ᐅᕙᓃᑦᑐᑎᑦ : ᐊᖏᕐᕋᖅ » ᑳᐱᑕᐃ ᔮᓐ ᒧᕋᐃ
ᑳᐱᑕᐃ ᔮᓐ ᒧᕋᐃ
ᑖᓐᓇ ᓯᑳᑦ ᔮᓐ ᒧᕋᐃ, ᐃᕐᓂᖓ ᐋᓕᒃᓵᓐᑐ ᒧᕋᐃ ᐊᖏᔪᑦᓯᐅᑉ ᐊᒻᒪᓗ ᖃᑕᙳᑎᖓ ᐋᓕᒃᓵᓐᑐ ᒧᕋᐃ ᓄᑲᖅᓯᐅᑉ, ᑕᐃᔭᐅᓲᖑᒻᒥᔪᖅᑕᐅᖅ ᓇᑯᖓᔪᒥᒃ (ᓇᑯᖓᔪᖅ) ᐃᓄᓐᓄᑦ, ᓱᕈᓯᐅᓂᕐᒥᓂ ᖃᑕᙳᑎᒌᒃ ᐅᒥᐊᕐᔪᐊᓃᖃᑦᑕᖅᓯᒪᔫᒃ ᐊᑖᑕᖓᑕ ᐊᐅᓚᑕᖏᓐᓂ. ᔮᓐ ᒧᕋᐃ ᐃᓅᓕᖅᑐᒥᓂᖅ 1863–ᒥ ᑎᖏᕐᕋᐅᑕᓕᒃᑯᓪᓗ ᐃᖏᕐᕋᕙᑦᑐᒥᓂᐅᓪᓗᓂ ᑭᒡᒐᖅᑐᐃᓪᓗᓂ ᓯᒃᑳᑦᓯᒃᑯᑦ ᑲᐸᓂᖁᑎᖓᓂᒃ ᕌᐳᑦ ᑭᓐᓂᔅ ᐃᕐᓂᕇᓪᓗ ᐱᓕᕆᕕᖓᓂᒃ ᑕᓐᑏᒥ ᐊᒻᒪᓗ ᓂᐅᕕᖅᑎᒃᑯᓄᑦ 1932 ᑎᑭᑦᓱᒍ.
ᐊᑯᓂᐅᙱᑦᑐᒥᒃ 1890–ᖏᓐᓂ, ᒧᕋᐃ ᓄᑲᕇᒃ ᐃᓚᒋᔭᐅᖃᑦᑕᖅᑐᒥᓃᒃ ᐊᕐᕕᓂᐊᖅᑐᖃᖅᑎᓪᓗᒍ, ᐊᑭᓕᖅᑕᐅᓯᒪᔪᒥᒃ ᓂᐅᕕᖅᑎᑯᓐᓄᑦ ᐊᐅᓚᒃᓯᖁᓪᓗᒋᑦ ᐅᒥᐊᕐᔪᐊᒥ ᐊᑎᓕᒻᒥᒃ ᐊᔪᐃᓐᓇᖅᑐᖅ
(Perseverance ) (Eber 1989: 95). ᐊᑯᓐᓂᖏᓐᓂ 1899 ᐊᒻᒪᓗ 1903, ᓱᓕ ᐃᑲᔪᖅᑕᐅᓪᓗᓂ ᖃᑕᙳᑎᒥᓄᑦ, ᐊᐅᓚᒃᓯᔨᒥᓂᖅ ᐅᒥᐊᕐᔪᐊᒥᒃ ᐋᒃᑎᕝ (Active), ᔮᓐ ᒧᕋᐃ ᖃᐅᔨᒋᐊᙵᖅᑐᒥᓂᖅ ᐊᐅᓚᒃᓯᕙᑦᑐᒥᓂᐅᓪᓗᓂᓗ ᑭᓐᓂᔅ ᐊᕐᕕᓕᕆᕕᒻᒥᒃ ᓴᓪᓕᒥ. ᑭᖑᓂᖓᒍᑦ ᑕᐃᓐᓇ ᐊᕐᕕᓕᕆᕕᒃ ᒪᑐᓯᒪᓕᖅᑎᓪᓗᒍ, ᑭᓐᓂᔅ [ᑲᑉᐸᓂ] ᐊᐅᓚᑎᑦᓯᔪᒥᓂᖅ ᔮᓐ ᒧᕋᐃᒥᒃ, ᐊᐅᓚᒃᓯᔨᐅᓪᓗᓂ ᐅᒥᐊᕐᔪᐊᒥᒃ ᐊᑎᓕᒻᒥᒃ ᐆᕐᓇᔅ ᕗᐃᓕᐊᒻᒥᒃ (Ernest William), ᓇᐅᔮᒧᑦ, ᐅᒥᐊᕐᔪᐊᑦ ᑕᐃᑲᓂ ᐊᕐᕕᓕᕆᕕᐅᕙᑦᑐᒥᓃᑦ ᑭᓴᖅᓯᒪᑦᓱᓂ. ᔮᓐ ᒧᕋᐃ ᐊᕐᕌᒍᒐᓚᓐᓂᒃ ᐊᐅᓚᒃᓯᔨᒥᓂᖅ ᑖᒃᓱᒪᖓᑦ ᐅᒥᐊᕐᔪᐊᒥᒃ ᓇᐅᔮᖅᐸᓯᒻ, ᒪᓕᒃᓯᑐᓕᐊᕐᓂᕐᒥᔪᖅᑕᐅᖅ (ᐅᑭᐅᖓᓂ 1906–07). 1912–ᖑᑎᓪᓗᒍ, ᖃᑕᙳᑎᖓ ᑐᖁᔪᒥᓂᐅᑎᓪᓗᒍ ᖁᐊᖅᓵᓇᖅᑐᒃᑯᑦ ᐋᑐᕚ ᕿᑭᖅᑕᖏᓐᓂ, ᔮᓐ ᒧᕋᐃ ᐊᐅᓚᒃᓯᔨᒥᓂᖅ ᐃᐅᓪᐳᑦ (Albert) ᐅᒥᐊᕐᔪᐊᒥ. ᖃᐅᔨᒪᒻᒥᔪᒍᑦᑕᐅᖅ ᓇᒡᒋᒐᒥ ᓂᐅᖃᕈᓐᓃᕐᓂᕆᐊᖓᓂᒃ ᐃᖏᕐᕋᕐᓗᑎᒃ ᐃᒪᒃᑯᑦ 1919–ᖑᑎᓪᓗᒍ. ᐊᖁᑎᐅᒍᓐᓃᖅᑐᒥᓂᖅ 1930–ᒥ ᐊᖁᑉᐸᑦᑐᒥᓂᐅᓪᓗᓂ ᓇᓯᑰᐱᒥᒃ, ᓂᐅᕕᖅᑎᑯᓐᓄᑦ ᓂᐅᕕᐊᑦᓴᑕᖅᑎ ᐅᒥᐊᕐᔪᐊᖅ.
ᔮᓐ ᒧᕋᐃ ᐃᖅᑲᓇᐃᔭᖃᑎᖃᖅᐸᑦᑐᒥᓂᖅ ᓄᓇᓕᒻᒥ ᐃᓄᓐᓂᒃ. ᐊᕐᕌᒍᒐᓚᓐᓂᒃ, ᐃᑲᔪᖅᑎᒥᓂᖓ ᐊᖑᑎᒻᒪᕆᒃ (ᓯᑳᓯ ᑖᒻ). ᔮᓐ ᒧᕋᐃ ᖃᐅᔨᒪᔭᐅᖃᓯᐅᑎᓐᓂᕐᒥᔪᖅᑕᐅᖅ ᓴᒻᒥᑦᓯᔨᒋᕙᓐᓂᕆᐊᖓᓂᐅᒃ ᒥᐊᓕᒐᒦᙶᖅᓯᒪᔫᑉ ᑳᐱᑕᐃ ᔪᐊᔾ ᑰᒨᑉ.