ᒪᑐᔾᔪᑎᖓ

ᐊᐱᖅᓱᖅᑕᐅᑦᓱᓂ ᐅᖃᐅᓯᒥᓂᖏᓐᐋᓐ ᐃᖅᑲᒋᓇᖅᑐᖅ ᐋᓐ ᒥᑭᔾᔪᒃ ᕼᐊᓐᓴᓐ

ᐄ, ᑕᐃᓐᓇ ᖁᕕᐊᓇᕈᑎᒋᒻᒥᔭᖓ ᓯᕗᓕᖃᕆᐊᖅ ᐊᕐᕕᓐᓂᐊᖅᑎᒥᓂᕐᓂᒃ. ᐃᓕᑦᓴᕋᐃᑦᑐᑲᓪᓚᐅᒐᑦᑕ ᐃᓅᓪᓗᑕ ᖃᓄᓕᒫᖅ.

ᑕᐃᒃᑯᐊᑦᑕᐅᖅ ᐊᕐᕕᓐᓂᐊᖅᑏᑦ ᑕᒪᐅᖓᐅᔾᔪᑎᒥᓂᐅᒻᒪᑕ ᓱᓇᑐᐃᓐᓇᑦᓯᐊᕌᐱᓐᓂᒃ, ᑖᓐᓇ ᐃᓚᒋᔭᐅᓪᓗᓂ ᐃᙱᕈᑦ ᐃᙱᑎᑦᓯᓲᖑᓪᓗᑎᒃ. ᑕᒪᐅᖓᖅᑐᒥᓂᐅᒻᒪᑕ ᓱᐃᓛᕿᔾᔪᑎᒋᓪᓗᒍᖃᐃ ᐊᑯᓂᐊᓗᒃ ᐅᒥᐊᖅᑐᖃᑦᑕᒥᓂᐅᒻᒪᑕ, ᑕᒪᐅᖓ ᐅᑭᐅᖅᑕᖅᑐᓕᐊᕋᓱᐊᖅᓱᑎᒃ.

ᑕᐃᒪ ᐃᙱᕈᑎᓂᒃ ᑕᑯᔭᕆᐅᖅᑐᒃᓴᐅᓐᓂᕐᖓᑕ ᐊᒻᒪᓗᑦᑕᐅᖅ ᑐᓴᕆᐅᖅᑐᑎᒃ ᐃᙱᑦᓯᒐᓗᐊᐱᓐᓂᒃ. ᑕᐃᒃᑯᐊ ᑕᐃᒪᐃᑦᑐᒥᓂᐅᒻᒥᒻᒪᑕ. ᑖᒃᑯᐊ ᐃᓅᖃᑎᕗᑦ ᓯᕗᓕᕗᑦ ᕿᓚᒥᕈᓗᒃ ᐃᓕᑦᑐᒥᓂᐅᒻᒪᑕ ᐃᙱᑎᑦᓯᓂᕐᒥᑦ ᑕᐃᑦᓱᒧᖓ, ᑕᐃᓐᓇ ᐱᖃᑎᐊᐱᒋᓚᐅᖅᑕᕗᑦ ᓕᐊ ᓄᑕᕋᖅ ᐅᓂᒃᑳᖃᑦᑕᓚᐅᖅᓯᒪᒻᒥᒻᒪᑦ, ᐊᕐᕕᓐᓂᐊᑦᑎᐊᓗᓐᓂᑦᑕᐅᖅ ᐊᙳᑎᓚᐅᖅᓯᒪᒐᒥ ᑕᑉᐹᓂ ᐆᒪᓇᕐᔪᐊᒥ ᐃᒪᐃᓕᖃᑦᑕᓚᐅᖅᓯᒪᒻᒥᒻᒪᑦ ᓕᐊ ᓄᑕᕋᖅ.

ᑕᐃᒪᒎᖅ ᑕᐃᒃᑯᐊ ᑎᑭᑦᑐᐊᓘᒻᒪᑕ ᐅᒥᐊᕐᔪᐊᕌᓗᐃᑦ. ᐊᓱᐃᓛᒃ ᐅᒥᐊᕐᔪᐊᓕᐊᓕᖅᑐᒥᓃᑦ ᐅᒥᐊᕐᔪᐊᑦ ᑎᑭᑦᑐᐊᓘᒻᒪᑦ. ᑖᒃᑯᐊ ᐃᓅᖃᑎᒌᑦ ᑖᒃᑯᐊ ᐅᒥᐊᕐᔪᐊᒐᓚᐃᑦ, ᑕᐃᓐᓇ ᓂᕈᑐᕋᓚᒃᑐᐊᓘᒻᒪᑦ ᑕᐃᑲᓂ ᐃᒪᐃᓕᔪᖃᖅᑐᒥᓂᐅᓪᓗᓂ. ᑕᐃᓐᓇᒎᖅ ᖃᓪᓗᓈᖅ ᐃᓚᖓᑦ ᐃᙱᕈᒻᒥᒃ ᑎᒍᒥᐊᖅᑐᓂ ᓂᐱᓕᐊᐱᐅᕙᒃᑐᓂᓗ, ᐃᙱᑎᑦᓯᕙᓪᓚᒻᒪᑦ ᑐᓴᕐᓂᕆᔭᕕᖔᓘᓕᖅᑐᖅ. ᑕᐃᓐᓇ ᓕᐊ ᐃᒪᓐᓇᐃᓕᐅᖃᑦᑕᖅᓯᒪᔪᖅ.

ᑖᓂᓱᒃ ᑖᓂᓱᖁᔨᓕᕐᖓᒡᒎᖅ ᑕᐃᓐᓇ ᐃᙱᖅᑎᑦᓯᔪᖅ, ᑎᓕᐅᕆᔪᐹᓘᓕᕋᓗᐊᕐᖓᑦ ᑖᒃᑯᓂᖓ ᓂᕕᐊᖅᓯᐊᓂᒃ ᓱᕈᓯᕐᓂᒃ ᓇᓃᑐᐃᓐᓇᖅᑐᓂᒃ. ᑖᒃᑯᐊ ᐱᒍᒪᙱᑦᑐᐊᓗᐃᑦ ᑖᓂᓯᕈᒪᙱᒻᒪᑕ. ᑕᐃᓐᓇ ᓕᐊ ᐱᖃᑎᐊᐱᒋᓚᐅᖅᑕᕗᑦ, ᐃᓐᓇᖃᐃ ᑲᙳᑕᐃᑦᑐᒥᓂᐅᒐᒥ, ᓂᕕᐊᖅᓯᐊᕌᓘᓪᓗᓂᑦᑕᐅᖅ ᒫᓂᖃᐃ 8−ᓂᒃ, 9−ᓂᒃ ᐅᑭᐅᖃᖅᑐᖅ. ᓱᓇᑖᕈᒪᒧᑭᐊᖅ ᓱᓇᑖᕈᒪᒧᑦᑕᐅᖅ ᐱᑖᖅᑎᑕᐅᓇᓱᒋᒧᓪᓗᖃᐃ ᐃᓱᒪᒐᒥ ᑕᐃᒪᐃᓕᐅᖃᑦᑕᓚᐅᕐᖓᑦ. ᑖᓂᓯᖁᔭᐅᓕᕋᒥ ᐃᙱᖅᑎᑦᑎᔪᖃᓕᑎᓪᓗᒍ ᐊᓱᐃᓛᒃ ᑖᓂᓯᖅᑐᕈᓘᓕᕐᒪᑦ ᐊᑯᓂᑲᓪᓚᒻᒪᕆᒃ. ᑐᓴᕆᐅᑦᑎᐊᖅᑐᓂᓗ ᐃᙱᑎᑦᑎᕙᓗᒻᒥᒃ ᐊᒻᒪᓗᑦᑕᐅᖅ ᑖᓂᓯᖁᔭᐅᓕᖅᑐᓂ, ᐃᓛᒃ ᑖᓂᓯᖅᑐᒥᓂᐅᒋᐊᖅ ᐅᓂᒃᑳᖃᑦᑕᓚᐅᖅᓯᒪᔪᖅ ᓕᐊ ᓄᑕᕋᖅ.

ᐊᒻᒪᓗᑦᑕᐅᖅ ᑕᐃᒪ ᐃᙱᕈᒻᒥᒃ ᐅᓂᒃᑳᓂᓐᓂ ᐃᙱᑎᑦᑎᒍᓐᓇᑐᑦ ᐊᒥᓲᕙᓚᐅᕐᖓᑕ ᓄᓇᑦᑎᓐᓂ ᑭᒻᒥᕈᒻᒥᓗ. ᑭᒻᒥᕈᒻᒥᑐᐃᓐᓇᐅᙱᑦᑑᒐᓗᐊᖅ ᐃᓛᒃ. ᑕᐃᓐᓇᑦᑕᐅᖅ ᐊᓪᓛᑦ ᐊᓈᓇᒐ ᐃᙱᑎᑦᑎᒍᓐᓇᖃᑦᑕᓚᐅᖅᑎᓪᓗᒍ ᑐᓴᐅᒪᑦᑎᐊᕐᒥᔭᕋ. ᐅᕙᖓᓂ ᐃᙱᑎᑦᑎᖃᑦᑕᕋᓗᐊᕐᒥᔪᖓ ᐃᓛᒃ ᐱᒍᓐᓇᙱᓐᓂᖅᓴᐅᕙᒻᒥᔪᖓ ᑕᒪᒃᑯᓂᖓ ᐱᒍᓐᓇᖅᑐᓂᒃ.

ᓕᐊ ᓄᑕᕋᖅ ᐊᒥᓱᓂᒃ ᐅᓂᒃᑳᖅᐸᔪᔪᖅ ᐊᕝᕙᒐᓱᐊᕐᓂᕐᒥᒃ ᐱᔾᔪᑎᓕᓐᓂᒃ. ᐃᓅᒍᓐᓃᖅᓯᒪᓕᖅᑐᕐᓕ. ᐅᖃᐅᓯᖃᖅᐸᔪᔪᖅ ᑕᐃᒃᑯᓂᖓ ᐊᕝᕙᒐᓱᐊᖅᑎᒥᓂᐊᓗᓐᓂᒃ. ᐊᑕᐅᓯᐊᖅᑐᑎᒡᒎᖅ ᐊᖅᕕᒐᓲᑎ ᐅᒥᐊᕐᔪᐊᖅ ᑎᑭᒻᒪᓐ ᐃᓄᐃ ᐅᒥᐊᕐᔪᐊᒨᖅᐸᑦᑐᒥᓃᑦ, ᐅᐱᓐᓇᕋᓂᓗ ᐊᒥᓱᓂᕐ ᓱᕈᓯᕐᓂᒃ ᓇᒥᕈᓘᔮᖅᑐᖃᖅᐸᔪᕗᖅ ᐊᒻᒪᓗ ᐊᖑᑎᒥᒃ ᓴᖅᑭᖅᑐᖃᓚᐅᖅᓯᒪᔪᖅ ᑭᑉᐹᕆᑦᑐᒥᒃ ᓂᓪᓕᐊᓲᒥᒃ ᐱᖃᖅᑐᓂ, ᐃᓐᖏᕈᑎᒥᒃ, ᓱᕈᓯᕐᓂᓪᓗ ᒧᒥᖁᔨᕗᔪᔫᒐᓗᐊᖅ ᑭᓯᐊᓂᓕ ᑲᓐᖑᓱᓗᐊᔪᒻᒪᑕ. ᓕᐊ ᐅᖃᖅᐸᔪᒻᒪᓪᓕ ᑲᓐᖑᑕᐅᓐᖏᓐᓇᒥ ᐊᒻᒪᓗ ᓂᑯᕕᑦᑐᖃᖃᑦᑕᓂᓐᖏᒻᒪᓐ ᐊᒻᒪᓗ ᑭᖑᓪᓕᕐᒥ ᐊᖑᑎ ᐃᓐᖏᕈᑎᒥ ᐱᓐᖑᐊᓕᕐᒥᒻᒪᓐ ᓂᑯᕕᑦᑐᓂ ᒧᒥᓕᖅᑐᒥᓂᖅ ᐃᓱᒪᓪᓗᓂ ᐅᕝᕙᒐᓱᑦᑎᓄᑦ ᐱᑖᖅᑎᑕᐅᑳᓚᒋᐊᔅᓴᖅ. ᐅᖃᐅᔾᔭᐅᓯᒪᒻᒥᔪᖓ ᐊᓈᓇᒐ ᐃᓐᖏᑎᑦᑎᓲᖑᓐᓂᕐᖓᓐ. ᐃᓐᖏᑎᑦᑎᓲᖑᒻᒥᔪᖓ, ᑭᓯᐊᓂᓕ ᐱᓐᖑᐊᑎᐊᖅᐸᖏᑦᑐᖓ.

ᐊᐱᖅᓱᕐᓂᒥᓂᖅ ᑕᕙᔪ.ᒋᓕᔅ ᕌᔅᒥᑦ, ᖃᐅᔨᒪᔨᑕᕐᒥᒃ

ᓄᕗᒡᔪᐊᖅ, ᑎᓄᔾᔨᕕᖕᒦᑦᑐᖅ, 150ᒪᐃᓕᒥᒃ ᐅᖓᓯᖕᓂᖃᕐᒪᑦ ᖃᓂᖓᓄᑦ ᑲᖏᖅᖢᖓᑕ ᑎᓄᔾᔨᕕᐅᑉ.

ᐅᑭᐅᒃᑯᑦ, ᓂᒋᖅᐸᓯᐊᓃᖃᑦᑕᕐᒪᑕ ᐹᖅᐸᓯᖓᓂ. ᓯᑯᖓᓗ ᐃᔾᔪᖅᑎᓯᒪᓕᖅᖢᓂ, ᓄᓯᒪᕙᒃᖢᓂᓗ ᐃᑭᖅᐸᓯᖓᓄᐊᖓᔪᒥᒃ. ᐅᐱᕐᖓᒃᓵᖅᐸᓯᒃᑯᑦ ᓯᑯ ᐊᒃᑐᐊᒐᓗᐊᖅᖢᓂ ᐊᐅᓚᓕᖅᐸᒃᖢᓂ. ᐊᑦᑕᕐᓇᖏᒃᑲᓗᐊᖅᖢᓂ. ᐊᕐᕖᑦ ᓯᓈᖓᓄᐊᖅᐸᒃᖢᑎᒃ. ᐃᓚᖏᓪᓗ ᐅᑮᕙᒃᖢᑎᒃ ᑎᓄᔾᔨᕕᐅᑉ ᐹᖅᐸᓯᖓᓂ. ᐅᐱᕐᖓᖅᐸᓪᓕᐊᓕᖅᑎᓪᓗᒍ, ᐊᐅᒃᐸᓪᓕᐊᓕᖅᖢᓂᓗ, ᓯᓈᖓ ᑎᒡᕙᖅᐹᓪᓕᖅᐸᒃᖢᓂ, ᐊᕐᕕᖃᓕᖅᖢᓂᓗ ᖃᖏᖅᖣᒪᓂᖓ. ᐃᓄᖃᙱᓪᓗᐊᕐᓂᖓᓄᓪᓗ ᓇᓕᖅᑰᑎᕙᒃᖢᓂ ᐱᖃᕐᓂᐊᐃᓐᓄᐊ.

ᐃᓄᖕᓂᑦ ᑐᓴᖅᑎᑕᐅᓕᓚᐅᖅᑐᖅ ᐱᓂ ᓯᐊᓛᖏᓪᓗ ᒪᕐᕈᐊᖅᑎᓲᖑᖕᒪᒡᒎᖅ ᐊᕐᕕᖃᕐᓂᖓ ᐊᑲᐅᓈᖅᑎᓪᓗᒍ ᑎᓄᔾᔨᕕᖕᒥ: ᒪᐃᒥ ᐅᐱᕐᖓᒃᓵᒃᑯᑦ ᐊᒻᒪᓗ ᓯᑎᒻᐱᕆ ᐅᑐᐱᕆ ᐅᑭᐊᒃᓵᒃᑯᑦ, ᓲᖃᐃᒻᒪ ᐊᐅᔭᒃᑯᑦ ᐊᓯᐊᓃᓲᖑᖕᒪᑕ ᖁᑦᑎᖕᓂᖅᓴᒧᑦ ᐅᑎᕐᓂᐊᕋᓗᐊᖅᖢᑎᒃ ᐅᑭᐊᒃᓵᙳᖅᐸᑦ.

ᒪᑐᔾᔪᑎᖓ

ᑕᐃᒪ ᐃᓐᓇᕐᓂᒃ ᐊᐱᖅᓱᖃᑕᐅᕙᓚᐅᖅᓯᒪᒻᒥᒐᒪ ᑐᓵᔨᐅᖃᑕᐅᓪᓗᖓᓗ ᐊᒻᒪᓗ ᐊᓈᓇᒃᑯᒃᑲ ᐊᑖᑕᒃᑯᒃᑲ ᐱᕈᖅᓴᕐᕕᒋᓪᓗᒋᑦ. ᐃᓱᒫᓘᑎᖃᖅᐸᓚᐅᕐᒪᑕ ᐃᓕᓐᓂᐊᕐᕕᒻᒥ ᐃᓕᑦᑎᐊᕙᓪᓕᐊᒐᓗᐊᕐᒪᖔᑕ ᐊᒻᒪ ᐊᓈᓇᑦᓯᐊᒃᑯᒃᑲ ᐊᑖᑕᒃᓯᐊᒃᑯᒃᑲ ᑕᐃᒪᐃᑉᐸᓚᐅᕐᒥᔪᑦ. ᐱᕙᓪᓕᐊᓂᖓ ᐸᖕᓂᖅᑑᖅ, ᒪᑯᐊ ᖃᓪᓗᓈᑦ ᒐᕙᒪᐅᑎᖓ ᑎᑭᑉᐸᓪᓕᐊᓕᖅᑎᓪᓗᒍ ᓈᒻᒪᒃᑲᓗᐊᕐᒪᖔᑦ ᐅᖃᐅᑕᐅᖃᑦᑕᖅᑎᓪᓗᒋᑦ ᐃᖅᑲᐅᒪᑦᑎᐊᕋᒃᑭᑦ.

ᑕᐃᒪ ᐱᕈᖅᓴᓪᓗᖓ ᐊᐱᖅᓱᖅᐸᔪᒐᒃᑭᑦ ᖃᓄᐃᑉᐸᓐᓂᕋᑦᑕᓕ ᖃᓪᓗᓈᖃᓚᐅᖅᑎᓐᓇᒍ. ᐱᐅᓂᖅᓴᒥᒃ ᐃᓅᑦᑎᐊᕐᓇᕐᓂᖅᓴᒥᒃ ᐱᖁᔭᐅᕙᒃᑲᑦᑕ ᐃᓕᓴᕐᕕᒻᒨᕋᐃᒐᑦᑕ ᖃᓄᕐᓕ ᐃᓱᒪᓐᓇᖅᓯᕙᖅᑐᓂ ᑭᓱ ᐃᓐᓇ ᐱᐅᓂᖅᓴᐅᕙ. ᐃᓕᓐᓂᐊᒃᑲᓐᓂᕆᐊᖃᖅᑕᕗᙴᖅ ᐃᖅᑲᓇᐃᔭᖅᑖᕈᓐᓇᓛᕋᑦᑕ ᑭᓱᖃᑦᑎᐊᕐᓗᑕᓗ ᓈᒻᒪᒃᑎᐊᕐᓗᑕᓗ. ᑕᒪᒃᑯᐊᖑᕙᔪᒻᒪᑕ ᖃᓪᓗᓈᓂᒃ ᐱᐅᓯᖓᓂᒃ ᖃᐅᔨᒪᓗᐊᖅᑎᓐᓇᑕ ᓇᑭᙶᖅᓯᒪᒻᒪᖔᑕ. ᐊᑖᑕᒃᑯᒃᑲ ᐱᓗᐊᖅᑐᑦ ᐃᓄᐃᑦ ᐱᐅᓯᖏᓐᓂᒃ ᖃᐅᔨᒪᐃᓐᓇᖁᔨᓯᒪᒻᒪᑕ ᐊᒻᒪ ᑭᐅᔭᐅᕙᔪᒻᒥᔪᖓ ᑕᐃᒫ ᓂᕆᕙᒃᑲᑦᑕ ᓂᕿᒃᓴᖅᓯᐅᖏᓐᓇᖅᑐᒍ ᐃᒪᐃᓕᐅᖅᑐᑎᓪᓗ. ᑐᑭᓯᔪᒥᓇᖅᓯᒪᒻᒪᑦ ᐃᓕᓴᕐᕕᒻᒥ ᐃᓕᓴᔭᐅᓪᓗᑕ ᐱᐅᓂᖅᓴᒥᒎᖅ ᐋᓐᓂᐊᕐᓇᙱᑦᑐᒥᓪᓗ ᐃᓅᔭᕆᐊᖃᖅᑐᒍᑦ. ᑕᒪᒃᑯᐊ ᐃᓄᐃᑦ ᐋᓐᓂᐊᖏᑦ ᐱᐅᙱᒻᒪᑕ ᐃᒪᐃᓕᐅᖅᑕᐅᑦᑐᑕ. ᐃᓱᒪᓇᖅᓯᒪᒻᒪᑦ ᖃᓄᐃᑦᑑᓂᕆᐊᖏᑕ. ᓱᕈᓯᐅᓪᓗᖓᓕ ᖃᓪᓗᓈᖃᓚᐅᕋᑕ ᐱᐅᔪᒥᓂᐅᒋᐊᖓ ᐃᓱᒪᒋᖑᐊᖅᐸᔪᒐᒃᑯ, ᐃᓅᒐᔭᙱᓐᓇᒪ ᐱᐅᔪᒥᒃ ᐃᓅᓯᖃᙱᓐᓂᖅᐸᑕ, ᐃᒪᐃᓕᖃᑦᑕᓕᕐᖓᑦ ᑭᖑᕚᖃᙱᒻᒪᑕ ᐋᓐᓂᐊᕐᓇᑐᐃᓐᓈᓘᓐᓂᒃ ᐱᑕᖃᕐᓂᖅᑲᑦ.

ᕿᑭᖅᑕᓂᓕ ᖃᓪᓗᓈᓪᓗ ᐊᐱᖅᓱᖃᑦᑕᖅᑎᓪᓗᒋᑦ ᑐᑭᓯᐊᓕᓚᐅᖅᓯᒪᔪᖓ ᑐᑭᓯᐊᕙᓪᓕᐊᓪᓗᖓ, ᐃᓅᓯᖃᑦᑎᐊᖅᑐᒥᓃᑦ ᐊᓐᓇᐅᒪᓐᓂᑯᑦ ᖃᓪᓗᓈᑦ ᐋᓐᓂᐊᖏᓐᓄᑦ ᓄᖑᑲᓴᓚᐅᖅᓯᒪᓂᑯᐃᑦ ᑎᖑᔾᔭᕕᒻᒥᐅᑦ Cumberland Sound ᓂᕋᖅᑕᖅ. ᑕᐃᒪ ᒫᑯᓯᓗ ᖃᐅᔨᒐᓱᓕᓚᐅᖅᓯᒪᒐᓐᓄᒃ ᓈᓴᐃᓚᐅᖅᑎᓪᓗᖓ ᐅᐸᒃᑲᒃᑯ ᖃᒻᒪᐃᑦ ᐃᒃᑯᐊ ᑕᒫᓂ 40 ᖏᓐᓃᑲᓴᒃᑐᑦ ᕿᑭ&%

ᒪᑐᔾᔪᑎᖓ

ᐊᐱᖅᓱᕐᓂᒥᓂᖅ ᑕᕙᔪ.ᒋᓕᔅ ᕌᔅᒥᑦ, ᖃᐅᔨᒪᔨᑕᕐᒥᒃ

1840ᖏᓐᓂ, ᐊᕐᕙᒐᓱᖕᓂᖅ ᐱᒃᑯᓇᓗᐊᓚᐅᖅᓯᒪᙱᓚᖅ ᑭᓯᐊᓂ ᐅᓇᖕᒥᓱᓕᕋᒥᒃ ᐅᑮᔭᕆᐊᒃᓴᖅ ᑎᓄᔾᔨᕕᖕᒥ.

ᐅᑮᔭᕆᐊᒥᒃ ᑎᓄᔾᔨᕕᖕᒥ ᐃᓱᒪᒋᔭᐅᕐᖓᓚᐅᖅᓯᒪᕗᖅ ᒥᐊᓕᒐᕐᒥᐅᑦ ᐊᕐᕙᖕᓂᐊᖅᑎᖏᓐᓂᑦ, ᒪᒃᓕᓚᓐ ᓯᐊᓛᖏᓐᓂᓪᓗ, ᖁᓕᑦ ᒪᕐᕉᒃᓗ ᐊᖑᑎᑦ ᐅᑮᓚᐅᖅᓯᒪᖕᒪᑕ ᕿᒻᒥᖅᓱᒃᒥ. ᐅᔭᖅᑲᓂᒃ ᐊᕙᓗᓯᓪᓗᑎᒃ ᑭᑉᐹᕆᒃᑐᒥᒃ ᐃᒡᓗᓕᐅᓚᐅᖅᓯᒪᖕᒪᑕ ᐱᑕᖃᖅᑐᒃᓴᐅᕗᖅ ᓱᓕ ᐃᓂᒋᔭᕕᓂᖅ. ᐃᓄᖕᓂᑦ ᐊᓐᓂᖅᓱᖅᑕᐅᓪᓗᑎᒃ, ᐊᓐᓄᕌᖃᐅᖅᖢᑎᒃ, ᑭᓯᐊᓂᓕ ᐅᒥᐊᕐᔪᐊᖅᒥᓃᖢᑎᒃ ᖁᑭᐅᑦᑕᐅᔭᑎᒃ ᐊᖑᓇᓲᑎᑎᒃᓗ ᐱᓯᒪᓪᓗᒋᑦ ᓱᓕ. ᖁᓕᑦ ᐊᕐᕕᓂᓖᑦ ᐊᑕᐅᓯᕐᓗ ᐊᕐᕙᓚᐅᖅᑐᑦ ᐅᑭᐅᕐᒥ ᑕᐃᔅᓱᒪᓂ, ᐅᐱᕐᖓᕐᒪᑦ ᒪᐃᒥ.

ᐱᓂ ᑭᖑᓂᐊᒍᑦ ᐅᑮᓚᐅᖅᑐᖅ ᓄᕘᔭᒥ. ᐅᒥᐊᒥᓃᓚᐅᖅᑐᕐᓕ, ᓯᕗᓪᓕᖅᐹᕆᓚᐅᖏᒻᒪᒍ, 1850ᐅᑎᓪᓗᒍ ᕗᕌᖕᑭᓕᓐᒥᒃ ᐊᓯᐅᓂᑰᔪᒥᒃ ᐅᒥᐊᖅᑕᓕᔭᖅᑎᐅᓪᓗᓂ ᕿᓂᓚᐅᖅᓯᒪᖕᒪᑕ. ᐅᒥᐊᕐᔪᐊᖃᓚᐅᖅᑐᖅ ᒪᕐᕉᖕᓂᒃ ᑕᓪᓗᕈᒻᒧᐊᕋᒥᒃ, ᑐᕕᖔᕐᔫᑉ ᑕᕆᐅᖓᓄᑦ, ᐅᑮᓪᓗᑎᒡᓗ ᓯᑯᐃᓯᒪᓪᓗᑎᒃ, ᑕᒪᒃᑭᖅᖢᑎᒡᓗ ᕿᓂᖅᑐᕕᓃᑦ ᓲ ᔮᓐ ᕗᕌᖕᑭᓕᓐᒥᒃ. ᖁᓚᕈᓐᓃᕋᒥ ᐅᖃᓕᖅᑐᕕᓂᖅ, "ᖃᓄᐃᒻᒪᓪᓕᑭᐊᖅ ᓯᑯᐃᔾᔭᙱᓚᖓ ᑎᓄᔾᔨᕕᖕᒥ?" ᑲᔪᑦᑎᓯᓚᐅᖅᐹ, ᐱᒃᑯᓈᖅᓯᓚᐅᖅᑐᕐᓗ.

ᐊᑲᕐᕆᒃᑲᓐᓂᐅᔭᓕᖅᖢᓂ ᐃᓄᖕᓂᒃ ᐃᖅᑲᓇᐃᔭᖅᑎᖃᓕᕋᒥ ᑐᖅᑲᖅᑕᕐᕕᒋᓪᓗᒋᓪᓗ. ᐊᕐᕙᖕᓂᐊᖅᑏᑦ ᐅᒥᐊᓕᔭᕋᓗᐊᖅᖢᑎᒃ ᖃᐅᔨᓕᓚᐅᕐᒥᔪᑦ ᐃᓄᐃᑦ ᓇᖕᒥᓂᖅ ᐅᒥᐊᓕᒃᑕᙳᖅᑎᑕᐅᓪᓗᑎᒃ, ᐊᑲᕐᕆᒃᑲᓐᓂᐅᔭᕐᓇᖅᑐᖅ. ᐊᑭᓕᕆᐊᖃᕋᑎᒃᓗ, ᑮᓇᐅᔭᕐᓂᒃ ᑭᓯᐊᓂ ᐱᖁᑎᑖᖅᑎᑕᐅᖔᕐᖢᑎᒃ ᓂᕿᓂᒡᓘᓐᓃᑦ ᑕᕝᕚᑭᓂᒡᓗ ᐊᓯᖏᓐᓂᒃᓗ.

ᐱᓂᐅᑉ ᕿᒪᑯᕕᓂᖏᓐᓂᒃ ᐱᑐᖃᖅᑕᓕᒃ ᕿᑭᖅᑕᓐᒥ. ᒥᕐᖑᐃᖅᓯᕐᕕᐅᓕᖅᑐᖅ. ᓄᓇᓕᖅᑐᕐᕕᕕᓂᖓᓂ, ᐱᓂ ᐅᒥᐊᖁᑎᖃᐅᓚᐅᖅᐳᖅ ᓯᐊᓛᖏᓪᓗ ᓯᓈᓕᐊᕈᔾᔭᐅᕙᒃᖢᑎᒃ. ᑕᐃᔅᓱᒪᓂᐅᑎᓪᓗᒍ, ᐅᖓᓯᖕᓂᖃᓚᐅᖅᑐᖅ ᐊᕙᑎᑦ ᒪᐃᓕᒥᒃ. ᑕᒪᒃᑭᖅᖢᑎᒃ ᐊᕐᕕᕐᓂᐊᕈᑏᑦ ᑐᐲᓪᓗ ᓇᒃᓴᖅᑕᐅᓪᓗᑎᒃ. ᑐᐱᕐᒦᑉᐸᒃᖢᑎᒃ, ᓂᖅᖠᐅᖅᐸᒃᖢᑎᒃᓗ ᓇᖕᒥᓂᖅ. ᐊᕐᕕᖅᓯᔭᕌᖓᒥᒃ, ᐊᐃᔭᐅᑐᐃᓐᓇᖅᐸᒃᖢᑎᒃ. ᐊᒡᒋᔾᔨᔭᕌᖓᒥᒃ ᓯᓈᓄᑦ ᒪᓂᕋᕐᒥ ᐊᕐᕕᐅᖅᑕᐅᕙᒃᖢᑎᒃ, ᐅᖅᓱᐃᔭᖅᑕᐅᓪᓗᑎᒃ, ᖃᒧᑎᓄᑦ ᐅᓯᓕᖅᓲᔾᔭᐅᓪᓗᑎᒃ ᕿᑭᖅᑕᓐᒧᑦ ᐅᑎᐅᔾᔭᐅᔭᕌᖓᒥᒃ ᐅᒥᐊᕐᔪᐊᓄᑦ ᑐᖅᑯᖅᑐᖅᑕᐅᕙᒃᖢᑎᒃ. ᐊᕙᑎᑦ ᒪᕐᕉᒡᓗ ᖃᒧᑏᑦ ᐅᑎᖅᑕᕋᖅᐸᓚᐅᖅᐳᑦ ᐅᒥᐊᕐᔪᐊᓄᑦ ᐅᓯᓕᖅᓱᖅᑕᐅᕙᒃᖢᑎᒃ ᓯᓈᖓᓂᙶᕈᔾᔭᐅᔭᕌᖓᑕ. ᐅᑮᓂᕐᒥᓄᐃᓐᓇᖅ ᑲᔪᓯᓂᖃᑦᑎᐊᓕᓚᐅᕐᒪᑦ. ᐊᔪᕆᑕᐅᓕᓚᐅᖅᓯᒪᔪᖅ ᐅᓄᖅᑐᓄᑦ ᐅᒥᐊᕐᔪᐊᕐᓄᑦ ᑭᖑᓂᖓᒍᑦ, ᐊᔾᔨᐅᖏᑦᑎᐊᒻᒪᕆᒃᑐᒥᒡᓗ ᐊᕐᕙᖕᓂᐊᕈᓯᖅᑖᓚᐅᖅᓯᒪᕗᑦ.

ᐱᔭᐅᓯᒪᔪᖅ ᑐᐊᕋᑎ ᕼᐊᓕ ᐄᐴᑉ ᐊᐱᖅᓱᕐᓂᒥᓂᖓᓂᑦ ᓅᕖᕝᕙ

ᓱᓕ ᐊᒥᓲᕗᑦ ᑕᐃᔅᓱᒪᓂᓴᕐᓂᒃ ᕿᒪᑦᑕᐅᓯᒪᔪᓂᒃ ᐃᓄᐃᑦ ᐃᓅᓯᖏᓐᓂᑦ ᓱᓕ ᐅᓪᓗᒥᒧᓐ ᐊᑦᑐᐃᕙᑦᑐᓂᒃ, ᐱᖃᓯᐅᔾᔨᓪᓗᑎᒃ ᓂᔾᔭᐃᓯᔭᕐᓂᕐᒥᒃ. ᐃᓄᐃᑦ ᓱᓕ ᐃᓐᖏᕈᑎᓂᒃ ᐊᑐᓲᖑᕗᑦ. ᑲᐃᑉ ᕼᐃᕙᓐ ᓴᓂᐊᓂ, ᑖᓐᓇᐃᓛᒃ ᐊᕝᕙᒐᓱᐊᖅᕖᑦ ᐃᓚᒥᓂᖓᑦ, ᓄᓇᑕᖃᕐᓂᕐᒪᓐ ᓯᖓᐃᔭᖅᒥᓐ ᐊᑎᓕᒻᒥᒃ ᐃᓪᓗᒥᓂᖅᑕᖃᕐᓂᕐᖓᓐ ᕿᔪᓐᓂᒃ ᓱᓕ ᒪᑭᑕᔪᓂᒃ ᐊᕝᕙᒐᓱᐊᕐᓂᖅ ᐃᓱᓕᒻᒪᓐ ᕿᒪᑦᑕᐅᑐᐃᓐᓇᖅᑐᒥᓂᕐᓂᒃ. ᑕᐃᒃᑯᐊᓕ ᐃᓄᐃᑦ ᓯᖓᐃᔭᒥᐅᑕᐃᑦ ᐊᐅᓪᓚᕐᖓᑕ ᐃᓪᓗᐃᑦ ᕿᒪᑦᑕᐅᓪᓗᑎᒃ, ᐃᓐᖏᕈᑎᖏᑦᑕᐅᖅ ᕿᒪᑦᑕᐅᕙᑦᑐᒥᓃᑦ, ᐄᓛᒃ ᐊᒥᓱᓂᒃ ᕿᒪᐃᔪᒥᓃᑦ ᐃᓐᖏᕈᑎᓂᒃ. ᐅᑭᐅᖑᓂᓕᒫᖓᓂ ᑕᐃᑯᖓ ᕿᒪᑦᑕᐅᓯᒪᕙᑦᑐᒥᓃᑦ ᓱᕋᓐᓂᐊᖅᑐᒋᔭᐅᓪᓗᑎᒃ ᐃᖏᕐᕋᔭᒐᕈᓘᔭᖅᑎᓪᓗᒋᑦ. ᑕᐃᒪᓕ ᐊᕐᕌᒎᑉ ᐃᓗᐊᓂ ᐊᖅᑯᓵᕋᐃᒐᒥᒃ ᖓᐃᔭᐅᑉ ᓴᓂᐊᒍᑦ, ᐊᒥᓱᑦ ᐃᓚᒌᑦ ᐊᖑᓐᓇᓱᒋᐊᖅᑐᖅᑐᑦ ᓇᒧᕈᓘᔭᖅ ᑕᐃᑯᖓ ᓄᖅᑲᑲᐃᓐᓇᐸᑦᑐᒥᓃᑦ ᓂᔾᔭᐃᓯᔭᕐᓂᐊᕋᒥᒃ ᒧᒥᕈᓘᔭᕐᓂᐊᕋᒥᓪᓗ ᐅᓐᓄᐊᓕᒫᖅ ᑕᐃᒃᑯᓄᖓ ᐃᓐᖏᕈᑎᓄᑦ.

ᐃᓄᐃᓪᓕ ᐃᓐᖏᕈᑎᒥᓂᒃ ᕿᒪᐃᖃᑦᑕᖅᑐᒥᓃᑦ ᑕᐃᑯᖓ ᐃᓪᓗᒥᓂᕐᓄᑦ 1939ᒧᓐ, ᑕᐃᔅᓱᒪᓂ ᑐᑭᓯᓪᓚᕆᓐᓂᕐᖓᑕ ᐊᕝᕙᒐᓱᐊᖅᑏᑦ ᐅᑎᔾᔮᒍᓐᓃᕐᖓᑕ. ᑕᐃᒪᓕ ᐃᓄᐃᑦ ᐃᓚᓐᖓᖅᑎᕆᕙᓪᓕᐊᓕᖅᑐᒥᓃᑦ ᐃᓪᓗᐃᑦ ᕿᔪᖏᓐᓂᒃ ᐊᑐᖅᑕᐅᓂᐊᕐᖓᑕ ᑐᐱᕐᓄᑦ ᓇᑎᔅᓴᐅᓗᑎᒃ ᐊᓯᖏᓐᓄᓪᓗ. ᐊᑕᐅᓯᕐᒥᒃ ᐊᕐᓇᓗᑲᕐᒥᒃ ᐊᐱᖅᓱᔪᒐᒪ ᐊᓈᓇᖓ ᕿᒪᐃᖃᑦᑕᖅᑐᒥᓂᐅᓪᓗᓂ ᐃᓐᖏᕈᑎᒥᓂᒃ ᑕᐃᑲᓂ ᐃᓪᓗᕋᓛᒥ, ᐊᒻᒪᓗ ᐅᓂᒃᑳᔪᓪᓗᓂ ᓇᔅᓴᑦᑕᓯᓐᓇᓕᕐᓂᕋᒥᒋᑦ ᐃᓐᖏᕈᑏᑦ. ᐊᑕᐅᓯᖅ ᓱᕋᑦᑐᒥᓂᖅ ᓱᕈᓯᓛᓄᑦ ᓱᕋᐃᔭᖅᑕᒥᓂᐅᒻᒪᓐ, ᑭᓯᐊᓂᓕ ᐊᐃᑉᐹ ᐊᑯᓂᐊᓗᒃ ᐱᐅᔪᒥᓂᖅ. ᑕᐃᓐᓇ ᐃᓐᖏᕈᑎ ᑐᓴᖅᓴᐅᖃᑦᑕᖅᑐᒥᓂᖅ ᐅᒥᐊᕐᔪᐊᑉ ᐃᓗᐊᓂ ᐊᒻᒪᓗ ᐃᓄᐃᑦ ᓄᓇᓕᕋᓛᖏᓐᓂ ᐱᒻᒪᕆᐊᓘᓐᓂᕐᒪᓐ; ᐃᓄᐃᑦ ᓱᓕ ᐅᓪᓗᒥ ᐃᓐᖏᑎᑦᑎᕙᑉᐳᑦ ᓄᓇᕗᒻᒥ.

ᐊᕐᕌᒍᓄᑦ ᐊᒥᓱᑲᓪᓚᓐᓄᑦ ᓄᓇᒧᑦ ᑐᓚᔅᓯᒪᖃᑦᑕᖅᑐᑎᒃ ᓴᖓᒎᖅᐸᓪᓕᐊᕙᑦᑐᒥᓃᑦ ᓂᒋᕐᒧᓐ ᐊᒻᒪᓗ ᖃᐅᔨᓯᓐᓇᓕᖅᑐᒥᓂᐅᓪᓗᑎᒃ ᑎᓂᔾᔪᐊᖅᕕᒻᒥᒃ ᑕᒫᓂᓗ ᖃᐅᔨᔪᒥᓂᐅᓪᓗᑎᒃ ᐅᑭᐊᓪᓕᕕᔅᓴᐅᒻᒪᓐ ᐅᒥᐊᕐᔪᐊᖏᑦ ᓯᒃᑯᔾᔭᐅᑎᑕᐅᓯᒪᓗᑎᒃ. ᐊᒥᓱᓄᑦ ᐊᕐᕌᒍᓄ ᐊᕝᕙᒐᓱᐊᖅᕕᐅᓚᐅᖅᑐᖅ, 80 ᐊᕐᕌᒍᐃᑦ ᐅᖓᑖᓄᓪᓗ. ᑭᖑᓂᐊᒍᓪᓕ ᓴᓇᔪᒥᓃᑦ ᓄᓇᒥ ᐊᕝᕕᒐᓱᐊᖅᕕᓐᓂᒃ, ᑕᐃᒃᑯᐊᑦᑕᐅᖅ ᐃᓄᐃᑦ ᐃᓅᓯᖏᓐᓂᒃ ᐊᓯᔾᔩᓪᓚᕆᑦᑐᒥᓃᑦ. ᑭᖑᓂᐊᒍᓪᓕ ᐊᒥᐊᓕᑲᒃᑯᑦ ᐱᖃᑕᐅᓕᕐᓂᕐᒥᔪᑦ ᑕᒫᓂᓗ ᐊᖅᕕᒐᓱᐊᖃᑦᑕᓕᖅᑐᑎᑦᑕᐅᖅ. ᐊᒥᓱᑦ ᐃᓄᐃᑦ ᐃᖅᑲᓇᐃᔭᖃᑦᑕᖅᑐᒥᓃᑦ ᓯᒃᑳᑦᑎᒃᑯᓐᓄᑦ ᐊᒥᐊᓕᑲᒃᑯᓄᓪᓘᓐᓃᑦ.

ᒪᑐᔾᔪᑎᖓ

ᐊᓐᓄᓘ ᑎᐊᓚ

ᑕᐃᒪ ᓱᕈᓯᕈᓘᓪᓗᖓ ᖃᐅᔨᒪᐃᓐᓇᖃᑦᑕᔪᒐᒪᐃᓛᒃ ᐃᓄᓪᓚᕆᐅᓐᖏᓐᓇᒫ, ᐅᕕᓂᒐ ᖃᑯᖅᑕᐅᓪᓗᓂ, ᐃᓕᓴᔭᖅᑐᖃᑦᑕᓕᕋᒪᓗ ᐅᕕᓂᓐᓂᐊᖅᑎᑕᐅᕙᔪᒐᑦᑕ, ᐅᕙᖓᓗ ᕕᓕᓗ ᖃᒃᑯᑐᕈᓘᖃᑦᑕᔪᒐᓐᓄᒃ ᐃᓚᕗᒃ ᐃᓄᖅᐹᓘᑎᓪᓗᒋᑦ ᖃᑯᐃᑦᑐᑯᓘᑎᓪᓗᒋᓪᓖ, ᑕᕝᕙᓂ ᖃᐅᔨᓚᐅᖅᓯᒪᔪᖓ ᐃᓛᒃ ᖃᐅᔨᕙᓪᓕᐊᓕᓚᐅᖅᓯᒪᔪᖓ ᖃᓪᓗᓈᒥᒃ ᓯᕗᕚᖃᕋᑦᑖ.

ᐊᓈᓇᒐ ᐊᐱᕆᖃᑦᑕᓚᐅᖅᓯᒪᒐᒃᑯ ᑭᓇᒥᒃ ᐃᑦᑐᖃᕐᓂᕐᒪᖔᑦᑕ, ᐊᒻᒪ ᐅᖃᖃᑦᑕᖅᐸᔪᒻᒪᓐ ᐊᕝᕙᒐᓱᐊᖅᑎᒥᓂᐊᓗᒻᒥᒡᒎᖅ ᐅᒥᐊᕐᔪᐊᕐᒧᓐ ᑳᑉᑕᓐᒥᓂᐊᓗᒻᒥᒃ ᐊᑖᑕᒐ ᐊᑖᑕᖃᕐᓂᕐᖓᓐ, ᐃᑦᑐᖃᕐᓂᕋᑦᑕᒎᖅ ᖃᓪᓗᓈᕌᓗᒻᒥᓐ ᑖᕙᓐᖓᓐ ᓯᑳᑦᑕᓚᓐᒥᐅᑕᕐᒥᒃ. ᐊᓈᓇᒐ ᐅᓂᒃᑳᖃᑦᑕᔪᒻᒪᓐ ᐊᒻᒪᓗ ᑕᖁᕐᖁᔾᔨᕙᔪᓪᓗᓂ ᐊᔾᔨᓐᖑᐊᒥᓐ. ᐊᔾᔨᓐᖑᐊᖁᑎᖃᖅᐸᔪᒐᑦᑕ ᐅᒥᐊᕐᔪᐊᖅᓯᐅᓯᔭᓐᖑᐊᑎᐊᖅᑐᓂ ᓇᓴᖃᖅᑐᓂᓗ, ᓯᒡᒑᕈᓗᒻᒥᓪᓗ ᑎᒍᒥᐊᖅᑐᓂ ᐊᖑᑎᑦᑎᐊᕙᓐᖑᐊᕌᓗᒃ, ᐃᑦᑐᕗᒡᒎᖅ. ᐊᓈᓇᒐ ᐅᖃᖅᐸᔪᒻᒪᓐ, ᐊᑖᑕᒐᓕ ᐅᖃᖅᐸᔪᓐᖏᑦᑑᒐᓗᐊᖅ, ᐊᓈᓇᖔᕋ ᐅᓂᒃᑳᖅᐸᔪᔪᖅ ᐃᑦᑐᒥᓂᕆᒐᑦᑎᒍᒎᖅ ᑕᕝᕙ ᐊᒻᒪᓗ ᑎᐊᓚᒥᓂᕐᒥᒃ ᑎᐊᓚᒥᓂᐅᓪᓗᓂᒎᖅ. ᐅᖃᓚᐅᖅᓯᒪᒻᒪᓐ ᐊᓈᓇᒐ ᓯᑳᑦᑕᓚᓐᒥᐅᒥᓂᐅᒻᒪᒡᒎᖅ ᐃᑦᑐᒥᓂᖅᐳᑦ ᐊᒻᒪ ᑕᒪᐅᖓ ᑎᑭᖃᑦᑕᖅᑐᒥᓂᐅᓪᓗᓂ, ᐊᑖᑕᓐᓄᓐ ᑐᓂᓯᖃᑦᑕᖅᑐᒥᓂᐅᓪᓗᓂ, ᓇᔅᓴᖃᑦᑕᖅᑐᒥᓂᖅ ᑎᑭᒐᐃᒐᒥ ᐃᕐᓂᖓᑕ ᐱᑖᕆᓂᐊᖅᑕᖏᓐᓂᒃ ᐊᓐᓄᕌᓂᒃ ᓂᕿᓂᒃ ᐊᓪᓛᑦ ᐃᓐᖏᔫᖅᑖᑎᑦᑎᒻᒪᕆᓚᐅᖅᓯᒪᔪᕉᖅ.

ᐃᓱᒪᒌᓐᓇᓪᓚᕆᑉᐸᔪᒐᒃᑯᐃᓛᒃ, ᐃᖅᑲᖅᓴᕈᓘᔭᖅᑐᐊᓘᕙᑦᑐᖓᓗ ᖃᓄᖅ ᐃᓛᒃ ᓱᒻᒪᓐ ᐅᑎᒃᑲᓂᕐᓂᖏᒻᒪᖔᕐᓗ, ᓇᒥ, ᑖᕙᓂᓗ ᑐᖁᔪᒥᓂᐅᒋᐊᖓᓗ ᖃᐅᔨᒪᓇᖅᐸᔪᓐᖏᓪᓚᕆᒻᒪᓐ, ᐃᓚᖃᕐᒪᖔᑦᑕᓗ ᑖᕙᓂ, ᓄᓕᐊᖅᑖᑲᓐᓂᓂᖅᑲᓘᓐᓃᑦ ᐅᕝᕙᓘᓐᓃᑦ ᐅᒦᔭᖅᑐᒥᓂᐅᓗᓂ ᑐᖁᔪᒥᓂᕈᓘᕙᖃᐃ, ᑕᕝᕗᖓ ᖃᓄᖅ ᓇᓂᔭᔅᓴᐅᒐᔭᓐᖏᓚᖃᐃ? ᑕᐃᒫᒃ ᐃᓱᒪᐃᓐᓇᖅᐸᔪᒐᒪ.

ᐊᑖᑕᒐᐃᓐᓇ ᐅᓂᒃᑳᖃᕈᓐᓇᖅᐸᔪᓐᖏᓪᓚᕆᑦᑐᖅ ᐃᑦᑐᕐᒥᓃᒃ, ᐃᑦᑐᖃᓚᐅᖅᓯᒪᔪᒥᓂᐅᔮᔪᓐᖏᑦᑐᒍᓂᓛ ᐊᑖᑕᑦᑎᒍᓪᓖ ᑭᓯᐊᓂ ᐊᓈᓇᒐ ᐅᓂᒃᑳᖃᑦᑕᖅᑐᓂ ᖃᐅᔨᓚᐅᖅᓯᒪᔪᒍᑦ. ᐱᕈᖅᓴᓪᓗᖓ ᐃᓱᒪᐃᓐᓇᖅᑐᐊᓘᖃᑦᑕᖅᐸᔪᒐᒪ ᓇᓂᔭᔅᓴᐅᖏᑦᑑᒐᓗᐊᖅᑲᐃᖏᒃᑯᐊ ᐃᖅᑲᓇᐃᔭᖃᑎᒋᓚᐅᖅᓯᒪᔭᖏᑦ. ᐃᑦᑐᖅᐳᓪᓕ ᑐᖁᖓᔪᔅᓴᐅᓕᕐᖓᓐ ᑕᐃᒪᖃᐃ ᓇᓂᓯᒍᓐᓇᑦᑕᕈᒪ ᐅᒥᐊᕐᔪᐊᕐᒥᐅᖑᖃᑎᖓᑕ ᕿᑐᕐᖓᒥᓂᖓᓂᓪᓘᓐᓃᑦ, ᐊᔅᓲᓂᐊᔪᔪᖓ ᑕᐃᒪᐃᑦᑐᒥᒃ ᓇᓂᓯᒍᓐᓇᑦᑕᕈᒪ ᐅᓂᒃᑳᕈᓐᓇᓂᐊᖅᑐᒥᒃ ᐃᑦᑐᕋ ᖃᓄᐃᑦᑑᓂᕐᒪᖔᖅ.

ᒪᑐᔾᔪᑎᖓ

ᐊᓐᓄᓘ ᑎᐊᓚ

ᐃᑦᑐᖃᕐᓂᕋᖅᑕᐅᕙᔪᒐᑦᑕᐃᓛᒃ ᖃᓪᓗᓈᒥᒃ ᓯᑳᑦᑕᓚᓐᒥᐅᑕᕐᒥᒃ, ᖃᓄᐃᓕᑦᑕᓂᕐᒪᖔᖅ ᐃᓱᒪᒌᓐᓇᖅᑖᓗᒋᖃᑦᑕᓚᐅᖅᓯᒪᒐᒃᑯ ᖃᐅᔨᒍᒪᓪᓚᕆᑦᑐᖓᐃᓛᒃ ᐃᓱᒪᒋᖃᑦᑕᖅᐸᓚᐅᖅᓯᒪᒐᒃᑯ ᐱᕈᖅᐸᓕᐊᓪᓗᖓ ᐊᒻᒪ ᐃᖃᓗᓐᓄ ᐃᓕᓐᓂᐊᕆᐊᖅᓯᒪᓪᓗᑕ ᐅᖃᓕᒫᒐᖃᕐᓂᖅᓴᑯᓗᒻᒥ, ᐅᖃᓕᒫᒐᕐᓂᓂᓛᒃ ᐊᑐᐃᓐᓇᖃᕐᓂᖅᓴᐅᓕᓚᐅᖅᓯᒪᒐᑦᑕ ᐊᖅᕙᒐᓱᐊᕐᓂᐅᖃᑦᑕᖅᑐᒥᓂᕐᓂᒃ ᑕᒪᒃᑯᓂᖓ ᑎᑎᕋᖅᓯᒪᔪᓂᒃ, ᖃᐅᔨᕙᓪᓕᐊᓕᓚᐅᖅᓯᒪᒐᒪ ᓱᖃᑦᑕᓂᕐᒪᖔᑕ ᒫᓂ. ᑕᐃᒪᓕ ᑐᕌᕈᑎᓂᒃ ᕿᓂᖅᑐᐊᓘᖃᑦᑕᖅᐸᓕᔪᒐᒪ ᐱᕙᓪᓕᐊᔪᐃᑦ ᐅᖃᓕᒫᒐᐃᑦ ᑖᕙᓂ ᐃᓐᖓᓚᓐᒥ ᓯᑳᑦᑕᓚᓐᒥᓗ ᑐᕌᕈᑎᖏᓐᓂᒃ ᕿᓂᖃᑦᑕᐃᓐᓇᓕᓚᐅᖅᓯᒪᒐᒪ, ᐃᓐᖓᓚᒥᐅᒥᑦ ᑎᑭᑦᑐᖃᑐᐊᕋᐃᒻᒪᓐ ᐊᒻᒪ ᓯᑳᑦᑕᓚᓐᒥᐅᒥ ᑎᑭᑦᑐᖃᑐᐊᕋᐃᒻᒪᓐ ᖃᐅᔨᒐᐃᒐᒪ ᐊᐱᕇᓐᓇᓪᓚᕆᑦᑕᑯᓗᒋᕙᔪᒐᒃᑭᑦ, "ᑐᕌᕈᑎᒥ ᖃᐅᔨᒪᔭᖃᖅᑮᑦ ᐱᕙᓪᓕᐊᔪᓄᑦ ᐅᖃᓕᒫᒐᖃᖅᕕᓐᓂᒃ ᑖᕙᓂ ᑎᑎᕋᖅᕕᒋᓛᕋᒃᑭᑦ"? ᐊᒻᒪᓗ ᑎᑎᕋᕈᓘᔭᖅᑐᐊᓘᕙᑦᑐᖓ ᐊᑎᕋ ᐅᖃᖅᑐᒍ ᐊᒻᒪᓗ ᑭᓇᒥᒃ ᐃᑦᑐᖃᕐᓂᕐᒪᖔᕐᒪ, ᐊᒻᒪᓗ ᐆᒪᔪᖃᓐᖏᒃᑲᓗᐊᕐᒪᖔᖅ ᐃᓚᖏᓐᓂᒃ ᐊᐱᖅᓱᖅᑐᖓ. ᑭᓯᐊᓂ ᑭᐅᔭᐅᒍᓐᓇᖏᓪᓚᕆᑦᑐᑯᓘᕙᔪᔪᑦ, ᑭᐅᔪᖃᕈᓐᓇᖏᓪᓚᕆᑉᐸᔪᔪᖅ. ᑕᐃᒪᑐᐊᖅ ᐊᑕᐅᓯᖅ ᑭᐅᓚᐅᖅᓯᒪᔫᒐᓗᐊᖅ ᐊᔪᕆᖅᓱᐃᔨᐅᖃᑦᑕᖅᑐᒥᓂᖅ ᐅᐊᑦᑎᐊᕈ ᐃᓛ ᐃᑦᑐᕈᓗᒃ ᐃᓛ ᐃᑦᑑᕙᓗᔪᔪᕐᖏᓐᓇ ᒑᕕᓐ, ᒑᕕᓐᒥ ᐊᑎᓕᒃ. ᑕᐃᒪ ᑎᑎᕋᓚᐅᖅᓯᒪᔫᒐᓗᐊᖅ ᐱᐅᓐᖏᑦᑐᒥᑦ ᑭᓯᐊᓂ ᐅᖃᐅᓯᖃᑐᐃᓐᓇᖅᑐᓂ ᐅᓇ ᐊᑎᖅᐳᑦ ᑎᐊᓚ, ᑕᐃᓚᒦᓐᖔᖅᑐᒥᓂᐅᓗᓂ ᐊᑖᑕᖃᓐᖏᑦᑐᕈᓗᒻᒧᓐ ᐊᑎᖅᑖᕆᔭᒥᓂᕈᓘᒋᐊᖏᑕ, ᑕᐃᒫᒃ ᐅᖃᐅᓯᖃᑐᐃᓐᓇᖅᑐᓂ, ᐱᐅᓐᖏᑦᑐᒥᒃ ᐅᖃᐅᓯᖃᓚᐅᖅᓯᒪᒻᒪᑕ ᑕᐃᒃᑯᐊ ᐊᔪᕆᖅᓱᐃᔨᒃᑯᓂᓛᒃ, ᓈᒻᒪᒋᒍᓐᓃᓚᐅᖅᓯᒪᒐᒃᑭᑦ ᑕᐃᒃᑯᐊ, ᐊᓯᐊᒍᖔᖅ ᕿᓂᕋᓱᑦᑐᐊᓘᖃᑦᑕᓕᔪᒐᒪ ᐊᒻᒪᓗ ᓇᒧᕈᓘᔭᖅ ᐊᐅᓪᓚᕋᐃᒐᒪ ᖃᐅᔨᒐᐃᒐᒪᓗ ᐊᑎᕈᓯᓕᒻᒥᒃ ᑕᐃᓗ, ᐊᐱᕇᓐᓇᓪᓚᕆᑉᐸᔪᒐᒃᑭᒃ "ᖃᐅᔨᒪᕖᒃ ᑭᒃᑯᓐᓂᑦ ᓯᕗᕚᖃᕐᒪᖔᖅᐱᑦ, ᐃᓚᒌᑉᐱᓄᖅᑲᐃ? ᑭᓯᐊᓂᓕ ᐅᐊᑦᑎᐊᕈᒃᑲᓐᓂᐅᓕᖅᑎᓪᓗᒍ ᖃᐅᔨᓚᐅᖅᓯᒪᔪᖓ ᓯᓚᕐᔪᐊᕐᒥ ᑕᐃᓗᒐᓚᕐᔪᐊᖅᐹᓗᐃᑦ ᐊᒥᓱᕐᔪᐊᕌᓗᐃᑦ ᑕᐃᓘᒻᒪᑕ. ᓯᓚᐃᑦᑐᕕᔾᔪᐊᒥᓂᕈᓘᒐᒪ ᖃᐅᔾᔨᐊᓪᓚᔪᔪᖓᓕ ᑕᐃᓗᒥ ᑲᑎᓯᑦᑕᕐᓂᐊᕆᐊᔅᓴᖅ ᐅᐊᑦᑎᐊᕈᕐᓂᓴᒥᓂᐊᓗᒻᒥᒃ.

ᑭᓯᐊᓂᓕ ᖃᕋᓴᐅᔭᒃᑯᑦ ᓴᖅᑭᔮᕈᑎᓂᒃ ᓴᖅᑭᖅᑐᖃᖃᑦᑕᓕᖅᑎᓪᓗᒍ ᑐᑭᓯᕙᓪᓕᐊᓕᓚᐅᖅᒪᔪᖓ. ᕿᓂᕈᑎᑕᖃᕈᓘᔭᕕᐅᑎᒻᒪᓐ ᓯᕗᓂᒥᓂᑦᑎᓐᓂᒃ ᕿᓂᕈᒪᓗᓂ ᕿᓂᖅᕕᑦᑕᖃᕐᖓᓐ ᐊᒥᓱᐊᓗᓐᓂᒃ ᖃᕋᓴᐅᔭᒃᑯᑦ. ᐱᐅᔪᐊᓘᒐᓗᐊᑦ, ᑭᓯᐊᓂ ᐃᑲᔪᕐᓂᖃᓐᖏᑦᑎᐊᔪᒻᒥᔪᑦ ᐅᕙᓐᓂᒃ. ᐊᑎᒐᓛᓗᓐᓂᒃ ᓇᓂᓯᓂᕋᑦᑕᖅᑯᑦ ᑖᒃᑯᐊᒎᖅ ᒪᑐᐃᕈᒪᒍᒃᑭᑦ ᑭᓯᐊᓂ ᐊᐅᑦᑕᔫᕋ ᐊᑭᓕᔅᓴᓂᐅᑎᒐ ᑐᓂᒍᒃᑯ ᐊᑭᓕᕐᓗᒋᑦ ᒪᑐᐃᕈᓐᓇᑕᒃᑲ. ᑕᒪᓐᓇ ᑕᐃᒪᐃᓕᖃᑦᑕᖅᑐᕈᓗᑐᐃᓐᓇᐅᒻᒪᑕ ᓴᐱᓕᖅᔫᒥᒃᑲᓐᓂᓕᔪᒋᓪᓗᖓ.

ᑕᐃᒪᓕ ᓇᓂᓯᔪᐊᓘᑦᑕᓕᔪᒻᒥᒐᒪ ᑲᑎᒻᒪᔪᒻᒪᕆᑯᓗᓐᓂᒃ ᑐᕌᕈᑎᓂᒃ ᑐᕌᕈᑎᒐᓛᓗᓐᓂᒃ ᐱᕙᓪᓕᐊᔪᓄᑦ ᐅᖃᓕᒫᒐᕐᓄᑦ ᑐᕌᕈᑎᓂᒃ. ᑕᐃᒃᑯᐊ ᐊᑕᖏᑦᑎᐊᖅᑐᒋᑦ 20ᖑᓗᐊᖅᐸᓪᓚᐃᔪᔪᐃᓂᒃᑯᐊ ᑐᕌᕈᑏᑦ ᑖᔅᓱᒥᖓᔅᓴᐃᓐᓇᖅ ᑎᑎᖅᑲᒥᒃ ᐊᐅᓪᓚᑎᑦᑎᕕᒋᔪᒐᒃᑭᑦ ᐊᑎᖃᕐᓂᕋᖅᑐᖓ ᐋᓐᓄᓘ ᑎᐊᓚᒥᒃ ᐃᑦᑐᖃᓚᐅᖅᓯᒪᓂᕋᖅᑐᖓᓗ ᑳᑉᑕᓐ ᔮᓐ ᑭᐊᕆᓐᑕᓐ ᑕᐃᓗᒥᑦ. ᑕᐃᒫᒃ ᑎᑎᕋᖅᑐᖓ, ᐅᖃᖅᑐᖓ "ᖃᐅᔨᒪᓐᓂᕈᕕᐅᒃ, ᐅᕝᕙᓘᓐᓃᑦ ᐃᑦᑐᖅᐱᑦ ᖃᐅᔨᒪᓐᓂᖅᑲᒍ, ᐅᓂᒃᑳᖅᕕᐅᔪᒪᓪᓚᕆᒃᑲᓗᐊᕋᒪ ᖃᓄᐃᑦᑑᓂᕐᒪᖔᖅ ᑖᓐᓇ ᐃᑦᑐᒥᓂᖅᐳᑦ. ᑭᓯᐊᓂ ᑭᐅᔭᐅᕙᓪᓕᐊᖏᒻᒥᒻᒪᓐ ᐅᑕᖅᑭᑐᐃᓐᓇᐅᔭᓕᔪᔪᖓ ᖃᐅᔨᒋᐊᓚᐅᖅᐸᒃᑲᓗᐊᖅᑐᖓ ᓄᑖᒥᒃ ᕿᓂᖅᕕᔅᓴᒥᒃ ᓴᖅᑭᖅᑐᖃᓐᖏᒃᑲᓗᐊᕐᒪᖔᖅ.

ᑭᓯᐊᓂᓕ ᐊᕐᕌᒎᒃ ᒪᕐᕉᒃ ᓈᓯᒪᓕᖅᑑᒃ ᖁᕕᐊᓱᕝᕕᐅᑉ ᐅᓪᓗᖏᓐᓂ ᑎᑎᖅᑲᐅᓯᐊᖅᔫᒥᔪᐊᓘᓚᐅᖅᒪᒐᒪ ᓯᑳᑦᑕᓚᓐᒥᓐ ᐃᖕᖓᓚᓐᒥᓐ. ᔮᓐ ᒪᒍᐃᓐᒦᓐᖔᕐᓂᕋᖅᑐᓂ ᑕᐃᓐᓇ ᑎᑎᖅᑲᖅ, ᒪᑐᐃᑐᐊᕋᒃᑯᓗ ᐅᖃᑦᑕᐅᑎᒋᓯᒪᓪᓗᓂ "ᔮᓐ ᑕᐃᓗ ᐃᑦᑐᕆᓚᐅᖅᑕᕋ ᐊᒻᒪ ᐊᖏᕐᕋᖓᓂ ᐱᕈᖅᓴᔪᔪᖓ." ᑕᐃᒪᐃᓕᑦᑕᕐᖓᓪᓕ ᖁᕕᐊᑦᑐᖅᔪᐊᕌᓘᓪᓗᖓ ᖃᐃᒐᓪᓚᒻᒪᕆᑦᑐᖓ ᖁᕕᐊᓚᐅᖅᓯᒪᔪᖓ. ᑭᓯᐊᓂ ᑕᕝᕙᓂᔅᓴᐃᓐᓇᖅ ᑎᑎᖅᑲᖓᓂ ᐅᖃᖅᓯᒪᒋᓪᓗᓂ ᐅᑉᐱᕈᓱᑦᑎᐊᖏᓐᓂᕋᖅᑐᓂ ᐃᑦᑐᖓᒎᖅ ᐃᓄᑦᑎᐊᕙᐅᓐᓂᕐᖓᓐ ᑕᐃᒪᐃᓕᐅᕋᔭᖅᐸᓚᐃᓐᓂᖏᒻᒪᒡᒎᖅ ᑕᒫᓂ, ᐃᓄᒻᒥᓐ ᐊᐃᑉᐸᖃᕋᔭᖅᐸᓚᐃᓐᓂᖏᒻᒪᓐ ᑕᐃᒪᐃᓕᖓᑦᑎᐊᒻᒪᕆᑦᑐᓂ. ᑭᓯᐊᓂ ᒪᕐᕉᓐᓂᒃ ᐊᔾᔨᓐᖑᐊᖁᑎᖃᓚᐅᖅᓯᒪᒐᑦᑕ ᐃᑦᑐᖑᐊᑦᑎᓐᓂᒃ, ᐃᑦᑐᕆᓂᕋᖅᐸᑕᑦᑎᓐᓂᒃ ᐃᑦᑐᕆᒐᑦᑎᒍ ᖃᐅᔨᒪᒐᑦᑎᒍ ᐊᔾᔨᓐᖑᐊᖃᖅᑐᑕ ᒪᕐᕉᓐᓂᒃ. ᑕᐃᒃᑯᐊ ᖃᕋᓴᐅᔭᔭᒃᑰᕈᓐᓇᖅᓯᑎᕐᖄᓚᐅᖅᑐᒋᒃ ᐊᐅᓪᓚᖅᑎᓕᓚᐅᖅᓯᒪᒐᒃᑭᑦ ᐊᔾᔨᓐᖑᐊᒃ ᒪᕐᕉᒃ. ᑕᐃᒪᓕ ᑎᑎᕋᒃᑲᓐᓂᓕᕐᒥᒻᒪᓐ ᐃᒫᒃ ᑎᑎᕋᖅᓯᒪᔪᔪᖅ "ᐊᔾᔨᓐᖑᐊᒃ ᒪᑐᐃᖅᑲᐅᒐᒃᑭᒃ ᐊᒻᒪ ᐅᑉᐱᕆᑦᑎᐊᖅᑲᐅᖏᒃᑭᒃᑭᑦ ᓯᕗᓪᓕᖅᐹᒥ ᑖᓐᓇ ᐃᑦᑐᕆᒻᒪᖔᒃᑯ, ᑭᓯᐊᓂᓕ ᐊᓈᓇᒪ,"; ᑕᐃᒫᖏᓚ ᑕᐃᓐᓇ ᔮᓐ ᑎᑎᕋᖅᑐᒥᓂᐅᓪᓗᓂ; "ᐊᓈᓇᒪ ᓄᓕᐊᒪᓗ ᕿᒥᕐᕈᐊᕐᖓᒍ ᐊᓈᓇᒐ ᓂᓪᓕᑦᑕᐅᑎᒋᔪᔪᖅ ᐄ ᐊᑖᑕᒐᐅᓇ." ᖁᕕᐊᓇᓪᓚᕆᑦᑐᐊᓘᔪᔪᖅ ᑕᐃᒫᒃ ᑐᓴᖅᑐᓂ, ᐊᒻᒪ ᐅᖃᐅᑎᑦᑕᐅᑎᒋᓯᒪᔪᔭᕋ ᔮᓐ "ᐅᑉᐱᕆᓐᖏᒃᑯᕕᓐᖓ ᐊᐅᒐ ᐃᓚᓐᖓᖅᑕᐅᓗᓂ ᐅᕝᕙᓘᓐᓃᑦ ᖃᓂᕐᓂᒃ ᐃᓚᓐᖓᖅᓯᔪᖄᖅᔪᓪᓗᓂ, ᐊᐅᑦᑎᒍᑦ ᐃᓚᒌᒻᒪᖔᕐᓄᒃ ᖃᐅᔨᓴᖅᑕᐅᖁᔨᓪᓗᖓ. ᑭᓯᐊᓂᓕ ᐊᔾᔨᓐᖑᐊᑦ ᐊᐅᓪᓚᑎᖅᑳᓚᐅᖅᑐᒋᑦ, ᔮᓐ ᑎᑎᕋᓕᔪᔪᖅ, "ᐊᐅᑉᐳᒃ ᖃᐅᔨᓴᖅᑕᐅᒋᐊᖃᔾᔮᖏᑦᑐᑦ, ᐃᓪᓗᐊᕐᔪᒋᒋᒃᑭᑦ". ᑕᐃᒪᐃᓕᒻᒪᓐ ᖁᕕᐊᓇᓪᓚᕆᑦᑐᐊᓘᔪᔪᖅ. ᑕᐃᒪᓕ ᐃᓪᓗᐊᕐᔪᒋᕙᓕᖅᑲᕋ, ᐃᓪᓗᐊᕐᔪᒐᖃᑦᑕᐅᑏᓐᓇᖅᐸᓕᖅᑐᒍᒃ.

ᒪᑐᔾᔪᑎᖓ

Meeka Mike

ᐃᑦᑐᑲᓵᖑᔪᖓ ᒦᑲ ᒪᐃᒃ ᐸᖕᓂᖅᑑᒥ ᐃᓅᓐᓂᑰᔪᖓ. ᐊᑖᑕᒐ ᔭᐃᒥᓯ ᒪᐃᒃ, ᐊᑖᑕᖃᓚᐅᖅᑐᖅ ᑲᓇᔪᕐᒥᒃ, ᒪᐃᒃᒥᒃ ᐊᑎᖃᖅᑎᑕᐅᓪᓗᓂ. ᐊᓈᓇᒐ ᒥᐊᐱ ᐅᓈᐱᒃ. ᔨᒥ ᕿᓚᕝᕙᐅᑉ, ᐊᓗᕿᒃᑯᒃ ᐊᓈᓇᑦᑎᐊᕆᓚᐅᖅᑖᒃᑲ, ᐊᑖᑕᑦᑎᐊᕋ ᕿᓚᕝᕙᒃ. ᕿᓚᕝᕙᒃ ᐆᒪᓇᕐᔪᐊᒥ ᐃᓅᓐᓂᑯ. ᐊᒻᒪ ᐊᑖᑕᒪ ᐊᓈᓇᒃᑯᖏᓐᓂᒃ ᕿᑭᖅᑕᕐᒥᐅᖃᑦᑕᖅᑐᒥᓃᑦ ᐃᓚᖏᓪᓗ ᓯᐅᕌᐱᒃᑯᑦ. ᑕᐃᒃᑯᐊ ᑐᓴᐅᒪᔭᒃᑲ.

ᕿᑭᖅᑕᓂ ᐃᖅᑲᓇᐃᔭᖅᐸᓚᐅᖅᓯᒪᒐᒪ ᐃᑦᑕᕐᓂᓴᕐᓂᕆᖃᑕᐅᓪᓗᑕ ᐃᓐᓇᓪᓚᕆᒋᓚᐅᖅᑕᕗᑦ ᐸᖕᓂᖅᑑᒥ, ᑕᐃᓇᓃᖃᑕᐅᕙᒃᓯᒪᒻᒪᑕ ᐃᖅᑲᓇᐃᔭᕆᐊᖅᓯᒪᓪᓗᑕ. ᐊᐅᔭᓕᒫᖅ ᑕᐅᓇᓃᖃᑦᑕᔪᔪᒍᑦ ᐊᐱᖅᓱᖅᑕᖅᑐᑕ ᐊᒻᒪ ᑕᐃᓐᓇ ᒫᑯᓯ−ᓚᔭᐅᕙᒃᑐᖅ, ᒫᒃ ᔅᑏᕙᓐᓴᓐ ᐊᐱᖅᓱᖃᑦᑕᓚᐅᖅᑎᓪᓗᒍ ᐊᕐᕕᓐᓂᐊᕐᓂᐅᑉ ᒥᒃᓵᓄᑦ.

ᑕᐃᒃᑯᐊ ᐃᓐᓇᓪᓚᕆᐅᔪᔪᑦ ᕿᑭᖅᑕᓕᐊᕈᑎᒻᒪᒋᑦ ᐃᖅᑲᓇᐃᔮᓄᑦ ᐱᓪᓗᒍ. ᑕᒪᔾᔭ ᑐᓴᐅᒪᔭᒃᑲ. ᐃᓚᖏᑦ ᐅᖃᐅᓯᕆᔪᓐᓇᙱᓐᓇᒃᑭᑦ ᐳᐃᒍᐃᒻᒥᒐᒃᑭᑦ ᐃᓚᖏᑦ ᑕᐃᒃᑯᐊ. ᐃᓐᓇᐃ ᐊᐱᖅᓱᓚᐅᖅᓯᒪᒐᒃᑭᑦ ᑭᒃᑯᓐᓄᑦ ᖃᒻᒪᒥᓂᐅᒻᒪᖔᑕ ᑭᓱᖃᑎᒌᓪᓗ. ᐊᑕᖏᓚᐅᖅᓯᒪᙱᑦᑑᒐᓗᐊᑦ ᑖᒃᑯᐊ ᑕᐅᑐᒍᓐᓇᖅᑕᒃᑲ, ᖃᑦᓯᑦ ᑕᐃᑯᙵᕆᐊᓚᐅᖅᓯᒪᔪᑦ ᐊ'ᐊᖑᒍᓂ ᐊᒥᓱᐊᓗᓐᓂᒃ ᓱᕈᓯᐅᓪᓗᓂ ᑖᕙᓃᖓᓱᖅᑐᕕᓂᐅᓪᓗᓂ ᑐᐊᔪᓂᒃ 12 ᐊᕐᕋᒍᖃᖅᑐᓂ ᐊᐅᓪᓛᓕᕐᒪᑕ ᑕᐃᓇᖓᑦ ᑕᐃᒪᙵᓂ ᑕᑯᔭᕆᐅᖅᑐᓂ ᐃᓛᒃ ᑕᐅᓇᓃᔪᔪᒍᑦ ᕿᑭᖅᑕᓂ.

ᓂᖏᐅᑯᓘᓕᖅᑐᓂ 90-ᓂᒃ ᐊᕐᕋᒍᖃᓕᖅᑎᓪᓗᒍ ᐊᑭᕋᖅᑑᑎᕗᑦ ᓄᓇᖏᕈᑎᓚᐅᖅᓯᒪᔭᖏᑦ ᖁᕝᕕᐅᖅᑐᓂᓗ. ᐅᑯᐊᖑᓚᐅᖅᓯᒪᔪᒍᑦ ᐊᑭᕋᖅᑐᑕ. ᑰᓂᓘᓯ ᐊᓗᒋᑦᑐᖅ, ᔫᓕ ᒪᓐᓂᐊᐱᒃ, ᒧᓯᓯ ᑮᓇᐃᓐᓇᕐᓗᑭᐊᖅ ᐊᒻᒪ ᐅᕙᖓ ᖃᒻᒪᒥᓂᖓᓂᒃ. ᖃᒻᒪᒥᓂᖓᓃᓇᓱᒃᑐᑎᒍᑦ ᐊᖅᑯᓵᓚᐅᖅᓯᒪᔭᕗᑦ ᐅᖅᓱᓂᐅᕕᓂᓈᓗᐃᑦ ᑕᐃᒃᑯᓂᖓ ᐃᓂᒍᒪᒻᒪᑦ ᐃᓂᓚᐅᖅᓯᒪᔪᖅ ᐊᒻᒪ ᖃᒻᒪᒥᓂᖓᓄᐊᖅᑕᕆᕗᒍᑦ ᐊᐱᖅᓱᖅᑕᐅᓕᕆᓪᓗᓂ. ᖁᕝᕕᓂᐊᖅᓯᒪᔭᑐᐊᒪᐅᓐᓂᖓᓂᒃ ᑕᐃᒪᖓᑦ ᑐᑎᒋᓚᐅᖅᓯᒪᒻᒪᑦ 1983-84 ᓗᑭᐊᖅ. 1984 ᒥᐅᕙᓪᓚᐃᔪᖅ, ᑭᖑᓪᓕᕐᒥ ᑕᐃᑲᓂ ᐃᖅᑲᓇᐃᔭᖅᑎᓪᓗᑕ.

ᑕᐃᒪ ᐊᑖᑕᑦᓯᐊᕋ ᕿᓚᕝᕙᒃ ᐃᓅᓐᓂᑰᒥᓂᐅᒻᒪᑦ ᐅᓂᒃᑳᕐᕕᒋᒻᒪᑎᒃ ᓱᖅᑯᐃᓱᓐᓂᑯᓂᖏᓐᓂᓪᓗ. ᐊᓈᓇᑦᓯᐊᕋᓗ ᐅᑭᐅᖃᖅᑐᓂ ᑎᓴᒪᐅᕙᓪᓕᐊᔪᖅ, ᑕᐃᒪᖓᑦ ᓅᓐᓂᕐᖓᑕ ᐆᒪᓇᕐᔪᐊᒧᑦ ᑖᕙᖓᑦ ᑭᕙᓪᓕᕐᒥᑦ ᓴᓪᓕᕐᒥ, ᑲᔾᔭᖅᑕᕙᔪᒻᒪᑦ ᑐᒃᑐᒥᓂᖏᓐᓂᒃ. ᑖᕙᒃᑯᐊ ᑖᒃᑯᐊᓕ ᓱᖅᑯᐃᒋᔭᒃᑲ.

ᕿᑭᖅᑕᓃᑎᓪᓗᑕ ᓇᓄᕐᓂᒃ ᑎᑭᕌᖅᑕᐅᖏᓐᓇᖅᐸᔪᔪᒍᑦ ᖃᐅᑕᒫᐸᓗᒃ ᐊᒻᒪ ᑕᐃᓐᓇ ᑭᒐᕕᒃ ᐋᒐᔅᒥ ᑎᑭᔾᔭᐅᓕᕋᒥ ᑕᕝᕙᓂᑦᓴᐃᓐᓇᐸᓘᔮᖅᑐᖅ ᑕᐃᑯᖓᑦᓴᐃᓐᓇᖅ ᐱᖃᖅᐸᒃᑐᓂ.

ᑕᐃᒃᑯᐊ ᓯᕗᓕᑦᑕ ᐱᐅᓯᕆᕙᑦᑕᕕᓂᖓ ᐊᕐᕕᐊᕋᓱᖃᑦᑕᖅᑎᓪᓗᒋᑦ ᐊᒃᓱᐊᓗᒃ ᐃᓕᕝᕚᓪᓕᕐᕕᒋᓚᐅᖅᑕᒃᑲ ᐊᑐᖅᑕᐅᕙᒍᓐᓃᖅᑐᓂᒃ ᐃᓛᒃ ᐊᖑᓇᓲᕈᑎᕕᓂᖏᓐᓂᒃ ᐊᖑᑎᓄᑦ ᓇᓗᒋᔭᐅᙱᑦᑐᑦ, ᐊᕐᓇᐅᓗᓂᓕ ᐃᓕᑉᐹᓪᓕᕈᑎᒋᓚᐅᖅᑕᒃᑲ.

ᓯᕗᓂᖃᕋᑦᑕᒎᖅ ᐊᕐᕕᓐᓂᐊᖅᑏᑦ ᐅᒥᐊᕐᔪᐊᓂᒃ ᐃᓛᒃ ᖃᓪᓗᓈᓂ. ᑕᒪᒃᑯᐊ ᓱᕈᓯᐅᓪᓗᖓ ᖃᐅᔨᒪᓚᐅᖅᓯᒪᙱᑕᒃᑲ. ᐅᕕᒃᑲᐅᓕᖅᑎᓪᓗᑕ ᑐᑭᓯᕙᓪᓕᐊᓕᓚᐅᖅᑕᒃᑲ ᓯᕗᓕᖃᕆᐊᒃᓴᑦᑎᓐᓂᒃ ᐊᕐᕕᓂᐊᖅᑐᒥᓂᕐᓂ.

ᑕᐃᒃᑯᐊᓕ ᑎᑎᕋᓚᐅᖅᓯᒪᙱᓐᓇᒃᑭᑦ ᖃᑦᓰᑦ ᓇᓕᐊᖑᓐᓂᕐᒪᖔᑕ, ᐅᑯᐊᖑᓚᐅᖅᓯᒪᔪᑦ ᐃᓐᓇᓪᓚᕆᑯᓗᐃᑦ ᑕᐃᑦᓱᒪᓂ, ᖃᑦᑑᖅ, ᑕᐃᓐᓇ ᐊᑕᐅᑦᓯᒃᑰᖃᑕᐅᓚᐅᖅᓯᒪᙱᑦᑐᖅ, ᑖᒥ ᓄᕙᒃᑯᑦ, ᓄᕙᒃᑯᑦ, ᒫᑯᓯ ᐱᑦᓯᐅᓛᖅ, ᑯᓪᓗ ᐱᑦᓯᐅᓛᖅ. ᐊᒥᓱᑲᓪᓚᐅᕙᔪᒻᒥᔪᑦ ᑕᐃᒃᑯᐊ ᕿᑭᖅᑕᒥᐅᒐᔭᐃᑦ ᐃᓕᐊᐸᐃᕙᓪᓕᐊᓚᐅᖅᓯᒪᔪᑦ ᐊᙳᑎᓯᒪᔪᑦ ᐊᕐᕕᐊᕋᓱᖃᑦᑕᖅᑎᓪᓗᒋᑦ. ᐃᑦᑐᐊᖓᓪᓗ ᐊᒻᒪ ᐊᕐᓇᐅᓂᖏᓐᓂ ᓂᖏᐅᕈᓗᒐᓗ ᒪᓚᐃᔭ, ᐋᑯᓘᕙᓪᓚᐃᔪᔪᖅ, ᑖᒃᑯᐊ ᑕᕝᕙ ᐃᓐᓇᐃᑦ ᑖᕗᖓᐅᔾᔭᐅᓯᒪᔪᑦ.

ᒪᑐᔾᔪᑎᖓ

Meeka Mike

ᑕᐃᒃᑯᐊ ᑕᐃᒪ ᐊᐱᕆᔭᐅᕙᔪᒥᒻᒪᑕ ᐃᓐᓇᐃᑦ ᖃᓄᖅ ᐊᓯᔾᔨᖅᑎᓯᒪᒻᒪᖔᑦ ᐱᐅᓯᕗᑦ ᐃᓕᖅᑯᓯᕗᓪᓗ ᖃᓪᓗᓈᖅᑕᖃᓕᖅᑎᓪᓗᒍ ᐊᕐᕕᐊᕋᓱᖃᑦᑕᓕᖅᑎᓪᓗᒍ. ᑕᐃᒪ ᐅᖃᐅᓯᐅᓂᐊᖅᑲᐅᔪᖅ ᖃᓂᒪᓐᓃᑦ ᖃᓂᒪᖃᓐᓂᐅᓕᖃᑦᑕᖅᑐᒥᓂᖅ. ᐊᒻᒪ ᐊᕐᓇᐃᑦ ᓇᑦᑎᕋᓱᖃᑦᑕᖅᑎᓪᓗᒋᑦ ᐅᐱᕐᖓᒃᓴᒃᑯᑦ ᓯᓈᖓᓂ, ᐊᖑᑎᑦ ᐊᕐᕙᕋᓱᒃᑎᓪᓗᒋᑦ. ᐊᕐᕙᕋᓱᙱᑦᑐᑐᐃᓐᓇᐃᑦ ᑭᓱᑐᐃᓐᓇᐃᑦ ᓱᓇᓕᒫᒥᒃ ᐱᓇᓱᒃᑐᐃᑦ ᓇᑦᑎᓂᒡᓗ ᕿᓯᓂᒡᓗ ᐅᖅᓱᖃᐅᒻᒥᒻᒪᑕ. ᐊᖑᑏᑦ ᐅᓯᕙᒃᑐᒥᓃᑦ ᕿᓯᓐᓂᒃ, ᕿᓯᓐᓇᑦᑎᐊᒥᒃ ᐅᖅᓱᓕᐅᓐᓂᕈᑎᒃ ᐅᖅᓱᒃᓴᕋᑦᓴᒥᒃ ᐊᒻᒪ ᑕᐃᒃᑯᓂᖓ ᐱᑖᖅᐸᓪᓕᐊᖃᑦᑕᓕᖅᑎᓪᓕᓗᒋᑦ ᐸᓇᓂᒡᓗ, ᐊᒥᒃᑲᓐᓂᓪᓗ ᓂᕐᔪᑭᖏᓗᐊᖅ, ᐊᓕᒍᓂᒃ. ᑕᒪᒃᑯᐊ ᐱᐅᒋᔭᐅᓗᐊᖃᑦᑕᖅᑐᒥᓃᑦ, ᑏᓕᐅᕈᑏᓪᓗ. ᐊᒻᒪᓗ ᐊᕐᓇᐃᑦ ᓂᕆᒥᐊᕋᓂᓗ ᒥᖅᓱᒐᑦᓴᓂᒡᓗ ᓂᐅᕐᕈᑎᖃᑦᑕᕐᓂᕐᒥᔪᐃᑦ, ᐃᓛᒃ ᑕᐅᖅᓱᐃᓪᓗᑎᒃ ᑕᒪᔾᔭᐅᕙᒃᑐᒥᓃᑦ. ᓴᓇᔭᐅᓪᓗᑎᒃ ᐊᓐᓄᕌᖅᑕᖃᙱᒋᐊᖏᑕ ᖃᓪᓗᓈᓄᑦ ᐃᓅᑎᑦᑎᓪᓚᕆᒃᑐᒥᓃᑦ ᑕᐃᑦᓱᒪᓂ ᖃᓪᓗᓈᓂ ᐅᑭᐅᖅᑕᖅᑐᒥ ᖃᐅᔾᔨᔾᔪᑎᒥᓂᐅᙱᑦᑐᓂᒃ.

ᐊᒻᒪ ᓴᓇᕐᕈᑏ ᓴᕕᕋᔭᐃᑦ ᒪᑯᐊ ᓴᕖᑦ ᓴᕕᕋᔭᐃᑦ ᐱᓗᐊᖅᑐᑦ ᐅᖃᐅᓯᐅᕙᓚᐅᖅᓯᒪᔪᑦ. ᑕᐃᓐᓇ ᖁᑭᐅᕐᔪᐊᕌᓗᒃ ᑕᐃᒪ ᐅᓂᒃᑳᕆᔭᐅᑎᓪᓗᒍ ᐅᓗᕆᐊᓇᖃᑦᑕᖅᑐᒥᓂᐅᒋᐊᖅ ᐊᒻᒪᓗ ᑕᑯᔭᕆᐅᖃᑦᑕᑕᒥᓂᖏᓐᓂᒃ ᑭᓱᒥᒃ. ᖃᓪᓗᓈᑦ ᑭᓱᖏᓐᓂᒃ ᓂᕿᖏᓪᓗ ᑕᒪᒃᑯᐊ ᐅᓂᒃᑳᕆᔭᐅᖃᑦᑕᔪᔪᑦ.

ᑕᐃᒃᑯᐊᓕ ᐅᑉᐱᕐᓂᕐᒧᑦ ᐊᓯᔾᔨᑯᒥᓃᑦ ᐊᔪᕆᖅᓱᐃᔨᖃᖅᑐᑎᒃ ᑎᑭᑉᐸᓐᓂᕐᒪᑕ ᓘᑦᑖᖃᑦᑕᖅᑐᓪᓗ, ᐊᔪᕆᖅᓱᐃᔨᒧᑦ ᐅᑉᐱᕐᓂᕐᒧᑦ ᓵᑎᑕᐅᕙᓪᓕᐊᓕᖅᑎᓪᓗᒋᑦ. ᐃᓚᖏᑦ ᐳᐃᒍᕋᒃᑭᑦ ᐃᓄᐃᑦ ᐱᐅᓯᖓᓐᓂᒃ ᒪᓕᒍᓐᓃᖅᑐᑎᒃ. ᐃᓚᖏᑦ ᐃᓛᒃ ᐅᑉᐱᕐᓂᒧᑦ ᓵᒐᓱᓕᖅᑎᓪᓗᒋᑦ ᑕᒪᒃᑯᐊ ᒪᔾᔭ ᐊᓯᔾᔨᕈᑎᓯᒪᔪᒥᓂᐅᒋᐊᖏᑕ ᐅᓂᒃᑳᔪᕙᔪᔪᑦ.

ᑕᒪᒃᑯᐊ ᑐᓴᐅᒪᔭᐅᔭᕆᐊᓖᑦ ᐊᕐᕕᓐᓂᐊᖅᑎᒥᓃᑦ ᑕᒪᐅᖓ ᐊᕐᕕᓐᓂᐊᕋᓱᒃᐸᒃᑐᒥᓃᑦ ᐅᑭᐅᖅᑕᖅᑐᒧᑦ, ᖃᓪᓗᓈᑦ ᑎᑭᑉᐸᓪᓕᐊᓕᕐᒥᓂᖓ ᑐᓴᐅᒪᔭᐅᓪᓚᕆᒋᐊᓕᒃ ᕿᑐᕐᖓᑦᑎᓐᓄᑦ ᑐᑭᓯᐅᒪᔾᔪᑕᐅᒃᑲᓐᓂᖁᓪᓗᒍ ᐃᓛ ᐃᓅᖃᑎᒌᓐᓂᕐᒧᓪᓗ ᐊᒻᒪ ᑭᓱᑦ ᐱᐅᔫᓯᒪᒻᒪᖔᑦ ᑕᒪᒃᑯᐊ ᐃᓕᒍᑕᐅᓲᖑᒻᒪᑕ. ᑐᓴᐅᒪᙱᒃᑯᕕᑦ, ᐅᓪᓗᒥ ᐃᓅᓯᖃᓕᕐᒪᑕ ᐊᓪᓛᑦ ᐃᓅᓯᕆᔭᑦᑕ ᐱᕈᖅᓴᖅᑎᓪᓗᑕ ᐊᔾᔨᒋᙱᒋᒐᓛᓕᖅᑕᖓᓂᒃ ᐊᑲᕐᕆᔾᔪᑎᖏᓪᓗ ᐱᙳᐊᕈᑎᓂᒡᓗ ᐱᓂᖅᓴᐅᔮᓕᖅᑐᑎᒃ. ᑕᒪᓐᓇ ᐱᕙᓪᓕᐊᒥᓂᖓ ᑕᑯᒋᐅᖃᑦᑕᒥᓃᓪᓗ ᐃᓄᐃᓪᓗ ᖃᓪᓗᓈᓪᓗ ᑐᓴᐅᒪᔭᐅᖏᓐᓇᕆᐊᓖᑦ. ᑕᐃᒃᑯᐊᓗ ᐅᓂᒃᑳᖅᑐᒍ ᐃᓚᒌᓐᓂᓪᓗ ᐅᓂᒃᑳᕈᑕᐅᕙᓐᓂᙱᑦᑐᖅ ᖁᓚᕐᓇᙱᑦᑐᖅ ᓇᒦᑉᐸᓐᓂᒥᓂᖏᓐᓂ, ᐃᓕᓴᔭᐅᖏᓐᓇᓚᐅᕋᑦᑕ ᓇᒥ ᓄᓇᖃᖃᑦᑕᕐᓂᕐᒪᖔᑕ ᓯᕗᓕᕗᑦ. ᐅᐸᔅᓯᒍᓐᓇᕋᐃᒐᑦᑕ ᐃᓛᒃ ᓄᓇᒥᓂᖏᓐᓄᑦ ᐃᓚᖏᑦ ᐅᐸᐃᓐᓇᙱᒃᑲᓗᐊᖅᑐᑎᒍ ᑐᓴᐅᒪᖏᓐᓇᖅᑎᑕᐅᓲᑐᖃᐅᒐᑦᑕ ᑕᒪᒃᑯᓂᖓ. ᑕᐃᒫᑦᑕᐅᖅ ᐊᕐᕙᕋᓱᖃᑦᑕᖅᑐᒥᓃᑦ ᑕᒪᐅᖓᖅᑐᒥᓂᐅᓂᖏᓐᓂᒃ ᑐᓴᐅᒪᔭᐅᑲᐃᓐᓇᕆᐊᖃᕐᒥᔪᖅ ᐱᔾᔪᑎᒋᓪᓗᒍ ᖃᓪᓗᓈᑦ ᒪᐅᙵᕆᐅᖃᐅᓂᑯᐊᓘᓐᓂᕋᖃᑦᑕᑉᐸᔪᒻᒪᑕ ᑕᐃᒪᐃᑎᓐᓇᒍ.

ᒪᑐᔾᔪᑎᖓ

ᐃᑦᑐᐊᖓᑦ

ᐊᐱᖅᓱᖅᑎ:

ᑕᐃᒪ ᐱᕈᕐᓂᑰᖅᑰᕋᕕᑦ ᐊᖅᕙᓐᓂᐊᖅᑎᐅᖃᑦᑕᑎᓪᓗᒋᑦ ᑕᒫᓂ ᕿᑭᖅᑕᓂ. ᐅᓂᒃᑳᖅᕕᒋᔪᓐᓇᖅᐱᑎᒎᑦ ᖃᓄᖅ ᐊᐅᓚᔨᔭᓐᓂᒃ ᑕᐃᒃᑯᐊ ᓯᒃᑳᑦᑎᓄᓪᓗ ᐃᒻᒪᖃᓘᓐᓃ ᐊᒥᐊᕆᑲᒥᐅᓐ ᐊᖅᕙᓂᐊᖅᑎᖏᑦ ᑕᒪᐅᓐᖓᐸᓪᓕᐊᓕᖅᑎᓪᓗᒋᑦ ᐱᒋᐊᕈᕕᑦ ᖃᓄᖅ ᐊᐅᓚᔨᔭᖃᕐᒪᖔᖅᐱᑦ ᑕᐃᒃᑯᓂᖓ ᐊᖅᕙᓂᐊᕐᓂᐅᖃᑦᑕᓚᐅᖅᑐᓂᒃ?

ᐃᑦᑐᐊᖓᑦ:

ᑕᐃᒃᑯᐊᓕ ᐊᒥᐊᓕᑲᒥᐅᑦ ᖃᐅᔨᓚᐅᓐᖏᑕᒃᑲ, ᑐᓴᐅᑕᐃᓐᓈᓚᐅᖅᑕᒃᑲᓕ ᑕᐃᓐᓇ ᐃᓪᓗᒥᓂᖓ ᑕᑲᓐᓇᐅᒐᓗᐊᖅᑐᓂ, ᓱᓕ ᓯᓂᕝᕕᖏᑦ ᑕᒪᔾᔭᐅᑎᓪᓗᒋᑦ ᖄᖅᑎᖓᓂ ᑕᑉᐹᓂ ᖁᓛᓂ, ᐊᖑᓚᐅᖅᑕᕋᓗᐊᒃᑲ. ᐃᓛ ᓱᖅᑯᐃᒋᐊᕐᔪᑕᒃᑲ, ᐃᒫᒻᒪᕆᐊᓘᓐᖏᑕᒃᑲ. ᑕᐃᒫᒃ ᑕᑉᐸᐅᓇ ᖁᓛᒍᑦ ᓯᓂᕝᕕᓕᐊᓘᓐᓂᕐᖓᑕ. ᑕᑲᒃᑯᐊᓕ ᑲᒪᒋᓚᐅᓐᖏᑕᒃᑲ ᐅᖃᐅᓯᑐᐃᓐᓇᐅᑎᓪᓗᒋᓪᓕ, ᖃᓪᓗᓈᖃᓚᐅᓐᖏᑐᓪᓕ ᑕᐃᔅᓱᒪᓂ.

ᐊᐱᖅᓱᖅᑎ:

ᑕᐃᒪ ᑖᒃᑯᐊ ᐊᖅᕙᓂᐊᖅᕕᒥᓂᐅᔪᑦ ᖃᓄᖅ ᐋᖅᑭᓱᖅᓯᒪᓂᖃᓚᐅᖅᑲᓐ ᑕᑲᓇᓂ ᕿᑭᖅᑕᓂ?

ᐃᑦᑐᐊᖓᑦ:

ᑖᒃᑯᐊᓕ ᐊᐃᑉᐸᖏᑕ ᖃᐅᔾᔨᑎᓪᓚᕆᒻᒪ ᐱᖏᑦ ᑕᕝᕙᓂ ᐅᐱᕐᖔᖑᓕᕋᐃᒻᒪᓐ, ᐋᒡᒌᓯᖃᐃ ᐱᒋᐊᓕᖅᑎᓪᓗᒍ, ᐴᖅᑲᑕᐅᑦᑎᐊᖅᐸᓚᐅᖅᑐᑦ ᐸᓂᖅᓯᐊᖑᓪᓗᑎᒃ ᑕᒪᒃᑯᐊ ᑭᓱᑦ ᐅᒥᐊᑦ ᐃᓗᓕᖏᑦ ᐊᕝᕙᒐᓲᑎᓪᓚᕆᖏᑦ. ᐴᖅᑲᖅᑕᐅᔭᕇᑦᑎᐊᕋᒥᒃ ᐅᒥᐊᖏᓪᓗ ᑖᕗᖓ. ᑕᐃᒫ ᖃᐅᔨᕙᓪᓕᐊᓕᓚᐅᖅᑕᒃᑲ ᑕᐃᒫᖏᓐᓈᖅᑐᑦ ᐊᕐᕌᒍᑕᒫᑦ. ᑖᕗᖓ ᐃᓪᓗᖓᑕ ᓯᕗᕌᓄᑦ ᐅᓰᔭᖅᑕᐅᓪᓗᑎᒃ ᖃᑦᑕᐅᔭᓂᒃ ᐃᑯᕐᕋᖅᑐᒋᑦ ᐊᔭᒃᑭᑕᐅᑦᑎᐊᖅᑐᑎᒃ ᐊᔭᒃᑭᕝᕕᖃᖅᑐᑎᒃ, ᑕᐃᒫ ᓴᓂᓕᕇᑯᓘᓪᓗᑎᒃ. ᐊᐅᔭᒃᑯᑦ ᓱᓇᐅᕝᕙ ᐸᐃᔪᖁᑎᖏᓐᓄᑦ ᐃᖅᑲᓇᐃᔭᕈᒫᕐᓂᐊᖅᑐᓄᑦ, ᐃᒫ ᐊᒥᓲᓐᖏᑦᑐᑦ ᑕᔭᐅᓐᖏᑐᓪᓘᓐᓃᑦ (ᖁᓕᐅᓐᖏᑐᓪᓘᓐᓃᑦ) ᐃᖅᑲᓇᐃᔭᖅᑐᔅᓴᖁᑎᖏᑦ ᕿᒪᑦᑕᑐᐊᑦ. ᕿᒪᑦᑕᑑᒻᒪᑕ ᑖᒃᑯᐊ ᐊᒥᐊᖅᑕᐅᓛᖅᑐᑦ ᐊᑐᕇᕐᓂᐅᒻᒪᑕ ᐅᐱᕐᖔᖓᓂ. ᑕᕝᕙ ᑕᐃᒪᐃᓕᖓᓕᕐᖓᑕ ᐱᔭᕇᖅᑕᐅᓂᐅᓕᖅᑐᑎᒃ, ᐅᒥᐊᕐᔪᐊᑕᖃᖅᑎᓪᓗᒍᓗ ᖃᐅᔨᓚᐅᖅᑐᖓ ᑕᐃᒫ ᑖᒃᑯᐊ ᐃᖅᑲᓇᐃᔭᖅᑎᑑᕗᑦ. ᐊᐅᔭᓕᒫᖅ ᐃᖅᑲᓇᐃᔭᖅᑐᑦ, 6-ᑐᐃᓐᓇᐃᓘᓐᓃᑦ.

ᐊᐱᖅᓱᖅᑎ:

ᑖᒃᑯᐊ ᐊᖅᕙᓂᐊᖅᑏᑦ ᑖᕙᓐᖓᓐ ᓯᑳᑦᑕᓚᓐᒦᓐᖔᖃᑦᑕᖅᓯᒪᔪᑦ, ᐊᐅᔭᐅᓕᕋᐃᒻᒪᑦ ᑭᓯᐊᓂ ᐅᒥᐊᖅᑐᓇᖅᓯᔭᕋᐃᒻᒪᓐ ᑕᒪᐅᓐᖓᖅᐸᓚᐅᖅᐸᓐ ᐅᕝᕙᓘᓐᓃᑦ ᐅᑭᐊᓪᓕᕙᓚᐅᖅᑲᓐ ᑕᒫᓂ?

ᐃᑦᑐᐊᖓᑦ:

ᐅᑭᐊᓪᓕᓚᐅᓐᖏᑐᓪᓕ ᖃᐅᔨᑎᓪᓗᖓ, ᐅᑭᐊᓪᓕᕙᑦᑐᒥᓂᐅᒐᓗᐊᒡᒎᖅ ᓯᕗᓂᓐᓂ, ᒫᓐᓇᓕ, ᐃᓛᒃ, ᐅᑭᐊᓪᓕᔪᖃᖅᑎᓪᓗᒍᒎᖅ ᐃᓅᓂᒥᓂᐅᕗᖓ, ᐊᑕᐅᓯᕐᒥᒃ ᑭᖑᓂᒃᑲᓐᓂᐊᓂ ᑐᓴᓚᐅᓐᖏᑦᑐᖓ ᐅᑭᐊᓪᓕᔪᒥᓂᕐᓂᒃ. ᐃᓅᓂᒥᓂᐅᕗᖓᒎᖅ ᐅᑭᐊᓪᓕᔪᖃᖅᑎᓪᓗᒍ.

ᐊᐱᖅᓱᖅᑎ:

ᑕᐃᒪ ᐊᐅᓚᔨᕖᑦ ᖃᑦᑎᓂᓪᓘᓐᓃᑦ ᐊᕐᕌᒍᖃᐸᓗᑦᑐᑎᑦ, ᐅᕕᒃᑲᐅᓕᖅᑐᑎᓪᓘᓐᓃᑦ ᑖᒃᑯᓄᖓ ᐊᖅᕙᓂᐊᖅᑎᓄ ᐱᖃᑕᐅᖃᑦᑕᓕᓚᐅᖅᑭᓐ?

ᐃᑦᑐᐊᖓᑦ

ᐅᕕᒃᑲᕈᓚᐅᓐᖏᑦᑐᖓ ᑕᐃᔅᓱᒪᓂ, ᐃᒫᒃ ᐃᓄᑑᓇᖓᓘᓐᓃᑦ ᐱᒐᓱᐊᕈᓐᓇᑎᓐᓇᖓ, ᑭᓱᓂᒃ ᐆᒪᔪᒐᓚᓐᓂ ᐱᒐᓱᐊᖃᑕᕈᓘᓕᕋᓗᐊᖅᑎᓪᓗᖓ ᑕᐃᒪ ᐃᓚᐅᔭᕐᓃᓇᕐᒧᑦ ᑭᓯᐊᓂ ᐱᑎᓪᓗᖓ ᐊᖅᕙᓂᐊᖅᑎᓄᑦ ᐃᓚᓕᐅᔾᔭᐅᔪᔪᖓ ᓈᒻᒪᖏᒻᒪᑕᒎᖅ. ᑕᐃᒪ ᓱᓇᐅᕝᕙ ᐃᓕᓵᖑᒐᓱᔅᓯᓇᕐᓂᕋᓗᐊᕋᒪ, ᑕᐃᔅᓱᒪᐃᓛ ᐊᖏᔪᖅᑳᕆᔭᑦᑕ ᐊᒻᒫᓕᐅᑉ.

ᐊᐱᖅᓱᖅᑎ:

ᐊᒻᒫᓕᐅᑉ?

ᐃᑦᑐᐊᖓᑦ:

ᐄ, ᐊᒻᒫᓕᐅᑉ

ᐊᐱᖅᓱᖅᑎ: ᑕᐃᓐᓇ ᐊᒻᒫᓕᒃ ᐊᕝᕙᓂᐊᖅᑎᓄᑦ ᐊᐅᓚᑦᑎᔨᐅᖏᓐᓇᖃᑦᑕᓚᐅᖅᑲ?

ᐃᑦᑐᐊᖓᑦ:

ᐄ, ᖃᐅᔨᑎᓪᓗᖓᓕ ᐱᒋᔭᐅᖏᓐᓇᓚᐅᖅᑐᖅ, ᖃᓪᓗᓈᖃᕋᓗᐊᖅᑐᑎᒃ. ᑖᓐᓇ ᓲᕐᓗ ᒪᑯᓂᖓ ᓂᕿᖏᓐᓂᒃ ᖃᓪᓗᓈᑦ ᑲᒪᔨᑐᐃᓐᓇᐅᓗᐊᖅᑑᔮᖅᑐᖅ.

ᐊᐱᖅᓱᖅᑎ:

ᑖᓐᓇ ᖃᓪᓗᓈᖅ?

ᐃᑦᑐᐊᖓᑦ:

ᐄ, ᖄᓪᓗᓈᖅ, ᐊᐅᓚᑦᑎᔫᔮᓐᖏᑦᑐᖅ ᑕᒪᒃᑯᓂᖓ ᐊᖅᕙᒐᓲᑎᓂᒃ, ᓇᑦᑎᕋᓲᑎᓂᓪᓗ, ᑭᓱᓂᒃ ᓴᒃᑯᓂᒃ ᑲᒪᓪᓗᐊᖅᑑᔮᓚᐅᓐᖏᑦᑐᖅ ᑕᐃᓐᓇ, ᐊᒻᒫᓕᒃᑕᐃᒪ ᐊᖏᔪᖅᑳᓪᓚᕆᒋᓚᐅᖅᑕᖓᓕ ᑕᒪᒃᑯᓄᖓ ᓯᓚᓯᐅᑎᓄᑦ.

ᐊᐱᖅᓱᖅᑎ:

ᑕᐃᒪ ᖃᐅᔨᔭᐅᖃᑦᑕᓕᖅᐸᓪᓕᐊᓕᕋᕕᑦ ᐊᖅᕙᓂᐊᖅᑎᑯᓐᓄᑦ ᓱᕈᓯᐅᓪᓗᑎᖏᓛᒃ ᓱᓇᓕᕆᖃᑦᑕᓚᐅᖅᑭᓪᓕ ᑕᕝᕙᓂ ᐊᖅᕙᓂᐊᖅᑎᓪᓗᒋᑦ?

ᐃᑦᑐᐊᖓᑦ:

ᐊᕝᕙᓂᐊᖅᑎᓪᓗᒋᑦ ᐃᓚᓕᐅᑎᓚᐅᕐᓇᖓᓕ ᑕᒫᓂ ᐅᐃᕖᓴᖅᑎᕈᓗᑐᐃᓐᓇᐅᓚᐅᕐᒥᔪᖓ ᐃᓛᓪᓕ ᓄᓇᓕᒻᒥ, ᐃᓛ ᐃᓚᐅᔭᖅᑐᐊᓘᓕᕋᓗᐊᖅᑎᓪᓗᖓ ᐱᓇᓱᐊᖃᑕᐅᓕᕋᓗᐊᖅᑐᖓ ᑭᓯᐊᓂ ᑭᓱᓗᑦᑎᓪᓗᒋᑦ ᐊᖑᓚᐅᕋᒃᑭᑦ...

ᒪᑐᔾᔪᑎᖓ

ᐃᑦᑐᐊᖓᑦ:

ᖁᑭᐅᓪᓗᑎᓪᓗᒋᓪᓘᓐᓃᑦ, ᐊᖑᑎᒥᓂᕐᒪ ᑭᓯᐊᓂ ᖁᑭᐅᑎᒥᓂᖓᓂ ᖁᑭᐅᑎᖃᓐᖑᐊᕈᓗᒐᓱᑉᐸᑦᑐᖓ, ᐊᑐᐃᓐᓇᕐᓇᒍᑦᑕᐅᖅ, ᓴᒃᑯᖃᓐᖏᒻᒪᓐ. ᑕᐃᒫᒃ ᐃᓚᓕᐅᔾᔭᐅᓕᔪᔪᖓ ᐃᒫᒃ ᐃᐳᖃᑦᑕᓕᓂᐅᓐᖏᒻᒪᕆᑦᑐᖓᓘᓐᓃᑦ ᑭᓯᐊᓂ ᐃᓚᓕᐅᔾᔭᐅᒐᒪ ᐃᒫᒃ ᐱᕈᕇᓐᖏᑦᑐᕈᓘᓯᒪᒐᒪ, ᐱᕈᖅᓯᒪᓗᐊᓐᖏᓐᓇᒪᐃᓛᒃ, ᐃᐳᐃᓐᓈᑎᓪᓗᒋᓪᓕ ᐃᑭᒪᔪᔅᓴᐅᓚᐅᕋᓗᐊᖅᑐᖓ ᑕᒪᓐᓇ ᐱᔭᖅᑭᐅᑎᒋᓐᖏᑖᓗᒋᑲᐃᓐᓇᓚᐅᖅᓯᒪᒐᒃᑯ ᐃᓚᓕᐅᔾᔭᐅᒐᒪ.

ᐊᐱᖅᓱᖅᑎ:

ᐊᕝᕙᓐᓂᐊᖃᑦᑕᖅᑐᑦ ᑖᒃᑯᐊ ᐊᐅᓚᐅᑎᖃᓐᖏᑎᐊᖅᑐᑎᒃ?

ᐃᑦᑐᐊᖓᑦ:

ᐄ, ᐊᐅᓚᐅᑎᓂᒃ ᖃᐅᔨᓚᐅᓐᖏᑦᑐᖓ ᓱᕈᓯᐅᑎᓪᓗᖓ. ᑭᓯᐊᓂ ᑕᑲᓄᖓ ᑕᐃᓐᓇ ᑐᔪᐃᔨᖓᓐ ᐊᐅᓚᐅᑎᓕᒻᒥᓐ ᐅᒥᐊᖅᑕᖃᕐᒪᑕ ᒥᑭᔪᑯᓗᒻᒥᓐ, ᑕᐃᒪ ᐊᐅᓚᐅᑎᓕᒻᒥ ᐅᒥᐊᑐᐃᓐᓇᕐᒥ ᖃᐅᔨᔾᔪᑎᒋᓚᐅᖅᓯᒪᔭᕋ.

ᐊᐱᖅᓱᖅᑎ:

ᖃᓄᕐᓂ ᑕᐃᒪ ᑖᒃᑯᐊ ᐊᖅᕙᓐᓂᐊᖅᑏᑦ ᐊᐅᓚᐅᑎᖃᓐᖏᑦᑐᑎᒃ ᐊᓐᖑᑎᔪᓐᓇᖅᓯᖃᑦᑕᓚᐅᖅᑲᑦ ᐊᖅᕕᒻᒧᓐ?

ᐃᑦᑐᐊᖓᑦ:

ᐃᒃᑯᐊᓕ, ᕿᒫᓐᖏᒪᓪᓕ ᑭᓱᒥ ᖃᐅᔨᓚᐅᕋᓂ, ᐊᖅᕕᖅ. ᐃᖏᕐᕋᓐᖏᑐᐊᕋᒥ, ᐃᒻᒥᓂᒃ ᐃᖏᕐᕋᓐᖏᑐᐊᕋᒥ ᖃᐅᔨᓯᒪᓐᖏᓐᓇᒥ, ᕿᑲᕐᖓᓐ. ᐃᖏᕐᕋᐅᔮᖅᔪᑦᑐᐊᓘᒐᓗᐊᕐᖏᓛᒃ, ᕿᑲᕐᖓᓐ, ᐊᓄᕌᖅᑎᓐᓇᒍ. ᐃᒫᒃ ᕿᒫᓐᖏᓐᓇᒥᓗ ᐃᒻᒥᓂᓪᓗ ᐃᖏᕐᕋᖏᓐᓇᒥ, ᑕᒫᓂ ᐃᖏᕐᕋᔪᐊᓘᓐᖏᒪᓪᓕ ᐅᐸᑦᑕᐅᑐᐃᓐᓇᓪᓚᕆᑦᑐᖅ ᐃᓛᓐᓂᑦ ᐅᐱᓐᓇᕋᓂ ᐊᖅᑲᕐᒪᑕᐃᒪ ᖃᒪᔭᖅ, ᖃᐅᔨᒪᕕᓪᓖ ᖃᒪᔪᒥᒃ?

ᐊᐱᖅᓱᖅᑎ:

ᖃᒪᔪᒥᒃ ᖃᐅᔨᒪᓐᖏᑎᐊᕐᒥᔪᖓ.

ᐃᑦᑐᐊᖓᑦ:

ᐅᑕᖅᑭᔭᖓ ᐳᐃᓂᐊᕐᓂᖓᓂᑦ. ᐅᑕᖅᑭᔭᖓ ᐳᐃᔭᕆᐊᖓ. ᐸᕐᓇᓯᒪᑦᑎᐊᓕᖅᑐᑦ ᑕᒪᒃᑯᐊ ᐋᖅᑭᓱᖅᓯᒪᓕᖅᑐᑦ ᐊᓕᒃᑯᖏᑦ ᓈᒪᑦᑎᐊᓕᖅᑐᑎᒃ ᐅᑕᖅᑭᑐᐃᓐᓇᓕᖅᑯᑦ ᑕᕝᕙ. ᐅᖅᓱᐊᖅᑐᐊᓘᒻᒪᓐ ᑕᐃᒃᑯᓄᖓ ᐊᖕᒎᑎᓄᑦ ᑭᓯᐊᓂ ᑐᓴᕐᓂᐅᓴᒻᒥᒪᒡᒎᖅ ᓴᕙᓗᓗᐊᖅᑐᒥᒃ.

ᐊᐱᖅᓱᖅᑎ:

ᐊᖑᐊᖅᑐᑎ ᑭᓯᐊᓂ ᑕᐃᒫᒃ ᑖᕗᓐᖓᐅᔭᖅᑐᑦ?

ᐃᑦᑐᐊᖓᑦ:

ᐄ, ᐳᑦᑕᓕᕐᖓᓐ, ᑕᕝᕙᓕ ᑕᐃᒫᒃ ᑕᒪᓐᓇ ᐅᖅᓱᐊᕐᒪᓐ ᑕᐃᒪᐃᑦᑐᒧᓐ ᐱᔭᐅᒻᒪᓐ, ᐅᖅᓱᐊᖏᒻᒪᓪᓕ ᒪᓕᒐᔮᑦᑐᕈᓘᒻᒪᓐ ᐃᐳᒻᒧᓐ, ᐃᒫᒃ ᐊᒃᓱᐊᓗᒃ ᐃᐳᖃᑕᐅᖁᔭᐅᑐᐃᓐᓇᖅᑐᐊᓘᓯᒪᕗᖓᓕ ᐊᒃᓱᐊᓘᖅᑎᑕᐅᓪᓗᑕ ᐳᑦᑕᓂᖓᓂ. ᑕᕝᕗᖓᓕ ᐊᓱᐃᓪᓛ ᐱᖃᑕᐅᒐᒪ ᑕᕝᕙ ᐱᒋᐊᓐᖑᓱᑦᑐᖅ ᑕᕝᕙᑦᑎᐊᖑᒻᒪᓐ, ᐊᕙᓐᖓᑦ ᐲᖅᑕᐅᒐᒪ ᐃᔅᓱᒪᓐᖓᓐ ᐊᑦᑐᓈᕌᓗᐃᑦ ᓯᐊᓐᓂᐊᓗᐃᑦ ᐃᓂᖓᓃᒃᑲᒪ, ᑕᐃᑯᓐᖓᖅᑕᐅᒐᒪ ᑕᐃᑯᓐᖓᖅᑐᖃᖔᖅᑐᓂ ᐃᓂᓐᓄᑦ, ᑕᕝᕙᓕ ᑖᓐᓇ ᑕᑯᓐᓇᕋᒃᑯ, ᐊᒃᓲᓚᔭᐅᓪᓗᖓ ᓱᓕ, ᕿᕕᐊᕐᓂᐅᓴᔪᐊᓗᑐᐃᓐᓇᐅᒐᒪ, ᐊᔅᓱᕈᑦᑕᑐᐃᓐᓇᕇᖅᑕᐅᖃᑦᑕᔪᒐᒪ, ᐃᓅᓱᓗᐊᒧᖅᑲᐃᓐᓇ ᖃᐅᔨᒪᓐᖏᒧᓐ. ᐊᓱᐃᓪᓛᒃ ᑕᕝᕙ ᑕᕝᕙᑦᑎᐊᕌᓘᓕᕐᖓᓐ ᖁᑭᕐᒪᒍ, ᑕᐃᓐᓇ ᓇᐅᓕᒃᑲᓐᓂᕈᓐᓇᖅᑐᓂᐅᒃ, ᑕᕝᕙᓕ ᐊᓱᐃᓪᓛᒃ ᕿᓗᖅᑭᓚᐅᔾᔮᓐᖏᓚᕐᓕ, ᐄ ᑕᐃᓐᓇ ᐃᑦᑐᕋᖅ ᐃᑦᑐᕋᕐᒥᒃ ᑕᐃᔭᕗᑦ, ᓯᕗᐊᑕ ᖄᖓᓂ ᐊᓕᖅ, ᖁᑭᐅᑎᖓᑕ ᐊᓕᖓ. ᑕᐃᓐᓇ ᕿᓗᖅᑭᓚᐅᓐᖏᓐᓂᖓᓂ, ᑕᒪᓐᓇ ᐊᓕᒻᒪᕆᐊᓗᒃ ᐃᑯᖓ ᐊᓂᒡᒍᖅᓯᒪᔪᖅ ᕿᓚᔅᓱᖅᓯᒪᔪᖅ ᓯᕗᐊᓄᑦ, ᓯᕗᑉ ᐃᒪᐃᓕᖓᓂᖓᓄ ᐅᖓᑖᓄᑦ, ᑕᐃᒃᑯᐊ ᕿᓕᕐᓂᐊᓗᖏᑦ, ᕿᓗᖅᑭᑦᑐᐊᓘᒻᒪᓪᓕ ᑭᓯᐊᓂ ᐊᔅᓱᐊᓘᖅᑐᖅ.

ᐊᐱᖅᓱᖅᑎ:

ᐊᒃᓱᕈᑲᓪᓚᑦᑐᐊᓘᒐᒦ?

ᐃᑦᑐᐊᖓᑦ:

ᐋ, ᐊᔅᓱᕈᑲᓪᓚᑦᑐᐊᓗᒃ. ᑕᐃᑲᓗ ᐃᓐᓇ ᐅᖓᑖ ᑕᐃᓐᓇ ᐊᑐᐃᓐᓇᕆᓐᖏᓇᑦᑎᒃᑯ, ᑕᐃᓐᓇ ᐅᖓᑕᖏᖅᓯᒪᔭᖓ ᐊᓕᕐᒥᑦ ᑕᕝᕙᓐᖓᓐ ᐊᐳᓐᖓᓐ, ᑕᐃᓐᓇ ᐲᔾᔭᐃᒃᑯᓰᓯᒪᔪᐊᓘᒻᒥᒻᒪᓐ ᑕᐃᓐᓇ ᐊᖁᑦᑐᖅ. ᑖᓐᓇ ᐅᕘᓇ ᓯᐊᑦᑐᐊᓘᒻᒪᓐ, ᐸᐅᓐᖓᔾᔭᐃᖅᓯᒪᔭᖓ.

ᐊᐱᖅᓱᖅᑎ:

ᐃᒪᐃᓕᖓᔮᓗᑐᐃᓐᓇᕆᓕᖅᑕᖓᓕ?

ᐃᑦᑐᐊᖓᑦ:

ᐄ, ᐃᒪᐃᓕᖓᔮᓗᐊᓕ, ᐅᓇ ᐃᒪᐃᓕᐅᖅᑐᐊᓘᒻᒪᓐ, ᒪᓐᓇ ᓯᐊᑦᑐᐊᓘᒻᒪᓐ, ᑖᓐᓇ ᑕᐃᒪᐃᓕᐅᖅᑐᐊᓘᒻᒪᓐ, ᐃᒫᓂᓪᓗ ᑕᐃᒪ ᐊᓯᐊ ᑕᐅᓇᓐᖓᓐ ᑯᕝᕕᓴᖅᑐᐊᓗᒃ.

ᐊᐱᖅᓱᖅᑎ:

ᑯᕝᕕᓴᖅᑐᖅ?

ᐃᑦᑐᐊᖓᑦ:

ᐄ, ᐃᒫᓂ ᑕᐅᓇᓐᖓ ᖃᓗᔪᐊᓘᓯᒪᔪᖅ, ᑕᐃᑲ ᓄᖅᑲᐅᒥᑐᐃᓐᓇᕋᐃᒻᒪᓐ ᐳᑦᑐᑐᐊᓘᓕᖃᑦᑕᕐᖓᓐ ᐅᓇ ᐅᖓᑕᖏᖅᓯᒪᔭᖓ, ᐃᖏᕐᕋᔪᐊᓗᒃ. ᐅᒥᐊᓪᓗ ᐊᐃᑉᐸᖏᑦ ᑕᕝᕙᓃᓕᕇᖅᑐᑦ, ᕿᒪᑦᑕᐅᔭᐃᖅᓯᒪᔪᑦ, ᐄ.

ᐊᐱᖅᓱᖅᑎ:

ᑖᓐᓇᓕ ᑭᓯᐊᓂ ᐊᖅᕕᒃ ᑖᔅᓱᒪ ᓲᕐᓗ ᐊᒻᒫᓕᐅᑉ ᓇᐅᓕᑦᑕᖓᕙ

ᐃᑦᑐᐊᖓᑦ:

ᐊᓯᐊᓄᓪᓕ ᑯᓪᓘᒻ, ᑯᓪᓗᒧᓪᓕᑦᑕᐅᖅ ᐱᔭᐅᔪᔪᖅ.

ᐊᐱᖅᓱᖅᑎ:

ᑕᐃᓐᓇᓕ ᓱᓇᓕᕆᔨᐅᓪᓗᓂ ᐊᒻᒫᓕᒃ?

ᐃᑦᑐᐊᖓᑦ:

ᐄ, ᐱᖃᑎᐊᓗᒃ, ᐱᖃᑎᐊᓘᓕᖅᐸᑦᑐᖅ, ᓯᕗᑎᑐᖃᒥᓂᐊᓘᒐᒥ.

ᐅᖃᖅᑎ:

ᑖᒃᑯᐊᓕ ᑐᓴᖅᓴᐅᑲᓐᓂᓛᕐᒪᑕ ᑐᑯᒃᓴᐅᓗᑎᒃ ᐱᓇᓱᐊᕈᓯᒋᓛᖅᑕᑎᓐᓂ ᐅᓂᒃᑳᖅᑐᑦ ᐊᖅᕙᓐᓂᐊᕐᓂᐅᑉ ᒥᔅᓵᓄᑦ ᒫᓐᓇᓕ ᑖᒃᑯᐊ ᐊᔾᔨᓐᖑᐊᑐᖃᐃᑦ ᑕᐃᑦᑐᓴᓂ ᐊᔾᔨᓕᐅᒐᒥᓃᑦ ᑕᑯᑦᓴᐅᑲᐃᓐᓇᖅᑐᓐ.

ᒪᑐᔾᔪᑎᖓ

ᔪᐊᕕ ᐊᓕᕙᖅᑕᖅ

ᔪᐊᕕ:

ᖃᓄᐃᓕᐅᖅᕕᐅᖃᑦᑕᖅᑐᒥᓂᐅᒻᒪᖔᑕ ᓄᖅᑲᖃᑦᑕᕐᓗᓄᒃ ᐅᓂᒃᑲᐅᑎᕙᓪᓕᐊᓂᐊᕋᒃᑭᑦ, ᑕᐃᒃᑯᓇᓐᖓᑦ ᐃᓐᓇᕆᔭᑦᑎᓐᓂᒃ

ᑐᓴᐅᒪᔭᓐᓂᒃ.

ᐊᐱᖅᓱᖅᑎ:

ᐊᑏᕌᓗᒃ

ᔪᐊᕕ:

ᑕᐃᒪ ᐅᓂᒃᑲᐅᔾᔨᖃᑦᑕᓲᖑᒐᒪ ᖃᓪᓗᓈᓂᓪᓗ, ᖃᓪᓗᓈᓄᓕᓛ ᐅᐸᑦᑕᐅᒐᓚᓗᐊᕐᓂᖅᓴᐅᓲᖅ, ᐃᓄᓐᓄᑦᑕᐅᖅ ᐅᐸᑦᑕᐅᓲᖑᒐᓗᐊᖅ ᖃᓪᓗᓈᑦ ᐊᒥᓲᓂᖅᓴᐅᓲᑦ ᐊᐅᔭᒃᑯᑦ, ᐅᑭᐅᒃᑯᓪᓕ ᐅᐸᑦᑕᐅᓗᐊᖃᑦᑕᖏᑦᑐᖅ ᖃᓪᓗᓈᓄᑦ.

ᐊᐱᖅᓱᖅᑎ:

ᒫᓐᓇᓖ ᓄᓇᒋᔭᐅᖃᑦᑕᔾᔭᒍᓐᓃᖅᑐᖅ?

ᔪᐊᕕ:

ᐄ, ᑕᕝᕙᓂᒥᐅᑕᖅᑕᖃᕈᓐᓃᖅᑐᖅ ᒫᓐᓇ ᑭᓯᐊᓂ ᐹᓂ ᖃᓂᒋᔮᓂ ᓄᓇᓕᕋᓛᖅᑕᖃᕐᒥᔫᒐᓗᐊᖅ ᐃᓛᒃ ᐅᑭᐅᒃᑯᑦ ᑕᒫᓂᒥᐅᑕᐅᖏᓐᓇᖅᑐᐃᑦ, ᑕᕝᕙᓂᐅᓐᖏᑦᑐᖅ ᑖᔅᓱᒪ ᕿᑭᖅᑕᐅᑉ ᐃᓚᖓᓂᐅᓐᖏᑦᑐᖅ.

ᐊᐱᖅᓱᖅᑎ:

ᑭᑦᑐᕆᐊᓕᕈᓘᒃ?

ᔪᐊᕕ:

ᑭᑦᑐᕆᐊᖅᓯᑎᐅᒻᒪᑦᑕᐅᖅ ᑖᓐᓇ ᓄᓇᒋᔭᖅ, ᐃᓛ ᒪᑯᐊ ᐱᕈᖅᕕᐅᓯᒪᓂᖓᓄᑦ, ᑕᐃᒪ ᐅᖃᕋᑖᕋᒪ ᒪᑯᐊ, ᓄᖅᑲᖃᑦᑕᕐᓗᑕ, ᓄᖅᑲᖃᑦᑕᕐᓗᓄ ᐅᓂᒃᑲᐅᑎᖃᑦᑕᕐᓂᐊᕋᒃᑭᑦ, ᓯᕗᓪᓕᖅᐹᒥ ᑭᓯᐊᓂ ᑐᓴᖅᑎᒍᒪᑐᐃᓐᓇᕆᒃᑭᑦ, ᐃᓛ ᑕᐃᒪᐃᓕᐅᓲᖑᒐᒪ ᖃᓪᓗᓈᓄ ᐳᓛᕆᐊᖅᑐᓄᑦ. ᒫᓐᖓᓐ ᑭᓱᑐᐃᓐᓇᕐᒥᓐ ᐱᑐᖃᒥᓂᕐᒥᓘᓐᓃᑦ ᑎᒍᖃᑦᑕᖁᔨᓇᑕ ᑖᒃᑯᐊ ᑕᒫᓂᒥᐅᑕᒥᓃᑦ ᑭᖑᕚᑦᑎᓐᓄᑦᑕᐅᖅ ᑕᑯᔭᐅᖃᑦᑕᓛᕐᒥᒻᒪᑕ, ᑭᒃᑯᑐᐃᓐᓇᕐᓄᑦ ᐱᒋᔭᐅᒻᒪᑕ. ᑕᐃᒫ ᑎᒍᓯᖃᑦᑕᖁᔨᓲᖑᓐᖏᑦᑐᒍᑦ ᑕᒫᓂ ᐊᒻᒪᑦᑕᐅᖅ ᓴᓂᓐᓂᒃ ᒪᐅᖓᑐᐃᓐᓇᖅ ᐃᒋᑦᑎᖃᑦᑕᖁᔨᒐᑕ, ᑖᒃᑯᐊ ᓴᓃᑦ, ᐅᒥᐊᒥᓕ ᓴᓂᒃᑯᕕᑦᑕᖃᕐᖓᓐ, ᐃᓛ ᓄᓇᒋᔭᖅᐳᑦ ᓴᓗᒪᑎᒐᓱᒋᐊᖃᕋᑦᑎᒍ, ᓲᕐᓗ ᐃᒪᐃᑦᑐᓂᒃ ᑕᑯᖃᑦᑕᖏᓪᓗᑕ, ᓴᐅᓂᕐᓂᓘᓐᓃᑦ, ᑕᕝᕙ ᑖᒃᑯᐊ ᑕᕝᕙᓃᖏᓐᓇᕋᓱᐊᕐᖓᑕ. ᐊᒻᒪᓗ ᒪᐅᓇ ᐱᓱᕝᕕᐅᖏᑦᑐᒃᑯᑦ ᓇᐅᒃᑯᕈᓘᔭᑐᐃᓐᓇᖅ ᐱᓱᖃᑦᑕᖁᔨᓲᖑᓐᖏᒻᒥᔪᒍᑦ ᑕᒫᓂ ᓱᕋᐃᓂᐅᓴᓂᖏᓐᓄᑦ, ᒫᓂ ᑕᕐᕆᓯᒪᑐᐃᓐᓇᕐᖓᑕ ᑕᐃᒃᑯᐊ ᐅᐊᑦᑎᐊᕈᕐᓂᓴᐃᑦ, ᐃᓛ ᐱᑐᖃᒥᓃᑦ. ᑖᕗᓐᖓᐸᓪᓕᐊᓗᓄᑦ ᐅᖃᐅᑎᕙᓪᓕᐊᓂᐊᖅᑲᒋᑦ.

ᑕᐃᒪ ᐊᖅᕕᐅᑉ ᐅᖅᓱᖏᑦ ᐅᒥᐊᕐᔪᐊᒃᑯᑦ ᐊᐅᓪᓚᕈᔾᔭᐅᖃᑦᑕᓚᐅᖅᓯᒪᒻᒪᑕ, ᑕᐃᔅᓱᒪᓂ ᐊᖅᕙᒐᓱᑉᐸᓂᕐᖓᑕ ᐅᖅᓱᖓᓄᑦ ᑭᓯᐊᓂ ᓲᕐᓗ ᒪᓐᓇ ᐃᖅᑲᓇᐃᔭᖅᕕᐅᓗᐊᖅᓯᒪᒻᒪᓐ ᒪᑯᐊᓗᑦᑕᐅᖅ ᓱᖅᑲᐃᑦ ᐊᐅᓪᓚᖅᑎᑐᐃᓐᓇᕆᐊᖃᓕᖅᑐᑦ ᕿᓚᔅᓱᖅᓯᒪᓕᖅᑐᖅ ᐊᒻᒪᓗ ᑭᓱᑐᐃᓐᓇᐃᑦ ᓴᓇᒋᐊᖃᐃᓐᓇᓲᖑᒻᒪᑕ, ᑖᓐᓇᑦᑕᐅᖅ ᓴᓇᓐᖑᐊᖅᑐᖅ, ᐊᒻᒪᓗ ᐅᒥᐊᑕᖃᖅᑐᓂ ᑕᒫᓂ ᐳᓯᓐᖓᔪᓂᒃ, ᐊᕝᕙᒐᓱᐊᕈᑎᓂᒃ. ᑖᒃᑯᐊ ᐅᒦᖅᑭᕕᒥᓂᖏᑦ ᐅᓇᓂ ᑕᑯᔪᓐᓇᓂᐊᖅᑕᕗᑦ ᑕᑯᔭᖅᑐᑲᐃᓐᓇᕈᓐᓇᓂᐊᕐᒥᔭᕗᑦ ᑕᐅᓇᓂ. ᑕᒫᓂ ᓄᖅᑲᖃᑦᑕᓂᑦᑎᓐᓂ ᐊᐱᖅᑯᑎᔅᓴᖃᕋᐃᒍᕕᑦ ᐊᐱᕆᖃᑦᑕᕐᓗᑎᑦ.

ᐊᐱᖅᓱᖅᑎ:

ᐄ, ᑕᐃᒃᑯᐊᓕ ᒫᓐᓇ ᑕᒫᓂ ᓯᓈᓂ ᐃᖅᑲᓇᐃᔭᖅᑎᖏᑦ, ᐃᓛ ᐃᓄᐃᑦ ᐃᑲᔪᖅᑎᐅᕙᑦᑐᒥᓃᑦ ᑖᒃᑯᓄᖓ ᖃᓪᓗᓈᓄ? ᐅᕝᕙᓗ ᓂᕈᐊᖅᑕᐅᓯᒪᓪᓗᑎᒃ, ᑕᒫᓃᑦᑕᐅᑎᒋᔪᒥᓃᓪᓘᓐᓃᑦ, ᖃᓄᕐᓕ ᑲᑎᓚᐅᖅᓯᒪᓐᓂᕐᖓᑕ ᑖᒃᑯᐊ ᖃᓪᓗᓈᑦ ᐊᖅᕙᓂᐊᖅᑎᖏᑦ ᑖᒃᑯᐊᓗ ᒫᓂ ᐃᓄᐃᑦ ᓄᓇᖃᖅᑐᒥᓃᑦ?

ᔪᐊᕕ:

ᒫᓂᒥᐅᑕᖅᑕᖃᖅᑎᓪᓗᒍ ᑕᕝᕙᓂ ᕿᑭᖅᑕᓂ, ᐊᖏᔪᖅᑳᖃᖃᑦᑕᓚᐅᖅᓯᒪᒻᒥᔪᖅ ᐃᓄᒻᒥᒃ ᐃᓚᒃ ᓖᑕ, ᑕᐃᒃᑯᐊ ᓯᕗᓪᖅᑎᖓᑦ ᑕᐃᒪᐃᖃᑦᑕᓚᐅᖅᓯᒪᔪᖅ ᑕᕝᕙᓂ, ᓲᕐᓗ ᑖᒃᑯᐊ ᖃᓪᓗᓈᖏᓐᓇᐃᑦ ᐊᖅᕕᒐᓱᖃᑦᑕᓂᓐᖏᒻᒪᑕ ᐊᒻᒪᓗ ᐃᓄᐃᓐᓇᐃᑦ ᐊᖅᕙᒐᓱᖃᑦᑕᕋᑎᒃ, ᑖᒃᑯᐊ ᑲᑎᒻᒪᓪᓗᑎᒃ ᐃᑲᔪᖅᑎᒌᑦᑐᑎᒃ ᐊᖅᕙᒐᓱᖃᑦᑕᓚᐅᖅᓯᒪᔪᑦ. ᖃᓪᓗᓈᓪᓕ ᐊᕝᕙᒐᓱᐊᖅᑐᑎᒃ ᓂᕿᖓᓂᒃ ᐱᓗᐊᓐᖏᒻᒪᑕ, ᑖᒃᑯᓄᖓᓕ ᑭᓯᐊᓂ ᐃᓄᓐᓄ ᓄᓇᖃᖅᑐᓄᑦ, ᒪᑦᑕᖏᓐᓄᓪᓗ ᐱᔭᐅᓗᐊᓐᖑᐊᖃᑦᑕᖅᑐᒥᓃᑦ. ᑖᒃᑯᐊᓕ ᒪᕐᕈᐃᓐᓈᒃ ᐊᖅᕕᒻᒥᓐ ᐱᔭᐅᒐᓱᓗᐊᓐᖑᐊᕐᖓᑎᒃ, ᐅᖅᓱᖓᓄ ᐊᒻᒪᓗ ᓱᖅᑲᖏᑦ. ᑕᕝᕙ ᑖᒃᑯᐊ ᑕᕝᕙ ᒫᓃᑦᑐᑦ ᐃᓱᒪᒋᓐᖑᐊᕈᓐᓇᖅᑕᕗᑦ ᑕᐃᔅᓱᒪᓂ ᖃᓄᐃᓕᐅᖃᑦᑕᓂᕐᒪᖔᑕ ᓯᕗᓕᖅᐳᑦ. ᐅᓄᖓ........ᐃᓚᖓᓂᑦ ᐅᖃᐅᑎᒃᑲᓂᕐᓂᐊᕆᕙᒋᑦ, ᒫᓃᑦᑐᖃᒃᑲᓂᕐᒥᔪᖅ.

ᐊᐱᖅᓱᖅᑎ:

ᑖᓐᓇᓕ ᑕᕝᕙᓂ ᕿᑭᖅᑕᓂ ᑕᑯᔭᔅᓴᐅᒻᒪᑕᐃᓛᒃ ᑭᒪᑦᑕᐅᓯᒪᔪᑦ ᑕᐃᔅᓱᒪᓂ ᐊᑐᖅᑕᐅᕙᓚᐅᖅᑐᑦ ᐃᓅᓯᕆᔭᐅᕙᓚᐅᖅᑐᑦ, ᑖᒃᑯᐊᓕ ᒫᓐᓇ ᓵᑦᑎᓃᑦᑐᑦ ᓯᕗᕋᑦᑎᓃᑦᑐᑦ, ᓴᐅᓂᖏᑦ, ᐃᓛ ᓴᐅᓃᑦ ᐊᖅᕕᒻᒧᓐ?

ᔪᐊᕕ:

ᐄ ᑖᒃᑯᐊ ᓴᐅᓃᑦ ᐊᖅᕕᒻᒧᓐ ᐊᒻᒪᓗ ᑭᐊᓯᑕᖃᖅᑐᓂ ᒥᑭᔪᒥᓂᕐᒥ, ᐊᒻᒪᓗ ᐊᓪᓕᕈᖓᑕ ᐃᓚᒥᓂᖏᓐ. ᑕᑯᒐᑦᑎᒍ ᑭᓪᓗᑐᖅᓯᒪᔪᖅ ᑕᐃᔅᓱᒪᓂᓕ ᓴᓇᔭᐅᖃᑦᑕᓚᐅᖅᓯᒪᒻᒪᑕ ᐊᖅᕕᐅᑉ ᓴᐅᓂᖏᑦ ᖃᓇᓕᐊᖑᓪᓗᑎᓪᓗ ᐊᒻᒪᓗ ᖃᒧᑏᓐᓄ ᐱᕐᕌᓕᐊᖑᓪᓗᑎᒃ ᐊᒻᒪᓗ ᑭᖑᓂᖓᒍᑦ ᒫᓂ ᐃᓄᐃᑦ ᑯᐊᐸᒥᓂ ᓴᖅᑮᓕᕐᖓᑕ ᓴᓇᓐᖑᐊᕋᔅᓴᒥᓂᒃ ᑮᓇᐅᔭᓕᐅᕈᑎᒋᒐᓱᐊᖅᑐᒍ ᑕᒫᓐᖓ ᓴᐅᓂᕐᓂ ᐱᖃᑦᑕᓚᐅᖅᓯᒪᒻᒪᑕ ᐅᕙᓂ ᓴᐅᓂᖅᑕᖃᓗᐊᓐᖏᓚᖅ ᑕᕝᕙᓂ ᕿᑭᖅᑕᓂ, ᑕᒪᒃᑯᐊ ᐊᑐᖅᑕᐅᖃᑦᑕᖅᓯᒪᒻᒪᑕ ᓴᐅᓂᖏᑦᑕᐅᖅ ᐃᓄᓐᓄᑦ.

ᒪᑐᔾᔪᑎᖓ

ᔪᐊᕕ:

ᐄ, ᑕᐃᒃᑯᐊ ᓱᖅᑲᖏᑦ ᐊᑐᖅᑕᐅᑲᑦᑕᓚᐅᖅᓯᒪᔪᑦ ᓯᓚᓗᒐᐃᑦᑯᑎᓄ ᑎᒋᓐᖓᖅᑯᑎᓕᐊᖑᓪᓗᑎᒃ ᐊᒻᒪᓗ ᐃᐸᕋᐅᑕᓕᐊᖑᓪᓗᑎᒃ ᕿᒧᔅᓯᐅᑎᓄᑦ ᐊᒻᒪᓗ ᑯᐊᓴᑦ ᒪᐅᖓ ᓇᕿᔾᔪᑎᓕᐊᖑᓪᓗᑎᒃ ᓈᕐᒧᓐ, ᑕᐃᒃᑯᐊᖃᐃ ᖃᓪᓗᓈ ᖁᐃᓂᓗᐊᓐᖑᐊᕐᓂᖏᑦ ᐊᒥᑦᑑᔮᕈᓐᓇᕐᖓᑕ ᑕᐃᒪᐃᑦᑐᒧᓐ ᑕᐃᒃᑯᓄᖓ ᑯᐊᓴᑦᖑᓂᕋᖅᑕᐅᔪᓄᑦ ᒫᓂ ᐊᑐᖅᑕᐅᖃᑦᑕᓲᖑᓐᖏᒻᒥᒪᑕ, ᑕᐃᒪᐃᑦᑐᓕᐊᖑᖃᑦᑕᖅᓯᒪᔪᓐ. ᑕᐃᒃᑯᐊ ᐅᖅᓱᖏᑦ ᐲᔭᖅᑕᐅᓪᓗᑎᒃ, ᐃᓛᒃ ᐅᕙᓂ ᐊᒻᒪ ᒪᓐᓇ ᐅᖅᓱᓕᐅᖅᕕᒥᓂᐅᓗᐊᕐᖓᓐ. ᐊᖏᔫᑎᑦ ᐴᖅᑲᖅᑕᐅᖃᑦᑕᓚᐅᖅᓯᒪᔪᑦ ᐅᑯᓄᖓ ᑭᑦᑑᓇᕐᓄᑦ, ᑭᑦᑑᕐᓇᐅᓂᕋᖅᑕᐅᒻᒪᑕ, ᐊᖏᔫᑕᐅᓪᓗᑎᒃ ᑕᕝᕙᓐᖓᓐ. ᐃᒪᐃᑎᓪᓗᒍ ᐊᕝᕙᑦᑐᖃᖅᑲᑦ. ᑕᐃᒪ ᐅᒥᐊᕐᔪᐊ ᑎᑭᒐᓱᐊᕐᓂᖓᓂ, ᑕᕝᕙᓂ ᐃᓐᓇᐅᓯᑦᑎᐊᖑᓕᖅᑐᖅ ᑕᒪᓐᓇ ᐅᖅᓲᓂᖓ ᐲᔭᖅᓯᐊᖑᓕᖅᑐᖅ ᑖᓐᓇ ᐊᑯᓂᐅᓂᖅᓴᐅᓪᓗᓂ. ᐊᖏᔫᑎᓪᓕ ᐴᖅᑲᖅᑕᐅᖏᓐᓇᖅᑐᑎᒃ. ᑭᓯᐊᓂ ᐅᖅᓱᓕᐅᖅᑕᐅᓪᓗᑎᒃ ᐅᕙᓂ, ᐅᑯᓇᓂ ᒪᕐᕉᓐᓂ, ᑕᐃᒪ ᐃᒐᔪᐅᑦᑕᖅᑯᑦ ᒥᑭᔫᑕᐅᓂᖅᓴᐅᓪᓗᑎᒃ, ᐅᖅᓱᖏᑦ ᒥᑭᔫᑕᐅᓂᖅᓴᐅᓪᓗᑎᒃ ᓱᒃᑲᓕᓂᖅᓴᐅᓪᓗᓂᓗ, ᓱᑲᓐᓂᓴᐅᓪᓗᓂ. ᑕᐃᒪᓕ ᖃᑦᑕᐅᔭᒧᓐ ᐴᖅᑲᑕᐅᑦᑕᓕᕆᕗᑦ. ᑖᒃᑯᓇᓐᖓᑦ ᑕᒪᒃᑮᓐᓂ ᖃᑦᑕᐅᔭᒧ ᐴᖅᑲᑕᐅᒻᒪᑕ, ᑖᓐᓇ ᐅᖅᓱᖓ ᖃᓪᓗᓈᓄ ᐊᐅᓪᓚᖅᑎᑕᐅᓪᓗᓂ. ᖃᓪᓗᓈᓄ ᐊᐅᓪᓚᖅᑎᑕᐅᒐᒥ ᑕᐃᒪ ᐅᖅᓱᖅᑎᕈᑎᓕᐊᖑᓪᓗᓂ, ᐊᐅᓚᐅᑎᓄᓪᓗ ᐅᖅᓱᖅᑎᕈᑎᓕᐊᖑᓪᓗᓂ ᐊᒻᒪᓗ ᐅᖅᓱᔅᓴᓕᐊᖑᓪᓗᓂ ᖁᓪᓕᕐᒧ ᐊᒻᒪᓗ ᐃᓚᖓᒍᑦ ᐅᐊᓴᐅᑎᓕᐊᖑᕙᑦᑐᓂ ᐃᓛ ᑭᓱᑐᐃᓐᓇᖅ ᑖᓐᓇ ᓴᓇᔭᐅᖃᑦᑕᖅᓯᒪᔪᖅ. ᐊᒻᒪᑦᑕᐅ ᐊᖅᕕᐅᑉ ᓴᐅᓂᖏᑦ ᐊᑐᖅᑕᐅᖃᑦᑕᖅᓯᒪᒻᒥᔪᑦ ᑕᒫᓂ ᐃᓄᓐᓄᓐ. ᖃᒧᑎᒋᔭᐅᖃᑦᑕᓚᐅᖅᓯᒪᔪᑦ, ᖃᒧᓯᐊᖑᑦᑕᖅᑯᖅ ᓇᐳᓕᐊᖑᓪᓗᓂᓗ ᐊᒻᒪᓗ ᐃᐳᒻᒧᓐ ᒧᓕᓕᐊᖑᓪᓗᓂ, ᑖᒃᑯᐊ ᓴᐅᓂᖏᑦ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᒫᓂ ᐊᒻᒪᓗ ᓂᕿᖓ ᐱᔭᐅᖃᑦᑕᖅᓯᒪᒻᒥᔪᖅᑕᐅᖅ ᐃᓛᓐᓂᒃᑯᑦ ᐃᒐᔭᐅᕙᑦᑐᑎᒃ ᓂᒃᑯᓕᐊᖑᕙᑦᑐᑎᓪᓗ ᐃᓄᓐᓄᓪᓗ ᓂᕿᒋᔭᐅᓪᓗᑎᒃ ᐊᒻᒪᓗᑦᑕᐅᖅ ᕿᒻᒥᖏᑦ ᓂᕆᒋᐊᖃᕐᒥᒻᒪᑕ ᕿᒥᖅᑯᑎᔅᓴᓕᐊᖑᖃᑦᑕᓚᐅᖅᓯᒪᒻᒥᔪᓐ. ᑕᐃᒫᒃ ᑖᒃᑯᐊ ᐊᖅᕕᐅᑉ ᑭᓱᓕᒫᖏᑦ ᐅᐊᑦᑎᐊᕈ ᐊᑐᖅᑕᐅᖃᑦᑕᓚᐅᖅᓯᒪᔪᑦ ᐊᖅᕙᒐᓱᖃᑦᑕᓚᐅᖅᓯᒪᒻᒪᑕ ᐅᖅᓱᐊᓗᓐᓂᐊᖅᑏᑦ ᑕᐃᒃᑯᐊ ᑎᑭᓚᐅᖅᑎᓐᓇᒋᑦ, ᑭᓯᐊᓂ ᐅᖅᓱᐊᓗᓐᓂᐊᖅᑏᑦ ᓴᖅᑭᕐᖓᑕ ᐊᖅᕙᒐᓱᐊᕈᓐᓃᖅᓯᒪᔪᓐ ᑕᒫᓂ.

ᐊᐱᖅᓱᖅᑎ:

ᓱᓇᑦᑕᐅᖅ?

ᔪᐊᕕ:

ᓱᓕ ᒫᓂ ᐊᓯᖏᓐᓂᑦ-ᓂᐊᕆᕗᖅ ᑕᐃᒃᑯᐊ ᐃᖅᑲᓇᐃᔭᖅᕕᐅᖃᑦᑕᕐᓂᑯᐃᑦ ᑕᒫᓂ. ᐊᐱᖅᓱᖅᑎ:

ᒪᓐᓇᓕ ᑐᐱᖅᕕᒥᓂᖅᔫᔮᖅᑐᓂᓗ, ᒪᓐᓇᖃᐃ ᐃᓪᓗᖃᖅᕕᒥᓂᖅ?

ᐊᐱᖅᓱᖅᑎ:

ᒪᓐᓇᓕ ᑐᐱᖅᕕᒥᓂᖅᔫᔮᖅᑐᓂᓗ, ᒪᓐᓇᖃᐃ ᐃᓪᓗᖃᖅᕕᒥᓂᖅ?

ᔪᐊᕕ:

ᐄ ᑕᐃᒃᑯᓇᓐᖓᓐ ᒥᐊᓕᒐᕐᓂᒃ ᐃᖅᑲᓇᐃᔭᖅᕕᐅᖃᑦᑕᖅᑐᒥᓂᐅᒻᒪᓐ, ᒥᐊᓕᒐᐃᑦ ᐃᓪᓗᖃᖅᕕᒥᓂᖓᓐ, ᐃᖅᑲᓇᐃᔭᖅᑎᖏᓐᓄᓪᓗ ᐊᖏᕐᕋᕆᔭᐅᓪᓗᓂ ᐊᒻᒪᓗ ᐃᖅᑲᓇᐃᔭᖅᕕᐅᕙᑦᑐᓂᓗ ᑖᒃᑯᓇᓐᖓ ᒫᓐᓇ ᓇᔪᖅᑕᕗᑦ ᒥᐊᓕᒐᐃᑦ ᐃᓪᓗᖃᖅᕕᒥᓂᖓᓐ, ᐅᕙᓂ ᓴᐃᒻᒪᑎᖃᕐᒥᔫᒐᓗᐊᑦ ᑭᓯᐊᓂ ᑕᑯᔅᓴᐅᑎᐊᓐᖏᒻᒪᓐ. ᑕᒫᓂ 1860ᖑᑎᓪᓗᒍ ᑕᒫᓃᓚᐅᖅᓯᒪᒻᒪᑕ ᑖᒃᑯᐊ ᒥᐊᓕᒐᕐᒥᐅᓐ 26ᓂ ᓴᐃᒻᒪᑎᒋᔭᖓ ᐅᓪᓗᕆᐊᓐᖑᐊᖃᖅᑎᓪᓗᒍ, ᒫᓐᓇᓕ 52ᓂ ᐅᓪᓗᕆᐊᓐᖑᐊᖃᓕᖅᑐᖅ ᑖᒃᑯᐊ 52ᓂ ᓄᓇᖁᑎᖃᓕᕋᒥᒃ 52 ᓯᑕᐃᑦᔅᖑᓕᕐᖓᑕ.

ᐊᐱᖅᓱᖅᑎ:

ᒪᓐᓇᓕᑭᐊ ᓇᔪᖅᑕᕗᑦ, ᖃᒻᒪᖃᖅᕕᒥᓂᖅ?

ᔪᐊᕕ:

ᔨᐊ, ᖃᒻᒪᖃᖅᕕᒥᓂᖅ ᐃᓄᒻᒧᑦ, ᐃᓄᓐᓄᑦ, ᒫᓐᓇ ᐸᓐᓂᖅᑑᒥ ᓄᓇᖃᖅᑐᖅ ᑕᕝᕙᓂ ᖃᒻᒪᖃᓚᐅᖅᓯᒪᔪᖅ. ᑕᐃᒪᓗ ᐃᓱᒪᔪᔅᓴᐅᖅᑲᐅᒐᕕᑦ ᑕᕝᕙᓂ ᒪᑯᓂᖓ ᐃᓪᓗᒥᓃ ᑕᐃᒃᑯᐊ ᓇᒧᓐᖔᓂᕐᒪᖔᑕᓕ. ᐅᕙᓂ ᑕᕝᕙ ᓇᔪᖅᑕᕗᒃ ᖃᒻᒪᓕᐊᒥᓂᐅᒻᒪᓐ ᒫᓐᖓ ᐅᒥᐊᕐᔪᐊᒥᓂᕐᒥᒃ, ᐅᒥᐊᕐᔪᐊᒥᓂᕐᒥᓪᓗ ᐊᒻᒪᓗ ᑕᐃᒃᑯᓇᓐᖓ ᐃᖅᑲᓇᐃᔭᖅᕕᐅᕙᑦᑐᒥᓂᕐᓂᒃ. ᑕᐃᔅᓱᒪᓂ ᐅᐊᑦᑎᐊᕈ ᐃᓄᐃᑦ ᓯᕗᓕᖅᐳᑦ ᑕᒫᓐᖓ ᑭᓱᑐᐃᓐᓇᕐᒥ ᕿᔪᒻᒥᓘᓐᓃ ᑕᑯᒐᒥᒃ ᕿᒪᐃᓐᓇᐃᓂᐅᓴᕙᓚᐅᓐᖏᒻᒪᑕ ᐊᐅᓪᓛᓕᕋᒥᓪᓗ ᓄᓇᐅᑉ ᐊᓯᐊᓄᑦ ᓇᔅᓴᖅᑐᒋᑦ. ᑖᒃᑯᐊ ᖃᒻᒪᓕᐊᒥᓂᖅᑕᐅᖅ ᑕᒪᒃᑯᐊ ᕿᔫᓂᖏᑦ ᐅᒥᐊᕐᔪᐊᒥᓂᕐᒦᖔᖅᓯᒪᓪᓗᑎᒃ, ᐊᒻᒪᓗ ᖃᓪᓗᓈᓄ ᕿᒪᑦᑕᒥᓂᕐᓂᒃ. ᑕᒪᒃᑯᐊ ᓴᕕᕋᔭᐅᓂᖏᑦ ᐅᒥᐊᕐᔪᐊᒥᓂᐅᑦᑕᖅᑯᑦ ᐃᓚᖏᓪᓗ ᖃᓪᓗᓈᓄ ᐃᓪᓗᒋᔭᐅᔪᒥᓂᕐᓂᒃ. ᐃᓚᖏ ᒫᓃᒍᓐᓃᕐᖓᑕ, ᓄᓇᐅᑉ ᐃᓯᐊᓄ ᐊᐅᓪᓛᕐᖓᑕ ᑕᐃᒃᑯᐊ ᓇᔅᓴᖃᑦᑕᖅᑕᒥᓂᐅᒻᒪᑕ.

ᐊᐱᖅᓱᖅᑎ:

ᒫᓐᓇᓕ ᑖᓐᓇ ᖃᖓᑭᐊᖅ ᕿᒪᑦᑕᒥᓂᖅ?

ᔪᐊᕕ:

ᒫᓂ 1925ᖑᑎᓪᓗᒍᖃᐃ, 1926ᓗ ᐊᑐᖅᑎᓪᓗᒍ ᑕᒫᓂᒥᐅᑕᐅᒍᓐᓃᕐᖓᑕ ᕿᒪᑦᑕᒥᓂ ᑖᓐᓇ.

ᐊᐱᖅᓱᖅᑎ:

ᑭᒃᑯᓪᓕᐅᓇ, ᑭᐊᓪᓕᐅᓇ ᖃᒻᒪᖃᖅᕕᒥᓂᖓ?

ᔪᐊᕕ:

ᓯᕗᓪᓕᕐᒥ ᖃᒻᒪᖃᖅᕕᒥᓂᖓ ᐃᓐᓇᑐᖃᕆᔭᑯᓗᑉᐳᓐ ᐸᓐᓂᖅᑑᒥ ᐃᑦᑐᐊᖓᓐ ᐅᕙᓂ ᐃᓅᓚᐅᖅᓯᒪᒻᒪᓐ, ᓱᕈᓯᐅᓚᐅᖅᓯᒪᓪᓗᓂᓗ.