ᐅᕙᓃᑦᑐᑎᑦ : ᐊᖏᕐᕋᖅ » ᓄᕗᔭᓐ
ᓄᕗᔭᓐ
ᖃᐅᔨᒪᔭᐅᖃᓯᐅᑎᒻᒥᔪᖅ ᖃᓪᓗᓈᓄᓐ ᓂᐅ ᐳᐃᔨᓐ (New Boyen) ᑲᐃᑉ ᑐᕉᓚᕝ (Cape Truelove)ᐊᒻᒪᓗ ᓄᕗᐃᔭᓐ (Nuvuyen)
ᓄᕗᔭᓐ ᕿᑭᖅᑕᐅᓪᓗᓂ ᓂᒋᖅᐸᓯᐊᑕ ᐅᐊᓐᓇᐸᓯᐊᓃᑦᑐᖅ ᐸᓐᓂᖅᑑᑉ ᑲᖏᖅᓱᐊᓗᐊᑕ, ᐊᑦᓯᖅᑕᐅᓯᒪᔪᖅ ᖃᐅᔨᒪᔭᐅᑦᓯᐊᕐᓂᖓᓄᑦ ᑕᑯᔭᒃᓴᐅᓪᓗᓂᓗ ᐅᖓᓯᑐᒦᑦᑐᖃᕋᓗᐊᕈᓂ. ᐊᕐᕕᓂᐊᖅᑏᑦ ᑎᑭᖃᑦᑕᓕᓚᐅᖅᑎᓐᓇᒋᑦ, ᐅᑮᕕᐅᕙᑦᑐᒥᓂᖅ. ᓯᑯᐃᔭᓕᕋᐃᒻᒪᓐ, ᖃᐅᔨᒪᔭᐅᓪᓗᓂ ᓇᑦᓯᐊᕕᓂᖅᑕᖃᐅᖅᑐᖅ ᐊᒥᒐᙱᑦᑐᓂᒃ.
1857–ᖑᑎᓪᓗᒍ, ᓯᑳᑦᓯᒦᙶᖅᓯᒪᔪᑦ ᐊᕐᕕᓂᐊᖅᑏᑦ ᐅᒥᐊᓕᑦᑕᖃᖅᓱᑎᒃ ᐅᐃᓕᐊᒻ ᐱᐊᓂᒥᒃ ᓴᓇᔪᒥᓃᑦ ᓯᕗᓪᓕᖅᐹᓐᓂᒃ ᒪᕐᕉᓐᓂᒃ ᐃᓪᓘᓐᓃᒃ ᖃᓪᓗᓈᑦ ᐃᓪᓗᑦᓴᔭᖏᑎᑐᑦ ᓴᓇᓯᒪᔫᓂᒃ ᐸᓐᓂᖅᑑᑉ ᑲᖏᖅᓱᐊᓗᐊᓂ. ᐊᐃᑉᐸᖓ ᕿᑭᖅᑕᐃᓐᓂ, ᐊᐃᑉᐸᖓ ᓄᕗᔭᓐᓂ. ᓄᕗᔭᓐᓃᑦᑐᖅ ᐃᓪᓗ ᓴᓇᔭᐅᓂᑰᓯᒪᔪᒥᓂᖅ ᐃᓚᐃᓐᓇᖓ ᓯᑳᓪᓚᓐᒥ. ᐱᐊᓂᐅᑉ ᐃᖅᑲᓇᐃᔭᖅᑎᖏᑕ ᐋᖅᑭᓱᖅᑕᒥᓂᖓᑦ ᐅᓪᓗᓂᒃ ᐱᖓᓱᓂᒃ ᐊᑯᓂᐅᓪᓗᓂ ᑲᑎᖅᓱᖅᓱᒍ. ᐊᔪᕿᖅᑐᐃᔨ ᒪᑕᐃᐊᔅ ᕗᐊᒧ (Matthäus Warmow) ᐅᖃᖅᑐᒥᓂᖅ ᑖᓐᓇ ᐃᓪᓗ ᐅᖅᑰᔪᒥᐅᑕᕐᓄᑦ ᑭᓯᐊᓂ ᓈᒻᒪᒋᐊᖓ ᐅᑭᐅᖅᑕᖅᑐᒥᐅᙱᑦᑐᖅ, ᑭᓯᐊᓂ ᐱᐊᓂᐅᑉ ᐃᓱᒪᒋᔭᒥᓂᖓ ᐃᑭᐊᕐᒥᓕᖅᑐᓛᕐᓂᐊᕆᐊᖓ ᐊᒥᕐᓂᒃ ᓂᕐᔪᑎᔭᓂᒃ ᐃᓗᐊᒍᑦ ᓯᓚᑖᒍᓪᓗ ᐊᐳᒻᒥᒃ ᐅᖂᑕᓕᖅᑐᕐᓗᒍ. ᐃᖅᑲᓇᐃᔭᖅᑎᖁᑎᒥᓂᓪᓗ ᐊᐅᓚᑦᓯᑎᑦᓯᓐᓂᕐᒥᔪᖅᑕᐅᖅ ᐅᖁᒪᐃᑦᑑᑎᐊᓗᓐᓂᒃ ᑭᐊᑦᓴᐅᑎᓂᒃ 7–ᑕᓐᓂᒃ ᐅᖁᒪᐃᓐᓂᓕᓐᓂᒃ ᐅᖁᒪᐃᑦᑑᑎᐊᓗᓐᓂᒃ ᐊᐅᒪᒃᓴᔭᓂᒃ ᕿᑭᖅᑕᓕᐊᕈᔾᔨᑎᒃᓱᓂᒋᑦ, ᑕᒪᒃᑯᐊ ᐴᖅᑲᖅᓯᒪᑎᓪᓗᒋᑦ ᐊᐅᒪᒃᓴᔭᐃᑦ ᐃᖅᓱᖅᓱᓂᒋᑦ ᑕᒪᐅᓇ ᐅᔭᕋᓚᒃᑎᒍᑦ ᐊᖅᑯᑎᑎᒍᑦ. ᑖᒃᑯᐊ ᒪᕐᕉᒃ ᐊᕐᕕᓕᕆᕕᖁᑎᒋᓪᓗᓂᒋᒃ, ᐱᐊᓂ ᐊᕐᕙᒍᓐᓇᐸᑦᑐᒥᓂᖅ ᐊᕐᕖᑦ ᓯᓈᖓᓅᖅᓯᒪᓕᕋᐃᒻᒪᑕ ᐸᓐᓂᖅᑑᑉ ᑲᖏᖅᓱᐊᓗᐊᑕ.
ᐱᐊᓂ ᒪᕐᕈᐃᓐᓈᓐᓂᒃ ᐃᖅᑲᓇᐃᔭᖅᑎᑯᑎᒥᓂᒃ ᕿᒪᐃᔪᒥᓂᖅ ᓄᕗᔭᒧ ᑕᐃᑲᓂ ᐅᑭᐅᖓᓂ, ᐊᐃᑉᐸᖓ, ᔮᓐ ᕚᑲᓄ, (John Falconer) ᓂᕆᖃᑦᑕᐸᓪᓚᐃᓐᓂᖏᒻᒪᓐ ᓂᕐᔪᑎᔭᓂᒃ ᑐᖁᔪᒥᓂᖅ ᐃᒃᑭᕐᓗᓂᕐᒧᑦ. ᐱᐊᓂ ᐃᓱᒪᔪᒥᐅᓂᐅᕙᓪᓚᐃᔪᖅ ᕚᑲᓄ ᐅᒥᐊᒃᑯᓪᓗ ᑕᒪᐅᙵᖅᓯᒪᖃᑎᖏᑦ ᐃᖅᑲᓇᐃᔭᖅᑎᑖᕋᔭᕆᐊᖏᑦ ᐃᓄᓐᓂᒃ ᐊᕐᕙᓂᐊᖅᑎᖃᑦᑕᓂᐊᖅᑕᒥᓐᓂᒃ. ᐃᓚᒌᑦ ᑕᒫᓂ ᐊᐅᓪᓛᖅᓯᒪᕙᑦᑐᒥᓃᑦ ᐱᐊᓂ ᑎᑭᑦᑎᓪᓗᒍ, ᐊᒥᓱᒃᑲᓐᓃᑦ ᑕᒪᐅᖓ ᑎᑭᑉᐸᓕᖅᓱᑎᒃ. 1–ᕼᐋᓐᓇᓚᑦ ᐅᖓᑖᓃᑦᑐᑦ ᑕᒫᓃᓕᖅᑐᒥᓂᐅᔪᒃᓴᐅᕗᑦ ᕿᑭᖅᑕᒥ ᑕᒪᓐᓇᐅᑎᓪᓗᒍ. ᒪᕐᕈᑲᓐᓃᒃ ᐊᕐᕙᓐᓂᐊᖅᑏᒃ, ᐊᐃᑉᐸᖓ ᒥᐊᓕᒐᒃᑯᓐᓃᙶᖅᓯᒪᔪᖅ, ᐊᕐᕕᓕᕆᕕᒋᖃᑦᑕᓂᐊᖅᑕᒥᓐᓂᒃ ᕿᓚᒥᕈᓗᒃ ᓴᓇᔪᒥᓂᐅᓪᓗᑎᒃ ᓄᕗᔭᒥ.
ᓄᕗᔭᒥ ᐃᓪᓗᐃᑦ ᐱᒻᒪᕆᒋᔭᐅᔪᒃᓴᐅᓂᖅᐳᑦ 1860–ᖏᓐᓂ ᐊᕐᕌᒍᐃᑦ, ᑎᑎᕋᕐᕕᐅᕙᑦᑐᒥᓂᕐᓂ ᑎᑎᕋᖅᓯᒪᔪᖅᑕᖃᐅᕐᓂᕐᒪᑦ ᐊᕐᕙᓂᐊᖅᑏᑦ ᐅᒥᐊᖏᓐᓂ ᐅᓂᒃᑳᕆᔭᐅᓪᓗᑎᒃ ᑲᐱᑕᐃᑦ, ᐊᐅᓚᒃᓯᔩᑦ, ᐃᓄᐃᓪᓗ ᑕᐃᑯᙵᖃᑦᑕᖅᑐᒥᓂᐅᓐᓂᕆᐊᖏᓐᓂᒃ. ᓂᐅᕐᕈᑐᐃᓐᓇᖅᓱᑎᒃ, ᑐᓴᕆᐊᖅᑐᖅᓱᑎᒃ ᐊᓯᖏᓐᓂᒃ ᐅᒥᐊᓕᑦᑕᓂᑦ ᐊᕐᕖᓪᓗ ᒥᒃᓵᓄᑦ, ᑕᐅᖅᓰᔭᖅᑐᖅᓱᑎᓪᓗ ᓱᓇᑐᐃᓐᓇᕐᓂᒃ – ᑕᐅᖅᓰᔭᖅᑐᖅᑐᖃᓚᐅᖅᑐᒥᓂᖅ ᕿᒻᒥᓂᒃ ᐊᕙᑏᑦ ᐱᖓᓱᓂᓐᓗ ᐊᒥᓲᓂᓕᓐᓂᒃ.
ᖃᓪᓗᓈᑦ ᓅᑦᓱᑎᒃ ᑲᒪᒍᓐᓃᖅᑐᕕᓃᑦ ᓄᕗᔭᒥᒃ. ᕿᑭᖅᑕᖅ ᑖᓐᓇ ᑭᓴᖅᓯᒪᕕᒋᒋᐊᖓ ᐊᑲᐅᕙᓐᓂᖏᒻᒪᓐ ᐅᒥᐊᐸᐅᔭᓄᑦ, ᐊᕐᕕᖃᓗᐊᕈᓐᓃᑐᑦᓴᐅᓂᕐᒪᓪᓗ ᐊᕐᕕᓂᐊᖅᑎᓄᑦ ᐱᔭᐅᓂᑯᒧᓐ. ᐃᓪᓗᐸᐅᔭᐅᓂᖅᐹᖅ ᐃᑭᑦᑐᒥᓂᖅ ᓄᖑᑦᓱᓂ. ᐄᑉᐳᓘᒥ 1868–ᖑᑎᓪᓗᒍ, ᐊᕐᕙᓂᐊᖅᑎ ᐊᖅᑯᓵᖅᑐᒥᓂᖅ ᓄᕗᔭᒧᑦ ᕿᒧᑦᓯᒃᑯᑦ ᑕᑯᔪᒥᓂᐅᓪᓗᓂᓗ ᓯᒃᑳᓯᒃᑯᑦ ᐊᕐᕕᓕᕆᕕᒥᓂᖓᓂ "ᐊᕐᕕᓕᕆᕕᑦᓴᐅᒍᓐᓃᖅᑐᖅ." ᐃᓄᒃ ᐊᕐᕙᓂᐊᖅᑎᒥᓂᖅ ᒫᑯᓯ ᐱᑦᓯᐅᓛᖅ ᐅᖃᖅᑐᒥᓂᖅ ᒥᐊᓕᒐᕐᒦᙶᖅᓯᒪᔪᓄᑦ ᐊᑖᑕᖓ ᐱᓕᑕᐅᓐᓂᕆᐊᖓᓂᒃ ᐃᓪᓗᒥᒃ ᐃᓚᖓᓐᓂᒃ ᓄᕗᔭᒥ. ᐃᓚᒌᑦ ᐃᓪᓗᒋᓕᖅᑕᒥᓂᖓᓐ ᐊᖏᕐᕋᕆᓪᓗᓂᐅᒃ ᓯᒃᑳᑦᓯᒦᙶᖅᓯᒪᔪᑦ ᑕᐅᖅᓰᒍᑎᒋᓚᐅᖏᓐᓂᖓᓂᐅᒃ ᐅᒥᐊᕐᒥᒃ ᐊᓯᖏᓐᓂᓪᓗ ᑖᓐᓇ ᐱᓕᑕᒥᓂᖅ ᐱᒐᓚᓂᒃ ᐃᓪᓗᓯᐅᑎᓂᒃ, ᓯᒃᑳᑦᓰᑦ ᐃᑐᑦᑎᖅᓱᓂᐅᒃ ᐅᒪᓇᕐᔪᐊᓕᐊᕈᑎᓕᕐᓂᕐᒥᔭᖓᑦ ᑖᓐᓇ ᐃᓪᓗ.
ᑕᑯᒍᒃ : ᒥᐅᓪᕗᑦ ᖃᐅᑕᒫᖅᓯᐅᑏᑦ ᑎᑎᕋᖅᐸᑦᑕᒥᓂᖏᓐᓂ, 1867-1868.
ᐃᓄᐃᑦ ᐊᐅᓪᓛᖅᓯᒪᐃᓐᓇᐸᑦᑐᒥᓃᑦ ᓄᕗᔭᒥ. ᐅᐱᕐᖓᓵᒃᑯᑦ ᓇᑦᓯᐊᕐᓂᐊᕕᒋᔭᖅᑐᖅᓯᒪᕕᖏᓪᓗᓂᐅᒃ, ᑕᒻᒫᕐᕕᒋᕙᒃᓱᓂᐅᒃ ᓄᖅᑲᑲᐃᓐᓇᕐᕕᒋᓗᒍᓘᓐᓃᑦ ᑐᒃᑐᓕᐊᖅᓯᒪᔪᒥᓂᐅᕐᓗᑎᒃ ᐅᑮᕕᒋᕙᒃᓱᓂᐅᒃ ᓇᑦᓯᕋᓱᐊᕐᕕᒋᓪᓗᓂᐅᒃ. 1883–ᖑᑎᓪᓗᒍ, ᐃᓄᐃᑦ ᑎᒥᖃᖅᑐᑦ ᐃᓅᓇᓱᐊᕈᓯᖓᓂᒃ ᖃᐅᔨᓴᖅᑎ ᕗᕌᔾ ᐳᐊᔅ (Franz Boas ) ᑎᑎᕋᖅᑐᕕᓂᖅ ᐊᕙᑎᑦ ᐊᕐᕕᓂᓖᓪᓗ ᓄᓇᓕᐅᒋᐊᖏᓐᓂᒃ ᑕᒫᓂ ᕿᑭᖅᑕᒥ. ᒪᐃᖑᑎᓪᓗᒍ 1910–ᒥ, ᖁᓕᑦ ᒪᕐᕈᓪᓗ ᐃᓄᐃᑦ ᑕᒫᓂᒥᐅᑕᒥᓃᑦ, ᓇᑦᓯᒥᓂᖅᑐᕋᑦᓴᖃᑦᓯᐊᖅᓱᑎᓪᓗ.
ᐊᕐᕌᒍᐃᑦ ᖁᓕᑦ ᐊᓂᒍᖅᓯᒪᓕᖅᑎᓪᓗᒋᑦ, ᐊᕐᕕᓂᐊᖅᑏᑦ ᑎᑭᖃᑦᑕᕈᓐᓃᑎᓪᓗᒋᑦ, ᐃᓄᒃ ᐊᕐᕙᓂᐊᖅᑎ ᑲᑲᒥᒃ ᐊᑎᓕᒃ ᓄᓕᐊᕇᒃ ᐃᕐᓂᖏᓪᓗ ᒪᕐᕉᒃ, ᐊᓯᖃᖅᓱᑎᒃ ᐃᓚᒌᓂᒃ ᓄᑦᑎᖅᑐᕕᓃᑦ ᓄᕗᔭᒧᓐ. 1927–ᖑᑎᓪᓗᒍ, ᑲᑲ ᐊᐃᕙᖃᑎᓕᒥᓂᖅ ᐃᕐᓂᒥᓂᒃ ᐱᑐᐊᓯᒥᒃ, ᑖᓐᓇ ᐱᑐᐊᓯ ᐊᓯᐊᓄᑦ ᓅᓚᐅᖅᑐᒥᓂᖅ ᓄᓇᐅᑉ. ᑭᖑᓂᑦᓯᐊᖓᒍᑦ ᑕᒪᑐᒪ, ᑲᑲ ᓄᓕᐊᒥᓂᒃ ᖁᑭᖅᓯᔪᒥᓂᖅ ᐃᒻᒥᓂᓪᓗ ᖁᑭᖅᓱᓂ. ᑕᒪᓐᓇ ᓄᓇᒋᔭᐅᑲᐃᓐᓇᐸᑦᑐᕕᓂᖅ ᐃᓄᖃᕈᓐᓃᖅᑐᒥᓂᖅ 1927–ᖑᑎᓪᓗᒍ, ᑭᓯᐊᓂᓕ ᐃᒪᕐᓗᓗᐊᖅᑎᓪᓗᒍ ᑭᓴᖅᓯᒪᕕᐅᕙᑦᑐᖅ ᓱᓕ ᐸᓂᖅᑑᒥᐅᓄᑦ ᐅᒥᐊᖅᑐᐸᑦᑐᓄᑦ.