ᐅᕙᓃᑦᑐᑎᑦ : ᐊᖏᕐᕋᖅ » ᑎᐊᔅᓯᐅᓐ
ᑎᐊᔅᓯᐅᓐ
ᖃᐅᔨᒪᔭᐅᖃᓯᐅᑎᒻᒥᔪᖅ ᖃᓪᓗᓈᓄᑦ ᑎᐊᔅᓯᐅᕕᓐᒥᒃ (Tessuwin) ᐊᒻᒪᓗ ᑎᐊᔅᓯᐅᕙᐃᓐ (Tes-u-wane)
ᑎᐊᔅᓯᐅᓐ ᐊᖑᑦᓱᔪᒻᒪᕆᒥᓂᖅ, ᐊᕐᕙᓂᐊᖅᑎᐅᓪᓗᓂ ᓯᕗᓕᖅᑎᐅᓪᓗᓂᓗ. ᐃᓚᒋᔭᐅᑎᑦᓯᐊᐸᑦᑐᒥᓂᖅ ᖃᐅᔨᒪᓂᖃᖅᓱᓂᓗ ᐊᕐᕙᓂᐊᕐᓂᕐᒥᒃ ᐊᕐᕙᓕᕆᓂᕐᒥᓪᓗ. ᒥᒃᓯᑎᓐᓂ 1860, ᐅᒥᐊᖃᓕᖅᑐᒥᓂᖅ ᐱᖓᓱᓂᒃ ᐊᕐᕙᓂᐊᖅᑎᓄᑦ ᐅᒥᐊᒃᓴᔭᓂᒃ, ᐃᖅᑲᓇᐃᔭᖅᑎᖃᖅᓱᓂ ᐃᓄᓐᓂᒃ ᐅᒥᐊᓕᑦᑕᐅᓪᓗᑎᒃ ᐊᖏᖃᑎᒌᒍᑎᒃᑯᓪᓗ ᐱᓕᕆᖃᑎᖃᖅᐸᑦᓱᓂ ᖃᓪᓗᓈᓂᒃ ᑳᐱᑕᐃᓂᒃ. ᐃᓄᐃᑦ ᐊᖑᑏᑦ ᐃᓚᖏᓪᓗ ᓂᕆᔭᒃᓴᖅᑖᖅᑎᑕᐅᕙᒃᓱᑎᒃ, ᐊᓐᓄᕌᓂᒃ, ᐊᓯᖏᓐᓂᓪᓗ ᓱᓇᒃᑯᑖᓂᒃ ᐅᒥᐊᕐᔪᐊᒥᔭᓂᒃ ᐊᕐᕙᓂᐊᕐᓇᕐᓂᖓᓂᒃ. ᑕᐅᖅᓯᑕᐅᒍᑎᒋᓪᓗᒍ, ᐅᒥᐊᓕᑦᑕᖅ ᑳᐱᑕᐃ ᓂᕆᐅᒋᔭᖃᕐᒪᓐ ᐱᔪᓐᓇᕐᓂᖃᕐᓂᕐᒥᓂᒃ ᑕᐅᖅᓰᒍᓐᓇᓂᕐᒥᒃ ᐊᕐᕙᑐᐊᕈᑎᒃ. ᐊᑕᐅᓯᐊᓗᐊᖅᓱᓂ, ᑎᐊᔅᓯᐅᓐ ᐃᒻᒥᓂᕿᓪᓗᓂ ᐱᓕᕆᒍᓐᓇᕐᓂᖃᖅᑐᒥᓂᖅ, ᑕᐅᖅᓰᒍᑎᖃᖅᐸᑦᓱᓂ ᐊᕐᕕᒥᓂᕐᓂᒃ ᐊᑭᑐᓂᖅᐹᒥᒃ ᐊᑭᓖᓂᐊᖅᑐᒧᑦ. ᓯᑳᑦᓯ ᐊᕐᓇᖅ ᒪᒡᒍᕋᑦ ᐱᐊᓂ ᑲᑎᓯᒐᒥ ᑎᐊᔅᓯᐅᓐᒥᒃ ᕿᑭᖅᑕᓂ 1857–ᖑᑎᓪᓗᒍ, ᓇᓗᓇᐃᕈᓐᓇᖅᑕᒥᓂᖓ "ᐋᙵᐃᓐᓂᖅᐹᖅ ᐊᖑᑦ"
ᑕᑯᒍᒃ : ᒫᒡᒍᕋᑦ ᐱᐊᓂ ᕌᔅᒦᑎᓪᓗᒍ, ed., ᐅᓇ ᐅᖓᓯᑦᑐᒦᑦᑐᖅ ᖃᐅᔨᓴᖅᑕᐅᓚᐅᖅᓯᒪᒐᓂᓗ ᓄᓇ, ᒪᑉᐱᒐᖅ 37- (This Distant and Unsurveyed Country, 37.)
ᐊᕐᕙᒐᓱᐊᙱᑐᐊᕋᒥ, ᑎᐊᔅᓯᐅᓐ ᖃᔭᒃᑯᑦ, ᐅᒥᐊᒃᑯᑦ, ᕿᒧᑦᓯᑯᓪᓗ ᓇᒧᙶᔭᖅᐸᓚᐅᖅᑐᖅ. ᐊᑕᐅᓯᐊᖅᓱᓂ ᕿᒻᒥᖅᓲᓕᐊᕐᓂᕐᒥᔪᖅ ᐃᑳᖅᓱᓂ ᓯᑯᓰᓚᐅᑉ ᐃᒪᖓᓄᑦ. ᐅᐸᒐᔪᒃᐸᓂᕐᒥᔪᖅ ᐃᖅᑲᓇᐃᔭᖅᓱᓂ ᕿᑭᖅᑖᓘᑉ ᑯᐸᐃᓪᓗ ᑕᕐᕋᖓᑕ ᐃᑭᕋᓴᖓᓄᑦ ᓄᖅᑲᑎᑦᓯᔭᖅᑐᖅᓱᓂ ᑕᐅᖅᓰᔭᖅᑐᖃᑎᖃᖅᓱᓂᓗ ᓂᐅᕕᖅᑎᑯᑦ ᐅᒥᐊᕐᔪᐊᖏᓐᓂ, ᓱᓕ ᐊᕐᕌᒍᐃᑦ ᑕᓪᓕᒪᑦ ᓂᐅᕕᖅᑎᒃᑯᑦ ᑎᑭᓚᐅᖅᑎᓐᓇᒋᑦ ᐸᓐᓂᖅᑑᑉ ᑲᖏᖅᓱᐊᓗᐊᓄᑦ.
ᓄᙳᒋᓕᖅᑕᖏᓐᓂ ᐊᕐᕌᒍᐃᑦ 1850–ᖏᑕ, ᑎᐊᔅᓯᐅᓐ ᐊᒥᓱᐊᑎᒐᓚᑦᓱᓂ ᐊᑯᕐᖓᓐᓃᖃᑦᑕᖅᓯᒪᔪᖅ ᓯᒃᑳᑦᓯᑯᑦ ᐊᕐᕙᓂᐊᖅᑎᖏᑕ ᑲᐱᑕᐃᖏᑦ ᐊᐃᕙᐅᑎᑎᓪᓗᒋᑦ. ᐱᓕᕆᖁᔭᐅᓂᑯᒧᑦ ᒪᕐᕉᓐᓄᑦ ᑳᐱᑕᐃᓄᑦ ᐃᖅᑲᓇᐃᔭᖅᑎᑖᖑᒐᓱᐊᓚᐅᖅᑐᒥᓂᖅ ᐅᑭᐊᑦᓵᖓᓂ 1857. ᐊᐅᔭᐅᓕᕐᒥᒻᒪᓐ, ᑳᐱᑕᐃ ᐅᐃᓕᐊᒻ ᐱᐊᓂ ᐊᐱᕆᔪᒥᓂᖅ ᑎᐊᔅᓯᐅᓐᒥᒃ ᐃᖅᑲᓇᐃᔭᕈᓐᓇᕐᒪᖔᖅ ᓄᕗᔭᒥ ᐊᕐᕕᓕᕆᕕᒻᒥ ᐅᑭᐅᖑᓂᖓᓂ, ᑭᓯᐊᓂ ᑭᖑᓂᖓᒍᑦ ᐱᐊᓂ ᑎᖏᕐᕋᐅᑕᓕᒻᒧᑦ ᐅᑎᓕᕐᓂᕐᒥᔪᖅ ᓄᓇᒥᓄᑦ, ᐊᓯᐊᑕ ᑳᐱᑕᐃᑉ ᑎᐊᔅᓯᐅᓐ ᓄᓕᐊᖓᓗ ᐊᖏᖃᑎᒌᒍᓐᓇᖅᓯᑎᑕᒥᓂᖏᒃ ᓯᑳᑦᓚᓕᐊᖁᓪᓗᒋᒃ. ᑖᓐᓇ ᑳᐱᑕᐃ ᑎᐊᔅᓯᐅᒻᒥᒃ ᐅᓂᒃᑳᖁᔨᓐᓂᕐᒥᔪᖅ ᐃᖅᑲᖅᑐᐃᕕᒻᒥ ᓱᑕᐃᖅᓯᒪᔪᒥᒃ ᐊᕐᕕᒻᒥᒃ ᑐᖁᑦᓯᓂᒥᓂᖓᑕ ᒥᒃᓵᓄᑦ 1856–ᖑᑎᓪᓗ. ᐊᐃᕙᒍᑕᐅᓐᓂᕐᒪᑦ ᐊᕐᕙᓐᓂᕋᖅᑐᓄᑦ ᓇᐅᓕᑦᑕᐅᖅᑳᖅᑐᒥᓂᐅᑎᓪᓗᒍ ᐊᓯᖏᓐᓄᑦ.
ᑎᐊᔅᓯᐅᓐ ᐊᐱᕆᓚᐅᖅᑐᒥᓂᖅ ᐊᑕᐅᓯᐅᒐᓗᐊᒥᒃ ᑲᐱᑕᐃᒥᒃ ᓯᑳᓪᓚᓪᓕᐊᕈᔾᔭᐅᔪᒪᓪᓗᓂ ᓯᕗᓂᖓᒍᑦ, ᑕᐃᒪᐃᒧᑦ ᐊᐅᓪᓚᑐᑦᓴᐅᔮᖅᑐᒃᓴᐅᓐᓂᖅᑯᖅ. ᖃᓪᓗᓈᑕᓕᒻᒦᖃᑦᑕᓕᓂᐅᓕᕐᓂᕋᒥ ᓯᕗᓂᖓᒍᑦ. ᓄᓕᐊᕇᒃ ᐱᐊᓪᓚᐃᑑᒃᑯᒃ ᐅᑮᒍᒪᔪᒥᓃᒃ 1856–ᒥ 1857–ᒥᓗ ᐅᑭᐅᖓᓂ ᓯᒃᑳᓯᒃᑯᑦ ᐊᕐᕙᓂᐊᖅᑎᖏᑕ ᐅᒥᐊᖓᓄᑦ ᐋᓕᐸᐃᒧᑦ (Alibi), ᐃᓚᒋᔭᐅᔪᒃᓴᐅᖃᑦᑕᓂᖅᑰᒃ ᐃᙱᖅᑐᓂ, ᑖᓂᓯᖅᑐᓂ, ᐊᒻᒪᓗ ᖁᕕᐊᓱᕝᕕᑦᓯᐅᖅᑐᓂ. ᐅᑮᓂᖅ ᓯᑳᓪᓚᓐᒥ ᐊᔾᔨᒋᖏᑕᒥᓂᐹᓗᐊ. ᐃᐊᑎᓐᐴᒃ (Edinburgh) ᐃᖅᑲᖅᑐᐃᕕᖓᓂ, ᓴᐳᓐᓂᐊᖅᑎ ᐊᐃᕙᖃᑎᖃᕋᓱᐊᖅᑐᒥᓂᖅ ᑎᐊᔅᓯᐅᓐ ᐅᓂᒃᑳᕈᓐᓇᙱᒋᐊᖓ ᐅᑉᐱᕆᔭᖃᙱᒪᒡᒎᖅ ᒎᑎᒥᒃ, ᑕᐃᒪᐃᓐᓂᖓᓄᓪᓗ ᒥᓯᐊᕈᑎᒃᓴᖃᙱᓐᓂᕋᖅᓱᒍ. ᑎᐊᔅᓯᐅᓐ ᐅᑉᐱᕆᔭᖃᕐᓂᕋᖅᑐᒥᓂᖅ ᐃᓂᑦᓴᖅᑕᖃᕆᐊᖓ ᑐᖁᓚᐅᕐᓗᓂ ᓱᒋᐊᖅᑕᐅᕕᒋᒐᔭᖅᑕᒥᓂᒃ ᒥᓯᐊᕈᓂ., ᓱᓕᔪᒥᒃ ᐅᖃᕐᓂᐊᕐᓂᕋᖅᓱᓂ. ᐃᖅᑲᖅᑐᐃᔪᑦ ᓱᓕᔪᖅᓴᖅᑐᒥᓃᑦ ᐅᓂᒃᑲᖓᓂᒃ, ᑭᓯᐊᓂ ᑎᐊᔅᓯᐅᓐ ᒥᑕᐅᑕᐅᔪᒃᓴᐅᓂᖅᑯᖅ ᐅᕝᕙᓘᓐᓃᑦ ᓇᓗᓕᕈᑎᖃᖅᓱᓂ ᓴᐳᓐᓂᐊᖅᑎᐅᑉ ᐃᓱᒪᓂᖓᓂᒃ. ᐅᒡᒍᕐᓇᕋᓗᐊ, ᓄᓕᐊᖓ ᐱᐊᑦᓚᐃᑐ ᐋᓐᓂᐊᓕᕐᓂᕐᒪᑦ, ᐱᔭᖅᑯᖅᑐᓴᖅᑐᒥᓂᐅᓪᓗᓂᓗ. ᑕᖅᑮᒃ ᒪᕐᕈᕈᓚᐅᖅᑎᓐᓇᒋᒃ ᑎᑭᓚᐅᖅᓱᑎᒃ ᓯᑳᓚᓐᒧᑦ ᑐᖁᔪᒥᓂᖅ. ᑎᐊᔅᓯᐅᓐ ᐅᑎᖅᑐᒥᓂᖅ ᐸᓐᓂᖅᑑᑉ ᑲᖏᖅᓱᐊᓗᐊᓄᑦ ᐅᐱᕐᖓᑦᓵᖓᓂ ᑕᕆᐅᓪᓗ ᐊᑭᐅᓄᑦ ᐊᐅᓪᓚᑲᓐᓂᓚᐅᖅᓯᒪᓐᓂᕋᓂ.
1861–ᖑᑎᓪᓗᒍ, ᐊᐅᓪᓚᖃᑦᑕᖅᑎ ᐃᖏᕐᕋᓪᓗᓂ ᓵᕈᔅ ᕗᕌᓐᓯᔅ ᕼᐋᓪ ᐅᓂᒃᑳᖅᓯᒪᔪᖅ ᑎᐊᔅᓯᐅᓐ ᓄᓕᐊᓂᒃᑲᓂᕐᓂᕆᐊᖓᓂᒃ, ᓂᖏᐅᕌᐱᖕᒥᒃ, ᐃᖅᑲᓇᐃᔭᖅᑎᒋᔭᐅᓐᓂᖅᓱᓂᓗ ᒥᐊᓕᒐᐃᑦ ᐊᕐᕙᓂᐊᖅᑎᖓᑦᑕ ᑳᐱᑕᐃᖓᓄᑦ. ᐊᕐᕌᒍᕋᓴᐃᑦ ᑭᖑᓂᕆᓕᖅᑕᖓᒍᑦ, ᑎᐊᔅᓯᐅᓐ ᐃᓄᑐᖃᐅᓕᖅᑎᓪᓗᒍ, ᒥᐊᓕᒐᒥᐅᑉ ᑳᐱᑕᐃᑉ ᖃᐅᔨᔭᒥᓂᖓ ᐃᓚᒌᑦ ᓇᐅᔭᖅᑕᓕᒻᒥ. ᑎᐊᔅᓯᐅᓐ "ᐊᑑᑎᓕᒥᓂᐹᓗᒃ" ᐊᕐᕙᓂᐊᖅᑎᓄᑦ 1877–ᒧᓄᑦ, ᖁᑭᐅᑎᖓ ᓱᒋᐊᓚᑦᓯᓂᕐᒪᑦ ᖁᒃᑭᓗᓐᓂᕋᒥ ᐱᓱᒍᓐᓇᐃᓪᓕᔪᒥᓂᖅ. ᒪᒥᓯᒪᓕᕋᒥ ᐊᐅᓪᓚᖃᑦᑕᓯᓐᓂᕐᒥᔪᖅ ᑲᖏᖅᓱᐊᓗᑦᑎᒎᖃᑦᑕᖅᓱᓂ ᕿᒧᑦᓯᒃᑯᑦ, ᑲᒪᔨᐅᖃᑕᐅᓪᓗᓂ ᐊᐅᓪᓚᑎᒃᓯᕙᑦᓱᓂ ᐊᒥᕐᓂᒃ ᐊᓯᖏᓐᓂᓪᓗ ᑕᐅᖅᓰᒍᑎᒃᓴᓂᒃ ᑖᒃᑯᓄᖓ ᖃᓪᓗᓈᓄᑦ ᐃᓄᓐᓄᓪᓗ.
ᑕᑯᒍᒃ : ᐅᖃᓕᒫᒐᕐᒥ Howgate, ed., ᐃᖏᕐᕋᓂᒥᓂᖓ ᕗᓗᐊᕋᓐᔅ, ᒪᑉᐱᒐᒻ 24. (The Cruise of the Florence, 24.)