯᒪᔪᖅ, ᐅᓇᓕᒃᑯᑦ ᓘᑦᑖᖓᓂᒃ ᐅᓯᓪᓗᓂ, ᕕᐅᐳᕆᐊᑦ ᒍᕆᐊᓐᐱᐊᓪᒥᑦ, ᑕᐃᓐᓇᐃᓛᒃ ᖃᐅᔨᒪᔭᒻᒪᕆᐅᓕᓚᐅᖅᓯᒪᔪᖅ ᐊᔪᕆᖅᓱᐃᔨᒃᑯᓐᓄᑦ ᓘᑦᑖᖑᓪᓗᓂ ᓛᐸᑐᐊᒥ. ᑭᓯᐊᓂᓕ ᐊᕐᕌᒍᑦ ᐊᒥᓲᓐᖏᑦᑐᑦ ᓈᑎᓪᓗᒋᑦ ᐊᓯᐊᓂᒃ ᐅᒥᐊᕐᔪᐊᑖᕐᓂᕐᖓᑕ ᑕᐃᓐᓇᓗ ᑖᕗᖓ ᑯᐃᓐ ᓄᓇᖓᑕ ᐅᐊᓐᓇᖓᓄᑦ ᐃᒪᕕᒻᒧ ᐅᑎᖅᑐᒥᓂᐅᓪᓗᓂ.
1902ᒥᓕ ᑕᓐᑎᒥᐅᑕᐃᑦ ᐹᓐᔅ ᕙᐃ ᑳᑉᐸᓂᖓᓐ ᑖᔅᓱᒥᖓ ᐅᒥᐊᕐᔪᐊᕐᒥᒃ ᓂᐅᕕᖅᑐᒥᓃᑦ ᐊᔪᕆᖅᓱᐃᕕᒃᑯᓐᓂᑦ, ᐊᑐᖅᑕᐅᒍᒪᓪᓗᓂ ᐊᕝᕙᒐᓱᐊᕈᑕᐅᓂᐊᕐᓗᓂ ᑕᐅᖅᓯᕋᐅᑎᓂᕐᒧᓪᓗ ᐊᑐᖅᑕᐅᓂᐊᕐᓗᓂ ᕿᑭᖅᑖᓘᑉ ᐅᐊᓐᓇᖅᐸᓯᖓᓂ. ᐊᕐᕌᒍᒻᒥᑎᓪᓗᒍ, ᐊᖏᔪᒃᑳᖃᖅᑐᓂ ᐅᑭᐅᖅᑕᖅᑐᒦᓚᐅᖅᓯᒪᔪᒻᒪᕆᒻᒥᒃ ᐊᕝᕙᒐᓱᐊᖅᑎᒥᒃ ᔭᐃᒻᔅ ᒪᑦᔅ - ᔨᒥ ᒫᑦᓯ ᐃᓄᓐᓄᑦ ᖃᐅᔨᒪᔭᒥᓂᖅ - ᑖᓐᓇ ᐋᓪᕗᑦ ᑎᓂᔾᔪᐊᕕᒻᒧᓐ ᑐᓚᑦᑐᒥᓂᐅᕗᖅ ᐅᓯᓕᐅᔾᔨᓪᓗᓂᓗ ᐅᐃᓕᐊᑦ ᑎᕕᐊᓪᒥᑦ (ᓯᕗᑎᔅᓴᖅ) ᐊᒻᒪᓗ ᐃᓄᒋᐊᑲᓪᓚᓐᓂᒃ ᐃᓄᓐᓂᒃ ᐃᓚᒌᓂᒃ, ᐊᐅᓪᓚᖅᑐᒥᓂᐅᓪᓗᑎᒃ ᑕᑉᐸᐅᖓ ᖁᑦᑎᑦᑐᒧᓐ. ᓯᕗᓪᓕᐹᒥᓪᓕ ᐅᑭᐅᓪᓕᔪᒥᓃᑦ ᐃᐊᕆᒃ ᕼᐊᕗᒥ, ᐊᒻᒪᓗ ᐅᒥᐊᕐᔪᐊᖓᓐ ᐊᐅᓪᓛᖅᑕᐅᓕᕐᓂᕆᓪᓗᓂ ᐅᖅᑯᐊᓕᓂᖃᕐᓂᖅᓴᒧᓐ ᐅᓪᓗᒥ ᒥᑦᑎᒪᑕᓕᐅᓕᖅᑑᑉ ᑲᓇᓐᓇᑦᑎᐊᖓᓄᑦ, ᐊᑎᖅᑕᒥᓂᐅᓪᓗᓂ ᐋᓪᕗᑦ ᕙᐃ. ᐅᒥᐊᕐᔪᐊᖅ ᑕᑉᐹᓃᑦᑐᒥᓂᖅ 1907-ᕈᕋᓱᐊᕐᓂᖓᓄᑦ, ᐅᒥᐊᕐᔪᐊᕐᒥᐅᑕᖏᑦ ᐆᒪᔪᕋᓱᖃᑎᖃᖅᐸᑦᑐᑎᒃ ᐊᒻᒪᓗ ᑕᐅᖅᓯᕋᐅᑎᖃᑎᖃᖅᐸᑦᑐᑎᒃ ᐃᓄᓐᓂᒃ, ᐱᔭᒥᓂᕐᒥᓂᓪᓗ ᐊᐅᓪᓚᑎᑦᑎᕙᑦᑐᑎᒃ ᐊᖏᕐᕋᒧᓐ ᐊᓯᖏᓐᓂᒃ ᐊᕝᕙᒐᓲᑎᓂᒃ ᐊᑐᖅᑐᑎᒃ.
1908ᒥᓕ, ᒪᑦᔅ ᐋᓪᕗᑦᒥᑦ ᓂᐅᕕᖅᑐᒥᓂᖅ ᐊᒻᒪᓗ ᓂᐅᕕᐊᕆᓱᐊᕋᒥᐅᒃ ᐃᐸᕋᑦᑕᐅᑎᒋᔭᒥᓂᖓ ᐃᓚᒋᔭᐅᔾᔪᑎᑖᖔᖅᑐᓂ ᓄᑖᓄᑦ ᑮᓇᐅᔭᓕᐅᕋᓱᐊᖅᑎᓄᑦ, ᐋᓪᕗᑦ ᐊᕝᕙᒐᓱᐊᖅᑏᑦ ᓕᒪᑎᑦ, ᓄᓇᓕᓐᓄᑦ ᐲᑕᕼᐃᐊᑦᒥ. ᑭᓯᐊᓂᓕ 1911ᒥ ᒪᑦᔅ ᐃᖅᑲᓇᐃᔭᕆᐊᖔᓕᕐᓂᒥᒻᒪᓐ ᐊᑭᑦᑐᕋᐅᑎᖃᑎᖏᓐᓄᑦ ᐊᒻᒪᓗ ᓄᑖᒥᒃ ᐅᒥᐊᕐᔪᐊᖅ ᐊᖏᔪᖅᑳᑖᖅᑐᒥᓂᐅᓪᓗᓂ, ᔮᓐ ᔪᕆᒥᒃ. ᑕᐃᓐᓇ ᐃᓄᓐᓄᑦ ᖃᐅᔨᒪᔭᐅᓚᐅᕐᒥᔪᖅ, ᐃᖅᑲᐅᒪᔭᐅᔪᖅ ᐊᑎᖓᒍᑦ ᓇᑯᖓᔪᖅ. 1912ᒥᓕ ᓇᑯᖓᔪᖅ ᐅᒥᐊᕐᔪᐊᕐᒥᒃ ᑖᕗᓐᖓᑎᑦᑎᔪᒥᓂᖅ ᓯᐱᔾᕘᒐᓐᒧᓐ ᐊᕝᕙᒐᓱᐊᖅᑐᓄᑦ ᑖᕙᓂ ᓯᕗᓪᓕᐅᒐᓱᒋᐊᖅᑐᖅᑐᓂ, ᐊᒻᒪᓗ ᕼᐊᑦᓴᓐ ᕙᐃᒨᖅᑕᓕᕐᓂᕆᕗᑦ ᐅᑭᐊᓪᓕᔪᒥᓂᐅᓪᓗᑎᒃ ᓇᐅᔮᓂ.
1914ᒥ ᑳᑉᑕᓐ ᕼᐃᐊᓐᓄᓕ ᑑᒃ ᒪᓐ ᑖᔅᓱᒥᖓ ᐅᒥᐊᕐᔪᐊᕐᒥᒃ ᓂᐅᕕᖅᑐᒥᓂᐅᕗᖅ ᓇᒻᒥᓂᖃᐅᑎᒥᓄᑦ ᐊᑐᕐᓂᐊᕋᒥᐅᒃ, ᐅᑭᐅᖅᑕᖅᑐᒥ ᒎᓗᓯᐅᕐᓂᕐᒧᓐ ᑲᑐᔾᔨᖃᑎᒌᑦ, ᑕᐃᒫ ᐊᑎᖃᕋᓗᐊᖅᑐᓂ, ᒥᖅᑯᓕᓐᓂᒃ ᐱᒐᓱᐊᖅᑎᒥᓃᑦ. ᑕᐃᒪᐃᑦᑐᖅᔫᔮᖅᑐᖅ ᑕᐃᒃᑯᐊᓕᒫᑦᑎᐊᑦ ᐱᒻᒪᕆᐸᓗᒥᓃᑦ ᐋᓪᕗᑦᒥᑦᑐᒥᓃᑦ ᐃᓄᑦᑎᑐᑦ ᐊᑎᓖᓐᓇᑦᑎᐊᖑᓐᓂᕐᖓᑕ, ᐊᒻᒪᓗ ᒪᓐ ᐊᓯᐊᒎᖅᑕᐅᓐᓂᕋᓂ. ᐊᑎᓕᒥᓂᖅ ᑲᐱᑕᐃᓐᑯᓗᒃ. ᒫᓐ ᐋᓪᕗᑦᒥᑦ ᐊᐅᓚᐅᑎᓕᖅᓯᔪᒥᓂᖅ. ᐋᓪᕗᑦ ᐱᔭᔅᓴᓕᒻᒪᕆᒥᓂᐊᓗᒃ ᒪᓐᒧᓐ ᑲᒪᒋᔭᐅᑎᓪᓗᒍ, ᓯᑯᐊᓗᓐᓂᒃ ᐊᓂᒍᐃᕙᑦᑐᒥᓂᖅ ᓄᓇᑖᕋᓱᐊᖅᑎᓪᓗᒍ ᐊᒻᒪᓗ ᓄᓇᒥᓂᒃ ᑎᑭᑕᐅᑎᑦᑎᖃᑦᑕᕋᓱᐊᖅᑎᓪᓗᒍ ᓱᓇᒃᑯᑖᓂᒃ ᕙᑕᓐ ᐳᐃᓐᑦᒥ ᐊᒻᒪᓗ ᑭᖑᓂᐊᒍᑦ ᓴᓪᓖᑦ ᕿᑭᖅᑕᖓᓂ. ᑕᐃᓐᓇ ᑭᖑᓪᓕᖅ ᓄᓇᖓ, ᓯᕗᑎᔅᓴᐅᑉ ᐊᐅᓚᑕᖓ, ᐃᖏᕐᕋᑦᑎᐊᕈᓐᓇᓚᐅᓐᖏᑦᑐᖅ ᐊᒻᒪᓗ 1918ᒥ, ᒪᓐ ᐊᐅᓪᓛᑎᑦᑎᔪᒥᓂᖅ ᓯᕗᑎᔅᓴᕐᒥᒃ ᐃᓚᖏᓐᓂᓪᓗ ᐅᑎᖅᑎᑦᑐᒋᑦ ᑎᓂᔾᔪᐊᕕᒻᒧᓐ, ᐱᒋᐊᖅᑎᓪᓗᑎᒃ ᐅᓱᐊᓗᒻᒥ ᑕᐅᖅᓯᕋᐅᑎᕕᒻᒥ ᓄᓇᒥᓂᒃ ᑭᖑᓪᓕᖅᐹᒥᒃ.
1919ᒥᓕ, ᒪᓐ ᐊᑭᑦᑐᕋᐅᑎᖃᑎᖓᑕ ᐱᖁᑎᖏᓐᓂᒃ ᓂᐅᕕᖅᑐᒥᓂᖅ, ᕘᓐᔭᐃᒥᑦ, ᐅᑭᐅᖅᑕᖅᑐᒥ ᑕᐅᖅᓯᕋᐅᑎᕙᑦᑐᐃᑦ ᐊᐅᓚᑕᑐᐊᕆᓕᕋᓱᐊᖅᑐᒋᑦ. ᑕᐃᑲᓂᔅᓴᐃᓐᓇᖅ ᐊᕐᕌᒍᒥ ᑯᔭᓈᖅᑐᐃᓐᓇᓂᕐᒥᔪᖅ ᐊᓯᐊᓂᒃ ᐊᑭᑦᑐᕋᐅᑎᖃᑎᒥᓂᒃ, ᕌᕗᑦ ᔭᐃᓐᔅᒥᑦ, ᐅᑭᐅᖅᑕᖅᑐᒥ, ᐅᖃᐅᑎᖅᑳᓚᐅᖅᑐᓂᐅᒃ ᖃᓪᓗᓈᓂ ᑮᓇᐅᔭᖃᖅᑎᑦᑎᔨᖓᑕ ᓇᒻᒥᓂᖃᐅᑎᖓ ᑲᑕᑦᑐᒥᓂᐅᓂᕋᖅᑐᒍ. ᔨᒥ ᐃᑦᑑᓚᐅᖅᑐᖅ ᐅᕙᓐᓄᑦ ᐅᓂᒃᑳᓚᐅᖅᓯᒪᔪᖅ ᓂᓐᖓᐅᑎᓂᒥᓂᐊᓗᖏᓐᓂᒃ ᐋᓪᕗᑦᒥ ᑕᑯᓐᓈᑎᓪᓗᒍ, ᔭᐃᓐᔅ ᖃᓪᓗᓈᓄ ᐅᓯᔭᐅᒍᒪᓪᓗᓂ ᐊᖏᖃᑎᖃᕈᓐᓇᐃᓕᓐᓂᕐᖓᓐ. ᑕᐃᑲᓂ ᐊᐅᔭᐅᑎᓪᓗᒍ, ᒪᓐ ᐃᖅᑲᓇᐃᔭᖅᑎᑦᑎᔪᒥᓂᖅ ᐅᒥᐊᕐᔪᐊᕐᒥᐅᑕᐅᓂᐊᖅᑐᒥᒃ ᑎᓂᔾᔪᐊᕕᒻᒥᑦ ᐊᐅᓪᓚᕐᓂᐊᓕᖅᑎᓪᓗᒋᑦ ᐅᑭᐅᖅᑕᖅᑑᑉ ᐅᐊᓐᓇᖓᓄᑦ. ᑕᐃᓐᓇᐅᓚᐅᖅᐳᖅ ᖃᐅᔨᒪᔭᒻᒪᕆᒃ ᑲᓇᔪᖅ, ᐊᕝᕙᒐᓱᐊᖅᑎᓄᑦ ᑕᐅᖅᓯᕋᐅᑎᔨᓄᓪᓗ ᐊᑎᖃᖅᑎᑕᒥᓂᖅ ᒪᐃᒃ. ᐃᕐᓂᒥᓂᒃ ᓱᕈᕐᒥᒃ ᓇᔅᓴᖅᑐᓂ, ᐊᑉᐸᓕᐊᓗᒻᒥᑦ ᑕᑉᐸᐅᖓᖅᑐᒥᓂᖅ. ᑕᐃᒪᓕ ᐋᓪᕗᑦ ᐊᐅᓪᓚᕐᖓᓐ ᐹᓐ ᕙᐃᒥᑦ, ᒪᐃᒃᑯᒃ ᐊᑉᐸᓕᐊᓗᒃᑯᒃ ᓯᒃᑳᑦᑎᒃᑯᑦ ᓄᓇᖓᓅᖅᑐᒥᓃᒃ ᐊᒻᒪᓗ ᐅᑭᐅᓕᒫᖅ ᐲᑕᕼᐃᐊᑦᒦᑦᑐᒥᓂᐅᓪᓗᑎᒃ.
1922ᒥᓕ ᑎᓂᔾᔪᐊᕕᒻᒥ, ᐋᓪᕗᑦ ᐱᐅᓕᑦᑎᓚᐅᕐᒥᔪᖅ ᐊᓯᐊᑕ ᐅᒥᐊᕐᔪᐊᑉ ᐅᒥᐊᕐᔪᐊᕐᒥᐅᑕᖏᓐᓂᒃ, ᐃᓲᓐᔨᐊᓐᒥᑦ, ᑕᐃᓐᓇ ᐅᒥᐊᕐᔪᐊᖅ ᐳᑦᑕᓂᓕᒫᖓ ᐃᑭᑦᑐᐊᓘᓚᐅᖅᑎᓪᓗᒍ ᕿᑭᖅᑕᓂ ᐊᕝᕙᒐᓱᐊᖅᑏᑦ ᓄᓇᖓᓂ. ᑭᓯᐊᓂᓕ ᑕᐃᓐᓇ ᐊᕐᕌᒍᖅ ᓇᓗᓇᐃᖅᓯᓂᖅᑯᖅ ᑕᐃᒪᐃᑦᑐᓕᕆᔨᐅᓂᖓᑕ ᐃᓱᓕᓐᓂᖓᓂᒃ ᑖᔅᓱᒧᖓ ᐊᑦᑕᓇᓐᖏᑦᑐᕋᓛᒧᓐ ᐅᒥᐊᕐᔪᐊᕐᒧᓪ. ᒪᓐ ᐅᑭᐅᖅᑕᖅᑐᒥᑦ ᐃᓄᑑᔾᔨᓗᓂ ᑕᐅᖅᓯᕋᖅᑐᓂᒃ ᐊᐅᓚᑦᑎᒍᒪᓪᓗᓂ ᐸᕐᓈᕆᓯᒪᔭᖓ ᐃᖏᕐᕋᑎᐊᕐᓂᖏᒻᒪᓐ. ᑕᐃᒫᓪᓕ ᐃᓚᒋᔭᐅᔾᔪᑎᖏᑦ ᓂᐅᕕᐊᔅᓴᒥᓂᖏᑦ ᑳᑉᐸᓂᒃᑯᓐᓄᑦ $28,000ᓄᑦ.
ᐊᕐᕌᒍᒻᒥᑎᓪᓗᒍ, ᐋᓪᕗᑦ ᑎᖏᕐᕋᐅᑦᑎᔭᖅᑐᓂ ᐃᖏᕐᕋᓯᓐᓂᕐᒥᔫᒐᓗᐊᖅ ᐲᑕᕼᐃᐊᑦᒥᑦ ᑳᑉᐸᓂᒃᑯᑦ ᓴᐃᒻᒪᑎᖓᓂᒃ ᓴᐃᒻᒪᓯᔭᖅᑐᓂ. ᑳᑉᑕᓐ ᔮ ᑕᐃᓗ, ᑕᐃᓐᓇᐃᓛᒃ ᐃᓲᓐᓂᐊᓐ ᑳᑉᑕᒥᓂᖓ 1922ᒥ, ᐊᖏᔪᖅᑳᕆᔭᐅᓪᓗᓂ. ᑕᐃᓐᓇᑦᑕᐅᖅ ᐃᓄᑦᑎᑐᑦ ᐊᑎᖃᕐᓂᕐᒥᔪᖅ - ᐃᕐᖑᑕᖅ. ᑭᓯᐊᓂᓕ ᐅᒥᐊᕐᔪᐊᖅ ᐅᑭᐅᖅᑕᖅᑐᒧᓐ ᑐᑭᓐᓂᖏᑦᑐᖅ. ᐊᓪᓛᑦ ᓯᒃᑳᑦᑎᒃᑯᑦ ᓄᓇᖓ ᑕᑯᔅᓴᐅᖏᓐᓇᒻᒪᕆᑦᑐᒥᓂᖅ. ᒧᐊᕋᐃ ᐴᑦᒥ ᐊᓂᒍᕋᓱᐊᖅᑐᓂ, ᑕᐃᓐᓇ ᐋᓪᕗᑦ ᐃᒃᑲᕆᑦᑐᒥᓂᐅᒻᒪᓐ ᐃᖅᑲᕐᕈᒧᓐ ᑭᕕᕙᓪᓕᐊᓕᖅᑐᒥᓂᐅᓪᓗᓂᓗ. ᑳᑉᑕᓐ ᑕᐃᓗ ᑭᖑᓂᐊᒍᖅ ᐅᖃᑦᑎᐊᒻᒪᕆᑦᑐᒥᓂᖅ ᓄᓇᒥ ᐊᔪᑦᑕᖅᑐᓂᒃ ᑕᑯᓐᓈᖅᑐᐊᓗᑐᐃᓐᓇᐅᓕᕐᓂᕋᒥ!
ᑕᐃᒪᓕ ᐋᓪᕗᑦ ᓴᓇᔭᐅᒋᐊᓕᕐᓂᕆᕗᖅ ᓂᐅᕕᐊᕆᔭᐅᓪᓗᓂᓗ ᑖᒻᓴᓐᑯᓐᓄᑦ, ᑕᐃᒃᑯᐊ ᐃᓚᒌᑦ ᐊᐅᓪᓚᖅᑎᑕᐅᖃᑦᑕᖅᑐᓂᒃ ᑲᒪᔩᑦ ᐱᐊᕈ ᕿᑭᖅᑕᖏᓐᓂ, ᑕᐅᓇᓂᓗ ᐅᓯᑲᖅᑕᖅᑎᒥᓂᐅᓪᓗᓂ ᐃᖃᓗᒐᓲᑕᐅᓪᓗᓂᓗ. ᐊᕐᕌᒍᓪᓕ 40 ᐅᖓᑖᓃᑦᑐᑦ ᐊᓂᒍᖅᑎᓪᓗᒋᑦ ᐅᓐᓄᕈᓘᓕᖅᑎᓪᓗᒍ ᒪᐃ 26, 1968ᒥ ᐊᓄᕌᓕᐅᔾᔭᒥᓂᐅᒻᒪᓐ ᕿᑭᖅᑖᓘᑉ ᐊᑯᑭᑦᑑᓪᓗ ᐊᑯᓐᓂᖓᓂ ᑕᒫᓂᐸᓗᒃ 120 ᒪᐃᔪᔅᓂ ᐅᖓᓯᓐᓂᓕᒻᒥ ᑲᐃᑉ ᑎᐊᓱᓘᓴᓐ ᐊᑯᑭᑦᑐᓂ. ᐸᐅᕋᐅᔭᖓ ᑲᑕᑦᑐᒥᓂᐅᓪᓗᓂ ᐃᒻᒪᓕᖅᑐᒥᓂᐅᒻᒪᓐ.
ᐃᑲᔪᖅᑕᐅᒍᒪᓪᓗᑎᒃ ᐅᖄᓚᒻᒪᑕ ᑭᐅᔭᒥᓃᒃ ᓄᐊᕙᐃᒥᐅᑕᕐᒧᓐ ᐃᖃᓗᒐᓱᑦᑎᒧᓐ ᐅᒥᐊᕐᔪᐊᕐᒧᓐ ᐅᐸᑦᑕᒥᓂᐅᓪᓗᑎᓪᓗ. ᐱᔭᕆᐊᑐᒐᓗᐊᖅᑐᓂ ᐊᑦᑐᓈᒧᓐ ᑎᑭᑕᐅᔪᓐᓇᓂᕐᖓᑕ ᐊᒻᒪᓗ ᐃᓘᓐᓇᑎᒃ 17 ᐅᒥᐊᕐᔪᐊᕐᒥᐅᑕᖏᑦ ᓂᐊᕋᖅᑎᑕᐅᔪᓐᓇᖅᑐᒥᓂᐅᒻᒪᑕ ᐊᑕᓇᓐᖏᑦᑐᒨᖅᑎᑕᐅᓪᓗᑎᒃ. ᖃᐅᒻᒪᓪᓕ ᐋᓪᕗᑦ ᑯᐃᑦ ᐊᑯᓐᓂᖏᓐᓄᑦ ᓴᕝᕙᐅᔪᒥᓂᖅ ᐊᓯᐅᔨᔭᐅᓪᓗᓂᓗ.
ᑕᐃᔅᓱᒪᓂ: ᐅᓪᓗᖅ ᐊᑕᐅᓯᖅ ᐅᑭᐅᖅᑕᖅᑑᑉ ᓯᕗᓂᕆᓯᒪᔭᖓᓂ ᐅᓂᒃᑲᐅᓯᖃᒃᑲᓂᕐᓂᐅᕗᖅ ᖃᓄᐃᓐᓂᐅᓚᐅᖅᓯᒪᔪᒥᒃ ᖃᐅᔨᒪᔭᐅᒻᒪᕆᑦᑐᒥᒃ, ᑕᕝᕙᓂ ᐱᓇᓱᐊᕈᓯᕐᒥ ᓇᓪᓕᐅᓂᖅᓯᐅᕐᓂᐅᓴᔪᒥᒃ. ᑭᐊᓐ ᕼᐊᐳ ᐅᐊᑦᑎᐊᕈᕐᓂᓴᒥᓂᕐᓂᒃ ᐊᑐᖅᑕᒥᓂᕐᓂᒃ ᖃᐅᔨᓴᖅᑎ, ᑎᑎᕋᖅᑎ ᐊᒻᒪᓗ ᐅᖃᐅᓯᓕᕆᔨ ᐃᖃᓗᓐᓂ ᓄᓇᓕᒃ.
ᑭᐊᓐ ᕼᐊᐳ